Mhakechüko 11 - Angami Naga CL (Re-edited) Bible (BSI)

Pitor Mhatho Dze

¹ Judia nu keba Apostelko mu kepelekoe Judakemoko rei Ukepenuopfü dieu lielieketa silie.

² Süla Pitor-e Jerusalem nu vorlie tse zhükeremiako puo ze kemeü di

³ sie, “No kiüdi zhürekemoko ki vo uko ze mhacümhakrieta ga?” sita.

⁴ Süla Pitor sie uko ki süu dze pu kemenuoshütuo üdi sie,

⁵ “A Jopa nadiu nu kecha chü keba ki, a sie si mozhü di ziemho puo ngu. Ru mhapuo, pfhe kezha tuoikecü puo, puoke diako pete khe di teigei nu kerünuo se tsur a khieki balieta.

⁶ A süu meho menuoshü tse sünusü nhachü phidiapfü, mha tekecü nhachüko, mu gou ketuo khunuoko mu teirako rei tuo di ngu.

⁷ A mhapfhe puo a ki pu sakecü si, ‘Pitor, sielie; dukhrilie di cülie,’ isi.

⁸ Derei a sie, ‘Suotuomu, Niepuu: Kekreilamonyü rhukecü vie morei mesa kemo puorei se a me nu shüya momu.’

⁹ Sitse va kenieu rei teigei nu mhapfheu la sie, ‘Ukepenuopfü chü kemesawaketau, no rhu üdi pu hie,’ si.

¹⁰ Mha hau va se chüta, süsie süko pete teshüse teigei la khota.

¹¹ Sütei touki Kaisaria nunu ketsekeshü mia seko vor a kebachüu tsolieta.

¹² Siro Ruopfüu a bu mhapuorei kenoudo mo zo di uko ze volienuta. Jopa nunu kepelemia sorou a ze kepeza di themiau kinu volie.

¹³ Sitse puo hieko ki puo kimhie di teigeidielieu ngu shi mu süu puo ki mha pu di, ‘Mia ketsepie Jopa nu Simon Pitor ükecüu ki shü di puo ze vorcie;

¹⁴ puo n ki die pushütuo mu süu la no tsiu n kinuko pete kelalietuo,’ si.

¹⁵ Sidi a diepuvü tse hadzü u gei chüketa tuoi, Kemesa Ruopfüu uko gei tsurta.

¹⁶ Süki Niepuu thiedzü pukeshü, ‘Johan dzü nunu mia dzülu khashü, derei nieko we Kemesa Ruopfü nunu dzülupfütuo, ikeshü dieu a rükralie.’

¹⁷ Siro hadzü u Niepuu Jisu Khrista pelelie tse Kemesa Ruopfü methuo pie u ketsü touu pie uko rei tsü üliro, a supuo di Ukepenuopfü khalietuo mu?” sita.

¹⁸ Siro hau sikelie ki, uko kemekrie zeita. Mu uko Ukepenuopfü tshe di sie, “Ukepenuopfü thuo Judakemoko bu rei kerhei nu volieketuo la thenoukedikelie pie uko tsüshüte,” sita.

Antiok nu Kehouu

¹⁹ Kepechü sier di Stefan dukhrikewa ki kepelemiako phruo kecürepie lukihaki keshü nu uko huomia Foinikia, Saipras mu Antiok nu vo di dieu pie Judako ki rübei pu.

²⁰ Derei huomia Saipras mu Kurini nunu kevorko Antiok nu vo di Grik die kepu Judako ki rei Niepuu Jisu dze pushü.

²¹ Niepuu dzie uko ze tuo mu themia kekra pelelie di rürei Niepuu kitsa vorta.

²² Thedze hau Jerusalem kehou tsota, süla uko Barnaba ketsepie Antiok nu shü.

²³ Puo vo di Niepuu ngukemezhieu ngu di puo nei phita; puo uko pete bu thenou pete se dietho di Niepuu kitsa chüsechü tha zolienu tarhoshü.

²⁴ Puo themia kemezhü puo, Kemesa Ruopfü, mu kepele puo tshupfü di mia kekra ze Niepuu ki vorlie.

²⁵ Süsie Barnabae Saul pfhü Tars nu vo,

²⁶ sidi vo puo ngulie tse, puo ze Antiok nu vor di ciete puo sünu kehouu ze ba di mia kekra pethashü, mu Antiok nunu pethakelieko üse, “Khristamiako” idi kielie kerietho chü.

²⁷ Süki Jerusalem nunu siedzekesimiako Antiok nu vor.

²⁸ Uko mia puoe puo za Agaba ükecüu siethalie di Ruopfü kekuou nunu sie, kijü pete nu pekrie kemeriekecü puo vorketuo dze pu, mu süu Klaudia kedi teiki chü.

²⁹ Siro pethakeliekoe Judia nu keba kepeleko khruohiketuo la u thuo chülie keviu ketseshüketuo pepilie;

³⁰ uko hau chülie di Barnaba mu Saul unie dzie nunu ketsepie phichüko tsüshü.