Mhakechüko 1 - Angami Naga CL (Re-edited) Bible (BSI)

Phrapie Kezhü Kemesa Ruopfüu Kevor

¹ Harie Theofil, a a leshü kerieu nu Jisu mhatho therieko nunu chükeshü mu mia kepetha,

² puoe Kemesa Ruopfü geinu morokesuoko pie puo thuo kedakelie apostelko pethashüwa di puo ze teigei khoketa nhie ketso dze thushüwate.

³ Puo kemezhiekewa sie puoe zha hiediako rheituoketa pele molie kenjükecü zasi tha toupie uko bu ngu di Ukepenuopfü kedi dze se uko ki pu.

⁴ Siro puo uko ze keba ki, uko bu puo kinu phrakeshü ngukecü ketso Jerusalem nu pfhe balienu di pushü. Puoe sie, “Hauha, nieko a kinu silieketau zo;

⁵ kekreilamonyü Johan we dzü nunu dzülu khashü mia tsü, derei hasie zha cha ba kemonu nieko we Kemesa Ruopfü nunu dzülupfütuo.”

Jisu Ze Teigei Khoketa

⁶ Süla uko vor kengulieta tse, uko puo ki, “Niepuu, no Israel kedi kha lashüketuo teiute me?” idi ketso.

⁷ Puo sie, “Puou thuo puo kekuo se chüpie keba teiko morei puo mese toukiko nieko silie lho.

⁸ Derei Kemesa Ruopfü nieko gei vorkelie ki nieko kekuo ngulietuo; sitse nieko Jerusalem nu, Judia pete mu Samaria nu, tsiu kijü vala ketso rei a zhapumia chülietuo.”

⁹ Puoe hau pushükewa sie, uko meho ketha nu puo ze sieta; mu kimhou puo shü vor uko mhingu kinu puo zepfülieta.

¹⁰ Puo si khotakezhü ki uko mhidi mo di teigei meho tha ru mia kenie pfhe kekra se di mhai vor uko khieki thata.

¹¹ Unie sie, “Galilmiako, kiüdi nieko teigei meho tha zo ga? Nieko kinu puo ze teigei sieketa Jisu hau, nieko puo teigei kekho ngukecü mhie di, puo la tsur zotuo.”

Judas Sou Kedakelie

¹² Süsie uko Oliv ükezha kijüthou geinu Jerusalem nu la vorta, süu Jerusalem kepenuoki ba, sabat nhie chatuo chie kipuo zo.

¹³ Sidi uko nadiu nu lelie tse, uko keba kibou peso-u gei kholie, süko Pitor, Johan, Jakob mu Andria, Filip mu Thoma, Bartholoma mu Mathi, Alfia nuou Jakob, Simon puo Rhiekechüu, mu Jakob nuou Juda.

¹⁴ Hako pete u khapie kecha chü te mo ba, thenuko huo mu Jisu zuopfü Maria tsiu puo siezeko rei sa.

¹⁵ Süteiki Pitor-e kepeleko donu siethalie (uko kro-u mia krie puo di mepfü mese ba) di sie,

¹⁶ “Kezenuoko, kethodieu chü tsei morosuo, süu Kemesa Ruopfüe David tie nunu pedzüperie Judas, Jisu tekecüko chathakeshüu dze pupie zhü;

¹⁷ kekreilamonyü puo phrüpie u kro-u nu salietuo mu lietho hau nu puo ya pethopie tuo.”

¹⁸ (Themia hau kesuo kechü nunu krakelie pie lietsa puo khrülie ru puo sünunu thutsu puo kesewa, mu puo se puo rie pete rüla parta.

¹⁹ Jerusalem nu lhou keba pete süu si, süla uko ramia die nu lie süu üse, Hakeldama üdi kieta, süu Thezie Lie üsiya.)

²⁰ “Kekreilamonyü Chieliko leshü nu thupie kezhü: ‘Puo kiu bu ratalie, sünu baketuo miapuorei ba motalie;’ mu ‘Kekreimia puo bu puo tha nu kemeho-u chütalie.’

²¹ Süla Niepuu Jisue u donu kho mu keketuo ki puotei pete nu u ze seiketuo mia puo,

²² Johan dzülu khakeshü nunu sede di puo ze teigei sieketa ketso kengumia puo bu u ze di puo rheilakesie zhapu chü morosuo.”

²³ Süla ukoe mia kenie Josef Barsaba, Justa ü reiyakezhau, mu Mathia unie za chieshü.

²⁴ Sidi uko cha di sie, “Niepuu, no kehoupuo nou rei siya. Süla no hanie supuo kedaliete shicü hie ki pucie,

²⁵ Judas-e puo ba nu votatuoü rüreiketa lietho-u nu mu apostel kechü nu puo sou nu balieketuo la.”

²⁶ Sidi ukoe sünie la dapeshü ru Mathia za nu parlie, mu puo pie apostel kerepuoko salie.