Mathi 8 - Angami Naga CL (Re-edited) Bible (BSI)

Jisu Mpa Kechümia Puo Chü Pevikeshü

¹ Siro Jisu kijüthou geinu kerlie tse mia krodi puo siemedzi tuota,

² süki mpa kechümia puo puo ki vor puo mhodzünu khoutoulie di sie, “Niepuu, no n medo ro, a chü kemesashülie vi zo.”

³ Sitse puo puo dzie yhapie themia süu bie di sie, “A medowe, no mesaliecie.” Mu sishü tse puo gei mpa kechüu vilieta.

⁴ Sitse Jisu puo ki, “Harie, no mia puo ki rei pu hiecie, derei mezhü zievo-u ki vo di puo bu n mehowacie; sidi mia bu no vilieketa silieketuo la Mosae chünukeshü ruosuou khashüwacie.”

Jisu Kriemhokezhau Kituou Chü Keshürhokeshü

⁵ Süsie Jisu Kapernaum nu vorlie tse, kriemhokezhamia puo vor puo mezhiemelo di,

⁶ “Niepuu, a kituou rünyie di kemezhie se di kinu zhüya zolie.”

⁷ Sitse Jisu puo ki, “A vor puo chü keshürhoshütuo.”

⁸ Siru kriemhokezhau la sie, “Niepuu a n bu a ki khrükhro ler sü mo, derei no dieca puo pushü zorei, a kituou shürholietuo.

⁹ Kekreilamonyü a rei kezhamia khrükhro tuokezhamia zo; a khro rei chüpahimia ba. Siro a mia puo ki, ‘No tuo vocie,’ isi ro puo voya; mu kekreimia puo bu ‘Vorcie,’ isi ro, puorei vorya; mu a kituou ki, ‘No mha hau chüshücie,’ isi ro, puo süu chüshüya.”

¹⁰ Sitse Jisu die hau sikeshü ki puo ngota di puo siemedziketuoko ki, “A nieko ki pu toushütuo, a Israelmia donu themia hau kepele decü mhakipuorei ngulie mo.

¹¹ A nieko ki pushütuo, niathutsa mu niakratsa nu themia kekra vor teigei kedi nu Abraham mu Isak tsiu Jakob ze hietuo,

¹² derei kedinuonuoko we kelhoupie chazou kezei nu shüwatuo, sünu kra mu u hu thegeipie batuo.”

¹³ Sidi Jisu sie kriemhokezhau ki, “Tuo volie, mu n kepele kemhie chüpie n tsükelieu chücie.” Sitse bavüdo süu nu kituou shürholieta.

Jisu Themia Kekra Chü Keshürhokeshü

¹⁴ Süsie Jisu tuo Pitor kinu le ru, Pitor kimianuo zuo rukizhü di ngulie.

¹⁵ Sitse puoe puo dzie bieshü ru puo ruki mota, di sie mha kesepie puo tsü bata.

¹⁶ Siro sünhie thevatie mia terhuokesuoko bu u kebi ze tuoketa kekra ze Jisu ki vor, sitse puo die pushü di ruopfü süko whuowa, mu kechümiako pete chü keshürhoshü.

¹⁷ Siro mha hau chükeshü geinu thiedzü siedzekesiu Isaya pukeshü, “Puo u kesuo kemezieko mu kechükenyüko toupfüliete,” isikeshüu chü tseilie.

Pethakelie Kethomia Zasi

¹⁸ Süsie Jisue themia krodi vor puo houpfü ketha ngulie tse, dzükezha khie kekreitsa volienu di puo diekhashü.

¹⁹ Sitse thezhokepethamia puo vor di sie, “Kepethau, no kehourapuo vo rei a n siemedzituo.”

²⁰ Siru Jisu sie puo ki, “Meseruko u ki nyi mu teirako rei u kru nyi, derei Themia Nuou we puo tsü se kezhü chü rei jü,” sita.

²¹ Siro pethakelie kekreimia puo rei, “Niepuu a bu vo a puo khruwa periecie,” isi.

²² Derei Jisu sie, “A siemedzilie, mu kesiako bu kesiako khruwacie,” sita.

Jisu Teikhrie Kechü Zeikewa

²³ Siro Jisu rou nu le balie tse, puoe pethakelieko puo siemedzita.

²⁴ Sitse khriedi puo dzükezhau nu sierta, di rouu bu rületatuoüta, derei Jisu we zezhü zo.

²⁵ Süla pethakelieko vo puo kesou di sie, “Niepuu, hieko kelashücie! Hieko katatuoüzhie!”

²⁶ Sitse puo uko ki, “Harie nie kepele ketsako nieko kiüdi michieya ga?” Sidi puo sielie di teikhrie mu dzükezha kechüshü; sitse la zeita.

²⁷ Süla uko ngo di sie, “Hau themia kikecüpuota mu? Teikhrie mu dzükezha thuo rei puo die zeketa ha!” sita.

Jisue Mia Kenie geinu Terhuokesuo Whuokewa

²⁸ Süsie puo dzükezha khie kekreitsa Gadara kijü nu vorlie tse, terhuokesuo bu u kebi ze ketuo kenie mekhru nunu par puo ze keselie. Hanie u zho suo kemerie chü di miapuorei bu cha sütsa volieya mo.

²⁹ Süki unie shiekhoui di, “No Kepenuopfü Nuou, hienie pie kedipuo chütieya ga? No puoteiu tso kemonu hienie pechütuoü hanu vorya me?” sita.

³⁰ Süki thevo krodi puo uko ze kepeciekecü nu mha nge cütuo,

³¹ sitse terhuokesuoko puo ki cha di, “No hie whuowatuo üliro, hie ketsepie thevo kro-u nu shücie.”

³² Sitse Jisu sie uko ki, “Votalie,” ru süko ta thevoko gei leta; siro thevo kro-u ta tsiekhie geinu rüsou dzükezha nu tsu di sia phreta.

³³ Süki thevo kepfheko ta rünau nu vo terhuokesuo bu u kebi ze ketuonie gei kedipuo chüte shikecü dze pete pie mia ki pushü.

³⁴ Süla rünau pete Jisu ze kesetuoü par; mu uko puo ngulie tse, Puo bu uko kijü therhietanu di chata.