Mathi 7 - Angami Naga CL (Re-edited) Bible (BSI)

Mia Le Pejokecü

¹ “Mia kejo pfhü hie, siliro mia rei nie pejo molietuo.

² Kekreilamonyü nie mia pejo ro sümhie nie pejoketuo la, tsiu nie mia gei chükeshü tuoi mia rei nie gei chü lashü zotuokecü la.

³ Kiüdi n thuo n mhi nu seipe kebau le mo di n siezeu mhi nu puochuyo mehoya ga?

⁴ Morei n mhi nu seipe kebau biewa mo di n siezeu ki, ‘A bu n mhi nu puochuyo kawacie’ iya ga?

⁵ No ketherakezhau, n thuo n mhi nu seipeu chüwa periecie, silie liro n siezeu mhi nu puochuyo ngu meyiemeluo di kawatuo.

⁶ “Mha mesakecüu khapie tefü tsü hiecie mu cümenyie puoma kerepfü kelhoupie thevo mhodzünu shü hie, süko u phi khronu kedewa mu rei par di nie mekhawa rei silie lhomu.

Cha, Pfhü mu Ketoukecü

⁷ “Chacie, siro khapie nie tsütuo; pfhüya zocie, siro nie ngulietuo; ketouya zocie, siro khrüshü nie tsütuo.

⁸ Kekreilamonyü kehoupuorei chayakezhamia ngulieya, mu kehoupuorei pfhüyakezhamia ngulieya, tsiu kikha khrüpie ketouyakezhamia tsüya.

⁹ Siro nie donu supuonie puo nuoe niekhrüda cha ro, ketsie pie puo tsüya ga?

¹⁰ Morei puo khuo cha ro tinyhü chüpie puo tsüya ga?

¹¹ Nieko themia kesuomia zorei mha kevi pie nie nuonuo ketsü do siya ro teigei keba nie Puoue mha kevi pie mia puo ki chayakezhako tsü sa phi motuo me?

¹² “Süla mia nie gei kedipuo chüshü ro nie nei shiü nie rei mia gei sükemhie chüliecie; kekreilamonyü thezho-u mu siedzekesiko sü hauha zocü la.

Kharu Kemereu

¹³ “Nieko kharu kemereu ze lelie; kekreilamonyü keka nu voyakezha kharuu meya mu cha süu rüü, tsiu themia kekra süu ze voya.

¹⁴ Derei kerhei nu kevo kharuu mere tsiu sünu voketuo chau re, mu mia huoyo rübei süu ngulieyakezha zo.

Seibo mu Puosi

¹⁵ “Ketijü siedzekesiko la nie kireiliecie, süko tekuo pfhenei se di nie ki vorzhie, derei uko nou we mha tekecü socie kro puo zo.

¹⁶ Nieko uko si geinu uko silietuo. Zohubo geinu khubesi rielie, morei kikhahubo geinu chiedesi rielieya me?

¹⁷ Sütuoi sei kevi kheko puo si kevi vülieya, derei sei kesuo khe puo si kesuo vütaya.

¹⁸ Seibo kevi puorei puosi kesuo vütalie kenjü, mu sei kesuo puorei puosi kevi vülie kenjü.

¹⁹ Seibo kehoupuorei puosi kevi vülieyakemo-u wiwa di kelhoupie mi nu shüwaya.

²⁰ Sükemhie uko si geinu nie uko silietuo.

A Mhakipuorei Nie Si Mowe

²¹ “A üse, ‘Niepuu, Niepuu’ idi kieyakezha pete teigei kedi nu le phrelie lho, derei teigei keba a Puou medoko chüyakezhamia zotuo.

²² Teisozha sünhie mia kekra a ki, ‘Niepuu, Niepuu hie n za se siedzedie pu mo me? Mu hie n za se terhuokesuoko whuo mo me? Mu hie n za se kekuo kezha chü phi mo me?’ isi sietuo.

²³ Sitse a uko ki, ‘A mhakipuorei nie si mowe; nieko mha kesuo kechüko, tuo a therhietacie’, sitatuo.”

Kerünyü mu Chüüzekelie

²⁴ “Süla kehoupuorei a die hako rünyülie di süko chüüzeyakezhamia sü mhakesikelemia puoe tsiekrie geinu puo ki chükelieu mhie zo.

²⁵ Süsie teirü tsur, dzü di sier, mu tei rei rükhrie vor ki süu va, derei puo vatsholie mota, kekreilamonyü ki süu tsiekrie geinu puo mvüdzekelie la.

²⁶ Derei kehoupuorei a die hako rünyülie di süko chüüzeya kemomia sü mhalekemomia puo huocanyo geinu puo ki chükelieu mhie zo.

²⁷ Teirü tsur, mu dzü di sier, tsiu tei rei rükhrie vor ki süu va; sidi süu vatshopie kerhepha zopie zhüwata.”

²⁸ Siro Jisu süko pu theshü tse themia krokoe puo kepetha die la u ngota,

²⁹ kekreilamonyü puo uko donu thezhokepethamia mhie monyü u kekuo kenyimia mhie uko pethatakecü la.