Mathi 5 - Angami Naga CL (Re-edited) Bible (BSI)

Jisu Kijüthou geinu Mia Pethakecü

¹ Siro Jisu themia kroko ngushü di kijüthou gei khota; sidi puo kho balie tse, puoe pethakelieko puo ki vor.

² Sitse puo uko pethavü, di sie:

³ “Ruopfü kitsa ketsopfhüko thejakepfütho, kekreilamonyü teigei kedi süko vie zokecü la.

⁴ “Krayakezhako thejakepfütho, kekreilamonyü süko u nouluolie zotuokecü la.

⁵ “Kemiako kemoko thejakepfütho, kekreilamonyü süko kijüu pie u vie chü zotuokecü la.

⁶ “Kemiatho dze pfhü keterhükemerü chüyakezhako thejakepfütho, kekreilamonyü süko pevülie zotuokecü la.

⁷ “Mia ngumezhieyakezhako thejakepfütho, kekreilamonyü süko rei ngukemezhie ngulie zotuokecü la.

⁸ “U nou kemesako thejakepfütho, kekreilamonyü süko Ukepenuopfü ngu zotuokecü la.

⁹ “Vitho la mhachüyakezhako thejakepfütho, kekreilamonyü süko üse Ukepenuopfü nuonuo üdi kie zotuokecü la.

¹⁰ “Kemiatho la mia bu u peseyakezhako thejakepfütho, kekreilamonyü teigei kedi süko vie zokecü la.

¹¹ “A la mia nieko tha tsiu nie pese mu tijü di nie gei die kesuo neiüko pu ro nieko thejakepfütho.

¹² Nie neilie mu nie neithor zolie, kekreilamonyü teigei nie zhakhra vi se zotuokecü la, sütuoi mia thiedzü nie mhodzü ketuo siedzekesiko rei pese phi zo.

Metsie mu Kezie

¹³ “Niekoe kijü tsie zo, derei metsie puo kelhe jüta ro, kedipuo pie chü pelhelie ta? Süu kemethuo chütaya, sidi kelhouwa di mia bu kedekewa zotaya.

¹⁴ “Niekoe kijü kezie zo, kijüthou gei keba nadiu mia puo ngu motalie lho.

¹⁵ Miapuorei mibou petulie di pie bie khro baya mo, derei pie mituba gei baya; siliro süu kinu kebako pete va pezielieya.

¹⁶ Sütuoi mia bu nie mhatho kevi ngu di teigei keba nieko Puou tshelieketuo la nie kezie pie mia va pezieliecie.”

Thezho-u Dze Pethakecü

¹⁷ Nieko a ü Mosa zho-u mu siedzekesiko dieko bie pejüwatuoü vorkecü le hiecie, a süko bie pejüwatuoü monyü süko chü tseishütuoü kevor zo.

¹⁸ Siro a nieko ki pu toushütuo, tei mu kijü jüta kemochie, mha hako peteko chü tseiwa kemochie thezho-u nunu leshükhu puo, “i” yo rei jütalie lho zo.

¹⁹ Süla kehoupuorei u bu diekhakeshü zho kecütho yopuo zorei chüüze mo, tsiu kekreimia bu rei chü hienu pethaya ro, teigei kedi nu puo üse kecütho chütuo, derei kehoupuorei süko chüüze mu pie mia pethaya ro, teigei kedi nu puo üse kezha chütuo.

²⁰ Kekreilamonyü a nieko ki pu toushütuo, nie thezhokepethako mu Farisiko ki miathokuo moliro, nie mhakipuorei teigei kedi nu lelie kenjü zo.

Noupfhünouyie Dze Pethakecü

²¹ “Nieko thiedzü, ‘No mia dukhri lho;’ mu ‘Kehoupuorei mia dukhrikezhamia siazha ngu zotuo’, idi kepu silieta die.

²² Derei a nieko ki pushütuo, nie kehoupuorei puo siezedzüriemia ngu puo nou meyie ro puo siazha ngulie sü zo, tsiu kehoupuorei puo siezedzüriemia kengashü ro, pehüko kehou nu siazha ngulie vi zo; mu mhanuü kehoupuorei mia ki, ‘No kenyamia zo’, iliro mizie nu siazha ngulie vi zo.

²³ Süla no mha se ruosuoba nu kevo ki n siezedzüriemia n gei kenyakecü die huo keba n sie lelie ro,

²⁴ mha se kevoko khapie ruosuobau mhodzünu zhüwa di vo n siezedzüriemia ze kezevi lalie perie di süze vor mha süko khashüliecie.

²⁵ No dienyaki nu kevo cha nu tuoluocü nu n ze kenyakezhau ze kezevi mhaiwalie; moliro n gei kenyakezhau n tepie capiu tsüwatuo, mu capiu n tepie kezhau dzie nu shüwa di n khapie kedieki nu shüwatuo.

²⁶ A n ki pu toushütuo, no vo priesa yopuo ketso rei su tseiwa kemochie n bu sünunu parlie kenjütatuo.

Pieü Chü Hienukecü

²⁷ “ ‘No pieü chü lho,’ idi pupie kezhü no silieta die.

²⁸ Derei a tsie nieko ki pushütuo, kehoupuorei thenumia mengu di puo meho ro, puo puo nou nu süpfü ze pieü chüwata zo.

²⁹ Süla n mhi n zatsa n chü kephouma ro; n geinu kerülapie kelhouwacie, n mo peteu kelhoupie Gehena nu shükewau ki rei n mo gei za puo jüketa we vikuo.

³⁰ Mhanuü n dzie n zatsa n chü kephouma ro, süu da kelhouwacie; n mo peteu kelhoupie Gehena nu shükewau ki rei n mo za puo jüketa we vikuotuo.

Kekhokevakecü Dze Kepetha

³¹ “ ‘Siro themia kehoupuorei puo kimia khawatuo liro, puo khakewa leshü thupie puo kimia tsüwa morosuo’, ikecü rei pu die.

³² Derei a nieko ki pushütuo, kehoupuorei pieüpiera la zo kemosie puo kimia khawa ro, puo pie pieü kechümiapfü chüwata zo; mu kehoupuorei mia puo khakewapfü lie ro, puo rei pieü chüta zo.

Rüse Dze Kepetha

³³ “Süsie rei, ‘No tijü di rüse hie, derei no mhapuo chütuo üdi Niepuu ki phrashüwaketau chülie,’ idi thiedzü pukeshüu nieko silieta die.

³⁴ Derei a nieko ki pushütuo, mhapuorei pu rüse hie; tei rei, süue Ukepenuopfü kediba zocü la,

³⁵ morei kijü rei, süusü puo phipra zokecü la, morei Jerusalem rei, süue kedi kezhau nadi zokecü la.

³⁶ Tsiu nie tsü rei, nie-e nie thaprü puorei chü pekra morei peteilie kelho la.

³⁷ Derei nie die bu ‘U’ ro ‘U’ ülie ‘Mo’ ro ‘Mo’ ülie, mo di süu zieta ro kesuou kinu zo.

Khepukelie Dze

³⁸ “Nieko ‘Mhi puo khe mhi puo, mu hu puo khe hu puo,’ idi pukeshü silieta die.

³⁹ Derei a nie ki pushütuo, kesuo kechümia mese chü hie, sikecüumonyü miapuonie n dzo n zatsa vü ro, kekreitsa rei kerei lapie puo tsücie;

⁴⁰ mu mhanuü miapuonie n boulie lielie nyü di n ze kenyatuoüta ro n pfhe rei khashüwacie;

⁴¹ mu miapuonie n kemvü chü di n ze maildo puo votuo üro, puo ze kenie rei vocie,

⁴² kehoupuorei n ki mhacha ro kha puo tsücie, mu no mia n ki mha thepu nyü ro, puo melie hie.

U Ngumvümia Khrielienukecü

⁴³ “Siro thiedzü ‘N siezanuomia khrielie mu n ngumvümia ngumecülie,’ idi kepu nie silieta die.

⁴⁴ Derei a nieko ki pushütuo, Nie ngumvümia khrielie, mu nie peseyakezhako la chalie,

⁴⁵ silie ro nieko teigei keba nie Puou nuonuoko chülietuo; kekreilamonyü puoe puo niaki pethupie kesuomia mu kevimia rei vashüya, mu tei perüpie kemiathomia tsiu miatho kemomia rei vashüyakezha la.

⁴⁶ Kekreilamonyü mhanuü nie mia nie khriekezhako khrieyakezha zo liro, nieko kedipuo zhakhra ngulie ta? Khezhanuo kekhruoko rei sükemhie chüya mo üme?

⁴⁷ Siro nieko nie siezedzüriemia rübei kelukezha zo liro, Judakemomia zorei sükemhie chüya zo mo üme?

⁴⁸ Süla teigei keba nieko Puou vi tseikecü tuoi nieko rei vi tseiliecie.