Mathi 4 - Angami Naga CL (Re-edited) Bible (BSI)

Jisu Kedokecü

¹ Süsie Ruopfüue Jisu hü ze rayha nu vota, Satan bu puo kedotuo üdi.

² Siro puo teisozha hiedia mu teizeizha hiedia mevo tuota, süla puo va merüta.

³ Sitse kedokecüu vor di sie puo ki, “No Ukepenuopfü Nuou üro, ketsie hako ki pushü di uko bu niekhrüda meviliecie,” sita.

⁴ Derei puo sie, “ ‘Themia niekhrüda rübei la zomonyü Kepenuopfü tie nunu kepar die kehoupuo la rei rheilie zotuo,’ ikecü thupie zhü.”

⁵ Süsie Satan puo ze kemesa nadiu nu vo di puo bu rüsuokiu tsüle gei balie,

⁶ di sie puo ki, “No Kepenuopfü Nuou üro, n thuo hageinu tetsucie; kekreilamonyü, ‘Puo n la puo dieliemia ketseshütuo;’ tsiu ‘Süko u dzie pie n mezalietuo, sidi n bu tsu ketsie geinu n phi zorei kesewa molietuo,’ icü thupie kezhü la.”

⁷ Sitse Jisu puo ki, “ ‘No Niepuu n Kepenuopfü kedo lho,’ sikecü rei thupie zhü zo.”

⁸ Süsie Satan puo ze kijüthou kerükrie se puo gei vo di kijü nu kedirüvie vithedze chü zokecü pete tha puo kie;

⁹ sidi sie, “No tsu a rüsuo ro, a mha hako pete pie n tsüwatuo.”

¹⁰ Sitse Jisu puo ki, “No tuotaliecie, Satan! Kekreilamonyü, ‘No Niepuu n Kepenuopfü rüsuo mu puo lie rübei chücü zotuo,’ sikecü thupie kezhü la.”

¹¹ Sitse Satan puo khawata, siro teigeidielieko mhai vor puo meholieta.

Galil nu Jisu Mhatho Therieko

¹² Siro Jisue mia Johan telieketa sishü tse, puo tuo rüdi Galil nu vota.

¹³ Puo Nazaret khawa di vo Zebulun mu Naftali kijütsa dzükezha khie keba Kapernaum nu lhouta,

¹⁴ mha hau chüketa thiedzü siedzekesiu Isaya geinu:

¹⁵ “Zebulun kijü nu, Naftali kijü, dzükezha khie kezhü chau, Jordan rü khie lutsatie kebanie, Galil, Judakemoko kijüu,

¹⁶ Kezeiu nu ketuo themiako, kezie kezha puo ngushüte, kesia khrü kijü nu kebako gei zie vorte,” sidi pupie kezhüu tseilieketuo la.

¹⁷ Siro sü yawinu Jisu mia petha sede di, “Nieko nou kediliecie, teigei kedi vor penuotei bate,” si tuota.

Jisu Khuoketemia Dia Kiekelie

¹⁸ Siro puo Galil dzükezha khie tuo vozhü ru siezedzürie kenie, Simon, Pitor üyakezhau, mu puo siezeu Andria unie jal pie dzükezha nu khuo va ba di ngulie, unie khuoketemiacü la.

¹⁹ Sitse puo unie ki, “A siemedziliecie, siro a nnie pie themia ketemia chülietuo.”

²⁰ Sitse unie unie jal kha mhawa di puo siemedzita.

²¹ Siro puo tuo sa phizhü ru siezedzürie kekrei kenie, Zebedi nuo Jakob tsiu Johan, unie-e unie puo Zebedi ze di rouu nu jal pekhuo ba di ngu lalie, mu puo unie kieshü.

²² Sitse unie rou mu unie puo kha mhawa di puo siemedzita.

Jisu Mia Petha mu Chü Keshürhokecü

²³ Süsie Jisu tuo Galil kijü pete nu vo di sinagogko nunu mia petha mu kedi dze dieliekevi pupie mia kie, sidi kechükenyü neiüko pete chü keshürhoshü.

²⁴ Süki mia puo dze pu Siria kijü pete nu keza vota, süla mia kechükenyü neiü chü di kemezhie ketuo pete, terhuo kesuoko bu u kebi zetuoketako, terhuovüzieko mu rünyie tuoketako ze puo ki vor ru puo süko chü keshürhoshü.

²⁵ Sitse Galil, Dekapoli, Jerusalem, Judia mu Jordan rü khie lutsatie keba themia krodi keze puo siemedzita.