Mathi 3 - Angami Naga CL (Re-edited) Bible (BSI)

Johan Mia Dzülukepfüu Kepetha

¹ Süteikiko Johan mia dzülukepfüu vor Judia rayhau nunu mia petha di sie,

² “Nie noukedilie, teigei kedi penuotei vorketa la.”

³ Thiedzü Isaya siedzekesiu mia puo dze pu di sie, “Mia puo rayha nunu shiekhoui di: ‘Nieko Niepuu cha keseliecie, puo chako chü kemezhülie,’ isi ketuo pfheu sü puo zo,” sita.

⁴ Siro Johan-e ut mie se puo pfhenei chü, chüzhü chiepha pie puo chie phapfü, ku mu mepfhidzü se puo ca chü.

⁵ Süki themiako Jerusalem nu, Judia kijü pete nu, mu Jordan merhieko nunu puo ki vor,

⁶ di u kephouma phralie di puo bu Jordan rü nunu dzülu pie uko tsü.

⁷ Derei puo Farisiko mu Sadukimia kekra dzülupfütuoü vorkezhü ngu tse, puo uko ki, “Nieko prielepfü seyieko! Supuonie nieko bu noupfhü nie gei phirtuo ükezhü nunu talienushü ga?

⁸ Süla thenoukedikelie siu bu rüchü parliecie.

⁹ Siro ‘Hie rei Abraham nuo zo’ ikecü putuoü le hiecie; kekreilamonyü a nieko ki pushütuo, Ukepenuopfü ketsie hako geinu Abraham nuonuo pelhoushülie vi zo.

¹⁰ Siro tsie rei seidurü seiboko phi nu zhü zo, süla seibo kehoupuorei puosi kevi vüliekemoko wiwatuo, sidi kelhoupie mi nu shüwatuo.

¹¹ “A we nie bu thenoukedilieketuo la dzü nunu nie dzülu khakeshü zo, derei a sie vorkezhüu we a ki zhakuo; a puo phikou pie reilie sü mo; puoe Kemesa Ruopfü nu mu mi nunu dzülu pie nieko tsütuo.

¹² Puo lieherü puo dzie nu ba, mu puo sieu he kemesa mpouwatuo, sidi puo puo lhako pie telhaki nu kengulietuo, derei puo shübeko we pie mhetalie kelho mi nunu thewatuo.”

Jisu Dzülupfükelie

¹³ Süki Jisu dzülupfütuoü Galil nunu tuo Jordan nu Johan ki vor.

¹⁴ Derei Johan süu chü motuo üdi sie, “A n bu dzülu pie a ketsü mese, derei no a ki vorzhü tele?” sita.

¹⁵ Sirei Jisu sie puo ki, “Tsieu va sishücie; kekreilamonyü kemiatho zho pete chü tseishüketuoe u bu chü kezhüu chülie ro puotou zokecü la.” Süla Johan rei chüshütuo üta.

¹⁶ Siro Jisu dzülupfülie di dzü nunu par mumetha teiko koshü puo tsü, mu Kepenuopfü Ruopfü mekhru tuoi tsur puo gei balie.

¹⁷ Sitse teigei nu mhapfhe puo sie, “Hau a Nuo, a kekhrietho-u, a puo ngu a neithor zo,” isi.