Mathi 28 - Angami Naga CL (Re-edited) Bible (BSI)

Jisu Rheilasieketa

¹ Siro sabat tseita di zhadoudo zha therie nhie teisotie ki Magdalapfü Maria mu Maria kekreipfü unie mekhru mehotuoü vo.

² Sitse süki kiükishü kemerie chü mhai vorta; siro Niepuu dieliemia puo teigei nu tsur di ketsieu phou ketouwa di sügei bata.

³ Puo ngupie teikemela tuoi mu puo pfhenei krapie pekrie tuoi.

⁴ Siro rükhouko u michie pfü pe zo di kesiamia mhiepfü zhüta.

⁵ Derei teigeidielieu thenunie ki, “Michie hiecie; a nnie-e mia puo gouwaketau Jisu pfhü tuokecü si ba.

⁶ Puo haki zhü mote; kekreilamonyü puo pukeshü tuoi rheilasiete. Vor di puo kezhü chüu mehocie.

⁷ Sidi rükri vo puoe pethakelieko ki, ‘Puo kesia nunu rheilasiete, mu puo nieko mhodzü rie tuo Galil nu votazhie; mu nieko sünunu puo ngulietuo ho,’ sishücie. Harie, a nnie ki pushüte ho.”

⁸ Süla unie michie mu unie neipie mhapuochü di tuo kenourhei mekhru cie pra di süko pie puoe pethakelieko ki putuoü ta vota.

⁹ Sitse Jisu unie ze keselie di sie, “Keviu chüliecie!” Sitse unie puo ki phir puo phi bie di puo rüsuota.

¹⁰ Siro Jisu sie unie ki, “Nnie michie hiecie; vo a siezeko bu Galil nu volienushücie, uko sünunu a ngulietuo ho,” sita.

Rükhoumia Kinu Dielie

¹¹ Siro unie cha nu tuoluocü nu, rükhouko huomia rünau nu vo di zievokezhako ki mhachüketa pete puwata.

¹² Süki zievoko vo phichüko ze kepfhülie, sidi raka kekra pie chüpahiko tsüwaketuo kerüchülie,

¹³ sidi sie uko ki, “Nieko sie, ‘Puoe pethakelieko thuo theva ze vor di hie zekezhü nu puo rügupietewe,’ iliecie.

¹⁴ Mu die hau kezhau nyie nu volie liro, hie thuo puo rüchülietuo; sidi nie bu nie nou kemezhie molietuo,” sishü.

¹⁵ Süla uko rakako lielie di uko ki pukeshü kemhie chüta; siro thedze hau thie ketso rei Judamia donu kepu vorzhü zo.

Jisue Pethakelieko Pengu Lakeshü

¹⁶ Sirei pethakelie kerepuokrüko Galil nu vo, sidi Jisue uko ki kepu tuoi kijüthouu gei vota.

¹⁷ Siro uko puo ngulie tse uko puo rüsuota, derei huomia kenoudota.

¹⁸ Ru Jisu vor di sie uko ki, “Teigei rei mu kijü rei kekuo pete pie a tsüwate.

¹⁹ Süla tuo vo di seyie neiüko pete chüpie pethakeliemia chüliecie, Puou mu Nuou, mu Kemesa Ruopfüu za nunu süko dzülu khashü,

²⁰ di uko bu a nieko ki pukeshüko pete chüüzelieketuo la uko pethashüliecie. Siro harie, a puotei thela ketso rei nieko ze sei tuo zotuowe!” sita.