Mathi 27 - Angami Naga CL (Re-edited) Bible (BSI)

Jisu Ze Pilat Mhodzünu Kevo

¹ Siro teisolie tse zievokezhako mu phichüko pete Jisu ngumvü di puo dukhriwaketuo doko rhüta.

² Sidi uko puo phalie di puo ze vo ahng Pilat dzie nu shüwata.

Judas Se

³ Siro Judas, puo tekeshüu, mia Jisu pejowaketa ngu di puo nou rüdita sidi raka serko toupie zievokezhako mu phichüko ki la vor.

⁴ Sidi sie, “Kejo kejümia puo zie ma pielieketa ha a phoumawate!” sita. Derei uko sie, “Süu hieko la kedipuo mu! N thuo leliecie.”

⁵ Sitse puo rakako kelhoupie rüsuoki nu shüwa, sidi tuota; sidi puo thuo vo kerüchakhriwa.

⁶ Siro zievokezhako rakako chülie di sie, “Hako thezie ma zokecü la khapie kinyibouu nu shüketuo puotou mote.”

⁷ Sidi uko kerüchü di süko pie litho-u kijü khrülie di sünunu chazoumia kekhru chü chüwa.

⁸ Süla thie ketso rei lie süu üse Thezie Lieu ütuota.

⁹ Sidi thiedzü siedzekesiu Jeremia pukeshü, “Israelmiako mia puoma mejükeshü tuoi,

¹⁰ sidi Niepuu pukeshü tuoi, uko raka serko se vo litho-u lie khrülie,” ikeshüu chü tseilie.

Pilat Jisu Ketsokecü

¹¹ Siro Jisu ze vo ahng mhodzünu thalie tse, süu puo ki, “No Judako kediu me?” Sitse Jisu sie “No pushüwata zo,” si.

¹² Derei puo zievokezhako mu phichüko puo kepejotsa la mhapuorei pu mo.

¹³ Sitse Pilat sie, “Mia mha hathede se n pejo ketha no si mo me?”

¹⁴ Derei puo dieca puorei pu süu kelashü mota, süla ahng bu puo ngo seta.

Jisu Dukhriwanukeshü

¹⁵ Siro thenyi süu nu ahng bu mechüue kediemia puo chaketau khakeshü zho puo nyiya.

¹⁶ Süki Barabas ükecü kediemia mechü si puo ba.

¹⁷ Süla uko vo kengulie tse, Pilat sie uko ki, “A bu supuo khashü nieko tsü nyüya ga? Barabas tuo mo, Khrista ükezha Jisu tuo ga?”

¹⁸ Kekreilamonyü uko puo ngu u rokecü la puo khapie sünu shü zokecü puo si keba la.

¹⁹ Siro puo dienya bau gei keba ki, puo kimia dielie ketsepie puo ki shü di, “No themia kemezhü hau gei mhapuorei chü hiecie, kekreilamonyü a puo pema di thie kemezhie phi baketa la,” si.

²⁰ Siro zievokezhako mu phichüko themia krodiu ketshüpie uko bu Barabas chalie mu Jisu dukhriwanushü.

²¹ Derei ahng sie uko ki, “A bu hanie kiu khashü nieko ketsü nie medo ga?” si lashü. Sitse uko sie, “Barabas tuo.”

²² Sitse Pilat sie, uko ki, “Siüro a bu Khrista üyakezha Jisu pie kedipuo chü ta?” Sitse uko pete sie, “Puo gouwalie!” ita.

²³ Siro Pilat la sie, “Puo mha kesuo kikecüpuo chüwata di ga?” Derei uko shie u rhiechükuo di sie, “Puo gouwalie!” ita.

²⁴ Siro Pilat mhapuorei chü salie kenjüketa ngulie, tsiu mha kebvü kra miemie sierketa la krodiu mhodzü nunu dzü pie puo dzie metei di sie, “A themia hau zie tsatie la we jo mo zo ho; hau nie thuo leliecie.”

²⁵ Sitse themia peteko puo die kela di sie, “Puo zie bu hie gei mu hie nuonuoko gei rei pfürtacie!” sita.

²⁶ Süla puo Barabas khapie uko tsüwa; mu Jisu vüwa di gouwaketuo la khashü uko tsüwa.

Chüpahiko Jisu pie Kethekrekecü

²⁷ Sitse ahng chüpahikoe Jisu ze mechübouu nu leta, sidi uko kro-u pete vor puo houpfülie.

²⁸ Sidi uko puo pfheneiu lhewa di puo bu pfhenei kemerie puo selie,

²⁹ siro zohu kechiepie tsüre chülie di süu pie puotsü gei shü. Siro uko tekhriethe pie puo dzie puo zatsa shü, sidi puo mhodzünu khoutoutsu, puo kre di sie, “Judako kediu bu keviu chüliecie!” sita.

³⁰ Siro uko puo mho mhitsie, tsiu tekhriethe pie puo tsü vü.

³¹ Sidi uko puo pie kethekre lotsowa tse pfheu lhewa di puo pfheneiu pie puo whe lashü. Süsie uko puo gouwatuo üdi puo ze tuota.

Jisu pie Goukewa

³² Sidi uko tuo prazhü tse, Kurinmia puo puo za Simon ükecü puo ngulie, sitse uko puo kemvü chüpie puo bu krus-u pielie.

³³ Süsie uko Golgatha (puoca mia Tsütsoru) ükecü thechü puo nu vorlie,

³⁴ siro uko puo bu krienu di mha kepfhü sa pie zu reilie di pie puo tsü; derei puo süu methakeshü sie krie mvüta.

³⁵ Siro uko krus geinu puo gouwa di dape di puo pfheneiko kezalieta;

³⁶ süsie uko süki ba di puo pfhe bata.

³⁷ Siro uko puo tsü ki puo kepejo die puo thu sakeshü, “Hauha Judako kediu Jisu,” isi.

³⁸ Siro mia vie sekecümia kenie, mia puoe puo vitsa mu mia puo puo zatsa idi gou.

³⁹ Siro süu ciekevoko tsüge puo kenga,

⁴⁰ di sie, “No rüsuokiu bierhuowa di zha se donu chü lashüketuou, n thuo n kelaliecie; no Ukepenuopfü Nuou üro, krus geinu kerlie!” ita.

⁴¹ Sükemhie zievokezhako mu thezhokepethako, tsiu phichüko rei puo pie kethekre di sie,

⁴² “Puo kekreimia we kelalie, derei puo thuo puo kelalie kenjüte ha! Puo Israelko kediu mo üme? Puo bu krus geinu kerlie ro, hie rei puo pelelietuo.

⁴³ Puoe Ukepenuopfü pele vor; süla tsie Ukepenuopfü bu puo kelaliecie; puo medotuo üro, kekreilamonyü puoe sie, ‘A Kepenuopfü Nuou,’ iya.”

⁴⁴ Siro puo sa goukewa mia vie sekecünie rei süsütuoi puo kenga.

Jisu Se

⁴⁵ Siro sünhiesü khinhieluo keba kerekenie nunu vo thehesie keba se ketso kijü pete zeiboui bata.

⁴⁶ Siro bavüdo seu meseki Jisu shiekhoui di, “Eloi, Eloi, lama sabakthani?” sita, süu ca, “A Kepenuopfü, a Kepenuopfü no kiüdi a khawata ga?”

⁴⁷ Sitse süki ketha huomia süu si di sie, “Puo Elija kiezhie!”

⁴⁸ Sitse uko mia puo ta mha vo sponj puo nu kekhrodzü petselie, di süu pie tekhrie puo gei shülie di puo bu krienu pie puo tsü.

⁴⁹ Derei kekreiko sie, “Hieluo, Elija vor di puo kelashütuo mo lhe shiü meho ba khe,” sita.

⁵⁰ Sirei Jisu melie shiekhoui lashü di puo ruopfü khashüwa.

⁵¹ Süsie rüsuoki nu pfhe lhapiekezhau puo tsügei nu rürha tsu puo thotsü tso di rürha kenie chüta. Tsiu kiükishüta mu ketsie rei prokrakrata.

⁵² Siro mekhruko cie parta; mu siakezhü kemesako mo kekra rheilasieta.

⁵³ Siro puo rheilasieketa sie süko mekhru nunu par di tuose kemesa nadi nu le di mia kekra bu uko ngu.

⁵⁴ Siro süki kriemhokezhau mu puo ze Jisu pfhe ketha chüpahiko kiükishüketa mu mhachüketako pete ngu di michie phita, di sie, “Hau Ukepenuopfü Nuou ketho zo!” sita.

⁵⁵ Siro sükisü Galil nunu Jisu siemedzi di puo khruohi tuoketa thenumia kekra rei kepecie nu mha süko meho tha.

⁵⁶ Süko donu Magdalapfü Maria, Jakob mu Josef unie zuo Maria mu Zebedi nuonie zuopfü rei sa tha.

Jisu pie Khrukewa

⁵⁷ Thevatieta tse Arimathia nunu kevor puo za Josef ükecü kenyimia puo vor, puo rei Jisue pethalieketamia puo.

⁵⁸ Puo Pilat ki vo di Jisu mo-u cha; sitse Pilat mia bu themo-u pie puo tsünushü.

⁵⁹ Süsie Josef themo-u pielie di linen pfhe kemesa puo pie süu kezülie.

⁶⁰ Sidi puoe süu pie puo thuo puo mekhru kesa puo ketsie ho di chüpie kezhüu nu shüwa. Sidi puo ketsie kezha puo ketoupie mekhru süu kikha nu mekawa di tuota.

⁶¹ Siro Magdalapfü Maria, mu Maria kekreipfü rei vo mekhru süu mhodzütsa ba.

Rükhoumia bu Mekhru Pfhe Keba

⁶² Siro süsienhie, puoca Mhakesekezhau sienhie zievokezhako mu Farisiko keze vo Pilat ze kese,

⁶³ di sie, “Kezhau, mha setuoyakezha hau puo kerhei ki pukecü ‘A zha se sie rheilasielietuo,’ icü dieu hie rükraliete.

⁶⁴ Süla, zha se ketso puo mekhruu pfhe menuo balieketuo la, no die khashüwacie, sidi puoe pethakelieko bu themo-u rügupieta di themiako ki, ‘Puo kesia nunu rheilasiete,’ ita molieketuo la, moro kemeda thela hau therieu ki rei suokuotatie ru.”

⁶⁵ Sitse Pilat uko ki, “Nieko thuo rükhoumia khapie bawalie di pfhe menuolie kevi chie pfhe menuoliecie,” sita.

⁶⁶ Süla uko vo di ketsieu gei zasi vüwa mu rükhoumia khapie mekhruu pfhe bata.