Mathi 26 - Angami Naga CL (Re-edited) Bible (BSI)

Jisu gei Ngumvü do Rhükecü

¹ Siro Jisu mha hako pete pie mia pethashükewa sie, puoe sie pethakelieko ki,

² “Zha kenie sie Ciekevonyi nyitaketuo nieko rei si ba, mu mia bu puo gouwaketuo la Themia Nuou tepie mia dzie nu shüwatuo.”

³ Süki zievokezhako mu thezhokepethako, siro phichüko keze vo Kaifa ükecü zievokezhatho-u kitiezha nu kengulie;

⁴ sidi uko pekhre di Jisu tepie dukhriwaketuo do rhü.

⁵ Derei uko sie, “Thenyi ki suo, themiako mha kebvü sierta rei silie lhomu.”

Bethani nu Tier pie Jisu Kenhekecü

⁶ Siro Jisu vo Bethani nu mpa kechüu Simon kinu ba,

⁷ süki puo mhacütuoü ba ru thenumiapfü puo tier puoma kerethopfü, alabaster bou puo ketshu se vor, di süu rupie puo tsügei shü.

⁸ Sitse pethakelieko süu ngu di uko nou kekrüta, di sie, “Kiüdi mha haicü pekaya ga?

⁹ Kekreilamonyü tier hau puoma vi phicü nu zelie di raka süko pie kejüketsopfhümia tsülie vi ze!”

¹⁰ Derei Jisu süu silie di sie uko ki, “Nieko kiüdi thenu hapfü kebvüya ga? Puo a gei mha kevi phi puo chüshü zo.

¹¹ Kejümia nie ze sei batuo, derei nieko a ze sei balie lho.

¹² Puo tier hau rupie a mo-u gei shükecü ha a kekhru nyieu keseshüwata zo.

¹³ A nieko ki pu toushütuo, kijü pete nu dieliekevi hau pu mia kiekecü kheko nu thenu hapfü rükra tuoketuo la puo chükeshü dze rei sa pu tuo zotuo.”

Judas Jisu Tekeshü Puo Medokelie

¹⁴ Siro kerekenieko donu mia puo, Judas Iskariot üyakezhau, zievokezhako ki vo;

¹⁵ sidi sie, “A puo tepie nieko dzie nu shü ro nieko kedipuo pie a tsütuo ga?” Sitse uko raka ser phrüpie puo tsüwa.

¹⁶ Siro süyawinu puoe puo tepie uko dzie nu shütuo ükecü rü terü tuota.

Pethakelieko Ze Ciekevonyi Nyikecü

¹⁷ Siro Khreiüshükemo Niekhrüdanyiu zha therie nhie pethakelieko Jisu ki vor di sie, “No hieko bu n la kirapuo nu Ciekevonyiu nyiketuo la mha kese nyüya ga?”

¹⁸ Sitse puo sie, “Nieko nadiu nu mia puo ki vo di puo ki, ‘Kepethaue puya, A teiu penuo bate; a ae pethakelieko ze di n ki nu Ciekevonyi nyitieyalie,’ isicie.”

¹⁹ Sitse pethakelieko Jisu uko ki pukeshü tuoi di Ciekevonyiu la mha keselie.

²⁰ Siro thevatieta tse, puoe kerekenieko ze balie;

²¹ sidi uko mhacü keba ki, puo sie, “A nieko ki pu toushütuo, nieko mia puo a teshütuo.”

²² Sitse uko u nousuo phi di sie, “Niepuu, süu a me?” isi phreta.

²³ Sitse puo la sie, “Mia puo a ze puo dzie pie mekhou nu keshüu thuo a teshütuo.

²⁴ Themia Nuou sü puo dze thupie kezhü tuoi tuotatuo üzhie, derei Themia Nuou tepie mia dzie nu keshüu we ce, chülietie! Themia süu la we penuo vor kemoe puo dze vikuotuo.”

²⁵ Sitse puo teshütuoü kebau Judas sie puo ki, “Rabi, süu a me?” Sitse puo sie, “No pushüwata zo.”

Niepuu Kerükra Ca

²⁶ Siro uko mhacü keba nu Jisu niekhrüda chülie di jashü mu bietshielie, di khapie pethakelieko tsü di sie, “Liepie cücie; hauha a mo zo,” si.

²⁷ Süsie puo tehieu rei pielie, di jashü di khapie uko tsü di sie, “Nieko hau krie phrecie;

²⁸ kekreilamonyü hauha themia kekra kephouma valieketuo la kru kepar dietseidiekhokelie a zie zo.

²⁹ A nieko ki pushütuo, a a Puou kedi nu nieko ze di khubedzü kesa krieketuo zhau tsolie kemochie mhakipuorei a khubedzü hau krie salie lhote,” sita.

³⁰ Süsie uko keze tsali puo chülie di tuo Oliv Kijüthou gei vota.

Jisu Pedzü Pitor Puo Melietaketuo Pukeshü

³¹ Siro Jisu uko ki, “Tsiezhü nieko pete a khawa di tatatuo; kekreilamonyü süu dze, ‘A kuopfheu vüshütuo, sitse tekuokro-u ta cüretatuo,’ isikecü thupie kezhü la.

³² Derei a rhei lakelie sie, a nieko mhodzü rie Galil nu votatuo.”

³³ Sitse Pitor sie puo ki, “Mia pete n khawa di tata zorei, a we silie lho zo!”

³⁴ Sitse Jisu sie puo ki, “A n ki pu toushütuo, tsiezhü thevü kekhou mhodzü no va se a melietatuo.”

³⁵ Sitse Pitor sie, “A bu n ze siatuo ürei a n melietalie lho zo.” Siru pethakelie kekreiko pete rei sükemhie pu phreta.

Jisu Gethsemane nunu Chakecü

³⁶ Süsie Jisu uko ze Gethsemane ükecü thechü puo nu vo di puoe pethakelieko ki, “A luki phi kecha chü keba ki nieko haki balie.”

³⁷ Sidi puo Pitor tsiu Zebedi nuonie ze vota, di puo nou kemezhie mu puo nou kehoukeruo chüta.

³⁸ Sitse puo sie uko ki, “A nou kemezhiepie siatatuoü batemu, nieko haki ba di a ze pfhe baliecie.”

³⁹ Sidi puo tuo za phi di zeretsu kecha chü di, “A Puo, chülie vituo liro, tehie hau bu a thertacie; derei a medo kemhie monyü n medo-u chüliecie,” si.

⁴⁰ Süsie puo tuo pethakelieko ki phir ru uko zezhü di ngulie, sitse puo sie Pitor ki, “Nieko bavüdo puo la rei a ze pfhe balie lhote me?

⁴¹ Nieko dophi nu leta molieketuo la cha mu pfheüla ba zoliecie; ruopfü kitsa we chü nyü tuo zo, derei chüüphou we thachü,” sita.

⁴² Siro puo süsieu va rei tuo la phi kecha chü di, “A Puo, mhanuü a bu hau krie molie lho üro, n medo-u chüliecie.”

⁴³ Sidi puo tuo la phir ru uko ze ba di ngulie; uko mhirholie lho ba zoketa la.

⁴⁴ Süsie puo uko khawa di va seu chatuoü la phi di khinyhü die kemhieko se cha lashü.

⁴⁵ Sitse puo tuo pethakelieko ki phir di sie, “Nieko tsie rei ze mu rülei ba zo me? Harie, puotei tsote, mu Themia Nuou tepie kephoumako dzie nu shüwatuoü bate.

⁴⁶ Sielie, di úko tuota khe. Harie a teshüketuou vor haki thate!” sishü.

Jisu Tekelie

⁴⁷ Siro puo die pu ketha nu, kerekenieko donu mia puo Judas-e zievokezhako tsiu phichükoe ketsekeshü zhiecha mu seideko piekecü mia krodi puo ze vorta.

⁴⁸ Siro puo teshüketuou zasi puo pie uko tsü di sie, “A puo meboshüketuou süu puo zo ho; puo teliecie.”

⁴⁹ Sitse puo mha zo Jisu ki phi di sie, “Keviu chüliecie, Rabi!” sishü di puo meboshü.

⁵⁰ Sitse Jisu sie puo ki, “A zeu, no chütuoü kevor-u chüliecie,” si. Süsie uko vor Jisu merhashülie di puo telie.

⁵¹ Süki Jisu ze ketuoko mia puoe puo zhiecha zou mhai sie zievokezhatho-u kituou du di puo nyieto metakreiwa.

⁵² Sitse Jisu sie puo ki, “N zhiecha pie puo kou nu shüwalie! Kekreilamonyü zhiecha pieyakezhamia pete zhiecha geinu katatuo.

⁵³ A a Puou ki cha ro puoe dieliemia legion kerekenie kezie rei ketseshülieketuo no si mo me?

⁵⁴ Derei süu sita ro, kikidi Kethodieko nu hau chü morosuo üdi pupie kezhüu chü tseilietuo di mu?” ita.

⁵⁵ Sümeseki Jisu themia kroko üse, “Nieko a ü mia vie sekecümia puo tuoi zhiecha mu seideko pie di a tetuoü vorzhü te le? A teisonhie rüsuoki nu ba di mia petha baya zo, nieko süki a te mo ze.

⁵⁶ Derei mha hako pete chüketa ha siedzekesikoe Kethodieko nu thupie kezhüko chü tseilieketuo la zo.” Süsie pethakelieko pete puo khawa di tata.

Mechükehouu nu Jisu Ketsokecü

⁵⁷ Süsie Jisu tekeliekoe puo ze thezhokepethako mu phichüko vo kengu keba zievokezhatho-u Kaifa kinu vota.

⁵⁸ Siro Pitor puo tso penuo mo di puo siemedzi zo zievokezhatho-u kifükhro ketso vo, tsiu puo thela nu kedipuo chütatuo shicüko mehotuoü le kepfhemiako ze balie.

⁵⁹ Süki zievokezhako mu phichüko kehou pete rei Jisu dukhriwaketuo la puo gei ketijü zhapu pfhü sie,

⁶⁰ derei ketijü zhapu kekra vor zorei die puotou puorei ngulie mota. Si ba di kenuotsa mia kenie vor,

⁶¹ sidi sie, “Themia hau pukecü, ‘A Ukepenuopfü rüsuokiu bierhuowa di zha se nu chü lalie vi,’ isiwe.”

⁶² Sitse zievokezhatho-u siethalie di sie, “No mhapuorei pu lho me? Hako kedipuopuo pu n pejo tha ga?”

⁶³ Derei Jisu kemekrieta. Sitse zievokezhatho-u sie puo ki, “A tsie rhei tuoyakezha Ukepenuopfü za nu n bu rüse di putuo, no Khristau, Ukepenuopfü Nuou zo me?”

⁶⁴ Sitse Jisu sie puo ki, “No pushüwata zo. Derei a nieko ki puya, Nieko tsie yawinu Themia Nuou vo kekuotho-u zatsa baketa, mu teigei kimhouko geinu tsurkezhü ngulietuo.”

⁶⁵ Sitse zievokezhatho-u puo pfhenei cierha di sie, “Puo Ukepenuopfü ketha die pute! Kiüdi úko zhapu kekrei pfhü sa ta? Nieko puo tsie nu Ukepenuopfü ketha die kepu siliete.

⁶⁶ Nieko kedipuo le ga?” Sitse uko sie, “Puo siata sü zo.”

⁶⁷ Süsie uko puo mho mhitsie tsiu puo vü, mu huomia dziezhü shüpie puo vü,

⁶⁸ sidi sie, “No Khrista sü, hie ki siedzedie pushüthie! Supuonie n vü ga?”

Pitor Jisu Melieketa

⁶⁹ Süki Pitor chazou kitiezha nu ba. Sitse rüümiapfü puoe puo ki phir di sie, “No rei Jisu Galil-u ze tuo ze!”

⁷⁰ Derei puo süko pete mhodzü nunu mo üdi sie, “No kedipuo pu tha shi a si mo.”

⁷¹ Sidi puo tuo kifükhro pra tse rüümia kekreipfü puoe puo ngu di sie, süki kethako ki, “Themia hau rei Nazaret Jisu ze tuo zo.”

⁷² Sitse Pitor moü rüse di sie, “A themia hau si mo zo!”

⁷³ Süsie rei süki ketha kro puo Pitor ki phir di sie, “No rei uko mia puotouta zo; n diepu nunu n telieta ze ru!”

⁷⁴ Sitse Pitor rüse khubou zo di sie, “A themiau si mo zo!” Siru sütei touki thevü khou parta.

⁷⁵ Sitse Pitor-e Jisu puo ki, “No thevü kekhou mhodzü va se a melietatuo,” isikeshüu rükralie. Sidi puo tuo pra di krapie mhapuochüta.