Mathi 25 - Angami Naga CL (Re-edited) Bible (BSI)

Rüümia Ker pie Kedievikeshü

¹ “Siro teigei kedi-e hakemhietuo. Rüümia ker u mitubouko pie yasau ze kesetuoü kevo mhie zo.

² Süko mia pengou mhale mo mu mia pengoue mhasi.

³ Rüü mhalekemo pengouko u mitubouko pie tuo, derei tier we se tuo mo;

⁴ derei mhakesi pengouko mhabouko nu tier tsiu mitubou sa pie tuo.

⁵ Siro yasau vor menuota, süla rüüko rüngu ba di zeta.

⁶ Derei khisoteiluo mia shiekhoui di, ‘Harie, Yasau sü! Par puo zeliecie.’

⁷ Sitse rüüko pete sielie di u mitubouko lo meza phrelie.

⁸ Siru mhalekemoko sie, ‘Nie tier huoyo pie hie tsücie, kekreilamonyü hie mitubouko mhetatuoü zhüketa la.’

⁹ Derei mhakesiko sie ‘Chülie suote, siwa ro nieko la rei mu hie la rei tsatatuo. Nie thuo vo zeyakezhako kinu khrülietacie.’

¹⁰ Süla uko süu khrütuoü vota tse, yasau vorta, mu dojüpfü kebako sielie di yasau ze nuyie heu nu lelie, sitse kikhau khawata.

¹¹ Süsienu rüü kekreiko rei vor tsolie di sie, ‘Niepuu, niepuu, kikha khrüshü hie tsücie!’

¹² Derei puo sie, ‘A nieko ki pu toushütuo, A nieko si mowe!’

¹³ Süla nieko pfheüla ba zolie, kekreilamonyü nieko puo teisozhau mu puo bavüdo-u si kemo la.

Kituomia Se pie Kedievikeshü

¹⁴ “Sizomonyü mia puoe rüna kekrei puo nu votatuo üdi puo kituoko kieshü di puo vie pie süko dzie nu keshü mhie zo.

¹⁵ Süko mia puopuo chülie kevi le di talent pengou pie mia puo tsüshü, siro kenie pie kekrei puo tsü mu puo pie mia puo tsüshü. Süsie puo tuota.

¹⁶ Siro talent pengou ngukelieu kenourhei vo süko se mhachü di kekrei pengou pralie.

¹⁷ Sütuoi kenie ngukelie kituou rei kekrei kenie pralie.

¹⁸ Derei puo ngukelie kituou vo kijü thielie di puo niepuu rakau keviepie zhüwata.

¹⁹ Siro puotei kekra sie kituo süko niepuu la vor di uko mhathoko lesie.

²⁰ Sitse talent pengou ngukelieu kekrei pengou sa se vor puo tsü di ‘Niepuu, no talent pengou pie a tsüshü, mu harie, a talent kekrei pengou pralietewe.’

²¹ Sitse puo niepuu sie, ‘Siyazemu, no kituo kevi kedietho-u; no mha keduoyo gei rei dietho baliete, a n bu mha kekra mhokezha chütuo; vor n niepuu ze n nei batalie.’

²² Siro talent kenie ngukelieu rei vor di sie, ‘Niepuu, no talent kenie pie a dzie nu shü, harie, a talent kekrei kenie praliete.’

²³ Sitse puo niepuu puo ki, ‘Siyazemu, kituo kevi kedietho-u; no mha keduoyo gei rei dietho baliete, a n bu mha kekra mhokezha chütuo; vor n niepuu ze n nei batalie.’

²⁴ Süsie talent puo ngukelieu rei vor di sie, ‘Niepuu, no themia n nou kere puocü a si ba; no tsia prushü kemora rei re tuoya, mu nyürieshü kemora rei pa kengu tuoyacü a si,

²⁵ süla a michieta di n talent-u khrupie zhüwate. N vie sü, harie,’ sita.

²⁶ Puo niepuu la sie puo ki, ‘No kerüzhü mu kemecü kituou! No a prushü kemora re tuoyacü, mu a nyürieshü kemora rei pa tuoyakecü no siluo le!

²⁷ Siüro no a raka pie vo rakaki nu rei pie zhülie ro, a la kevor ki a raka mu puo pra sa ngulietieciü.

²⁸ Süla puo kinu talent-u pielie di khapie talent ker kebau tsüwalie.

²⁹ Kekreilamonyü themia kehoupuorei mha kebau, khapie puo tsü sashütuo, sitse puo mhanyi philietuo; derei mhapuorei ba kemo-u puo kinu kebau rei chüsetatuo.

³⁰ Siro ziezhükemo kituou kelhoupie chazou kezei nu shüwalie, sünunu kra mu u hu thegeipie batuo.’

Seyieko Nyie Pepiketuo

³¹ “Siro Themia Nuou zayie chü di puo dielieko pete sa puo ze tsurkecü ki, puoe puo zapuzayie kedibau gei batuo;

³² siro seyie peteko puo mhodzünu kengu phretuo, süki puoe kuopfhemia puo temvüko donunu tekuoko kela kreiwayakezha tuoi puo themiako kho kekreiwatuo.

³³ Sidi puo tekuoko pie puo zatsashülie mu temvüko pie puo vitsashüwatuo.

³⁴ Süki kediu puo zatsa kethako üse, ‘A Puo japie nieko ketsüko, vorliecie, sidi kijüu chülie tsenu nie la kesepie baketa kedirüvieu weliecie;

³⁵ kekreilamonyü a merü tuo ru nieko mha pie a tsü, a terhü tuo ru nieko mha pie a bu krie, a rüso chü tuo ru nieko a pesolie;

³⁶ a methuo tuo ru nieko pfhemenei pie a wheshü, a mhachüzhü ru nieko vor a thekeshü, a kedie chü ba ru nieko a ki vor,’ isi sietuo.

³⁷ Süki kemiathoko la sie puo ki, ‘Niepuu hie kikecükipuo no merü ketuo ngu di mha pie n tsü ga? morei no terhü ketuo ngu di mha pie n bu krie ga?

³⁸ Mu hie kikecükipuo no rüso chü ketuo ngu di n pesolie morei no methuo tuo di pfhemenei pie n wheshü ga?

³⁹ Hie kikecükipuo no mhachüzhü morei kedieki nu ba di n ki vor ga?’

⁴⁰ Sitse kediu sie uko ki, ‘A nieko ki pu toushütuo, nieko a siezedzürie hako donu kecütho-u gei rei chüshü ro, süu a gei chüshüta zo.’

⁴¹ Süsie puoe puo vitsa kethako ki, ‘Nieko rüse pfüketako, a kinu tuose satan mu puo dielieko la kesepie keba kechachie mi nu votaliecie;

⁴² kekreilamonyü a merü tuo, derei nieko mha pie a tsü mo, a terhü tuo, derei nieko mha pie a bu krie mo,

⁴³ a rüso chü tuo, derei nieko a peso mo, a methuo tuo ru nieko mha pie a wheshü mo, a mhachüzhü mu kedieki nu ba, derei nieko a meho mo.’

⁴⁴ Süki uko sie puo ki, ‘Niepuu, hie kikecükipuo no merü ketuo, morei terhü ketuo, morei rüso chü ketuo, morei methuo ketuo, morei mhachü, morei kedieki nu keba ngu di hie n meho mota ga?’

⁴⁵ Sitse puo la sie uko ki, ‘A nieko ki pu toushütuo, nieko kecütho hako mia puo gei rei chüshü mota ro, a gei chüshü mota zo.’

⁴⁶ Süsie uko kechachie siazha kechü nu votatuo; derei kemiathoko we kechachie kerhei nu votatuo.”