Mathi 24 - Angami Naga CL (Re-edited) Bible (BSI)

Jisu Rüsuokiu Kataketuo Pukeshü

¹ Siro Jisu rüsuokiu nunu par di tuotazhü tse, puoe pethakelieko rüsuokiu nu kiko thapie puo kietuoü vor.

² Sitse puo uko ki “Nieko mha hako pete ngu tha zo mo? A nieko ki pu toushütuo, hako pete vawa di ketsie puo bu rei kemhosepfü ba motatuo,” sita.

Thela Teiki Zasiko

³ Süsie puo vo Oliv Kijüthou gei ba ru pethakelieko pekhre puo ki vor di sie, “Mha hako kedikechükipuo chü ta, mu kedipuo pie n kevor tsiu puotei thelaketa zasiu chüshütuo shi se hie ki pucie?”

⁴ Sitse Jisu sie uko ki, “Miapuorei bu nieko sewa molieketuo la nie kireilie.

⁵ Kekreilamonyü themia kekra a za se vor di, ‘A Khristau zowe!’ idi themia kekra se zetatuo.

⁶ Süki nieko terhü kechü dzeko, tsiu terhü dze diekrie si phituo, derei süla nie noukemezhieta hie. Mha süko chü molie lho, derei süu thelau mo.

⁷ Siro seyie puo seyie kekrei puo ze kegei tsiu kediko huoniehuo perhie sietuo, siro lukihaki pekrie mu kiükishütuo:

⁸ derei mha süko pete kemezhieketuo therieko zo.

Kepechü Vorketuo

⁹ “Siro mia bu nie tepie mia dzie nu shü di nie pechü mu dukhrituo, siro seyie pete rei a za la nieko ngumecütuo.

¹⁰ Süki mia kekra kepele khawatuo, mu huohuo tepie mia tsütuo, tsiu huoniehuo mecütatuo.

¹¹ Siro siedzekesi ketijü kekra sier di themia kekra se ketsi zetatuo.

¹² Siro thezho sanyü kemo kra phiketa la mia kekra kekhrie meku miemietatuo.

¹³ Derei hie zo tha thela tsokelieu kelalietuo.

¹⁴ Siro kijü pete nu zhapu puo chüshüketuo la kedi dze dieliekevi hau pupie seyie pete petsoshütuo; sidi puotei thelau vortuo.

Kemezhie Phiketuo

¹⁵ “Süla nieko Daniel siedzekesiue thiedzü pupie kezhü mha va perhu se zoketuo kemecü chü zokecüu vor kemesa chüu nu ketha ngukelie ki (kephrümiako bu leliecie),

¹⁶ süki Judia nu kebamia bu ta kijüthou gei votalie;

¹⁷ mu ki tsüle gei kebamia bu ki nunu mha chülietuoü la ke hie;

¹⁸ tsiu lie nu ketuou bu puo pfhenei chülietuoü la vo hie.

¹⁹ Süteiki nuonipfü ketuoko mu u nuonuo nuyakecüko we kemezhiepie kedipfü chütie shi!

²⁰ Nieko ketau bu teisei ki morei sabat nhie molieketuo la chaliecie.

²¹ Kekreilamonyü kemezhiekecü süu re phi zotuo, kijü chülie tse nunu vor tsie ketso sükemhie chü mo mu sükemhie chü lalie lho.

²² Siro teisozha süko chü pedzüshü kemosie we miapuorei kelalie lho; derei kedakelieko la teisozha süko chü pedzüwatuo.

²³ Sükisü mia nieko ki, ‘Harie, Khrista haki ba!’ morei ‘Puo luki ba!’ isi shierei pele hie.

²⁴ Kekreilamonyü ketijü Khrista mu siedzekesi ketijü sier ungomhatho kezhako mu zasiko chüpie mia pekie di chülie kevisie kedalieketako rei se ketsi zetatuokecü la.

²⁵ Harie, a pedzüperie nieko ki pushüwate ho.

²⁶ Süla uko sie nieko ki, ‘Lere-i, puo rayha nu tuo,’ idi pu rei vo hie; morei, ‘Harie, puo kinutshekou ba ho,’ isi rei pele hie.

²⁷ Kekreilamonyü niathutsa nu teimelashü ro, niakratsa rei ngu voyakezha tuoi, Themia Nuou kevor rei sümhie zotuokecü la.

²⁸ Kehourapuorei kesiamo kezhüra chürhaüko rei vo sünu kengutuo.

Themia Nuou La Kevor

²⁹ “Siro kemezhiekecü teisozha süko tseita mumetha niaki zeitatuo, “tsiu khrü zieshü motatuo; themvüko teigei nu rürietatuo, mu teigei kekuoko shü keniewatuo.

³⁰ Süsie Themia Nuou zasi teigei nu ngu partuo, sitse kijü nu seyie pete kratatuo, mu ukoe ‘Themia Nuou teigei kimhouko geinu’ kekuo mu zapuzayie chü di tsurkezhü ngutuo.

³¹ Süki ketsü khou kemerie chü di puoe puo dielieko ketseshütuo, sidi uko teigei tietsapuo nu vo kekreitsa ketso ke diako nunu puoe kedakelieko pfhü kengulietuo.

Chiedebo-u geinu Kepethadie

³² “Siro nieko chiedebo-u geinu kepetha dieu siliecie: puo co medzüvü di puo nyü kesa the kepar ki teiletieta ükecü nieko silieya.

³³ Sütuoi nieko mha hako pete ngukeshü ki, puo penuo vor kikha ki thata ükecü siliecie.

³⁴ A nieko ki pu toushütuo, mha süko pete chü tseiwa kemochie thephou hau jütalie lho.

³⁵ Tei mu kijü jütatuo, derei a dieko we jütalie lho zo.

Miapuorei Si kemo Teisozhau mu Bavüdo-u

³⁶ “Derei teisozha süu mu bavüdo süu dze we a Puou rübei sie, miapuorei teigeidielieko rei morei Nuou rei siya mo.

³⁷ Siro Noah kelhou ki tuoi Themia Nuou kevor ki rei sümhie zotuo.

³⁸ Dzüdi sierketa mhodzü themiako mhacümhakrie, thenu lie mu nyhü zo ba Noah rou nu leketa nhie tso.

³⁹ Sidi dzüdi vor uko pete vupfülie kemochie mhapuorei si ba mo, sütuoi Themia Nuou kevor ki rei sümhie tou zotuo.

⁴⁰ Sükisü mia kenie keze lie nu tuotuo, mia puo chüsetatuo, mu mia puo khawatuo.

⁴¹ Thenumia kenie keze kecü ge batuo; miapfü puo chüsetatuo mu kekreipfü khawatuo.

⁴² Süla pfheüla ba zolie, kekreilamonyü nieko nie Niepuu vorketuo teisozhau si kemo la.

⁴³ Derei mha hau siliecie: mhanuü ki niepuu kicükipuo kerügumia vortuo shicü si ba ro, puo pfhe balie di kerügumia bu ler puo ki rhie molietuo.

⁴⁴ Süla nieko rei dojü balie, kekreilamonyü nieko le mo keba bavüdo puo nunu Themia Nuou vor zotuokecü la.

Kedietho mu Kerüzhü Kituo

⁴⁵ “Siro supuo kedietho mu mhakesi kituou chü di, puo niepuu bu puo chüpie puo kinu kezha chü di puotei touki mha khapie kituo kekreiko tsütuo ga?

⁴⁶ Puo niepuu kevor ki mhachü ba di ngulieketuo kituo süu thejakepfütho zo.

⁴⁷ A nieko ki pu toushütuo, puo themia süu bu puo vienya pete kemeho-u chü zotuo.

⁴⁸ Derei kerüzhü kituo süu puo nou nu, ‘A niepuu vor menuotuo’

⁴⁹ idi puo dziese kituoko vü, sidi kemezemia ze mhacümhakrie bata ro,

⁵⁰ kituo süu niepuu puo le mokeba puo nu vor di,

⁵¹ puo da phawa di puo khapie ketherakezhako kro nu shüwatuo; sünu kra mu u hu thegeipie batuo.