Mathi 22 - Angami Naga CL (Re-edited) Bible (BSI)

Nuyie He pie Kedievikeshü

¹ Süsie Jisu dieviko pie themiako ki pu la di sie,

² “Teigei kedi-e kedimia puo puo nuou la nuyie he puo kesekelie mhie zo.

³ Siro puoe puo kituoko ketsepie theheu nu vornu di kiepie kebako kie, derei süko vor nyü mota.

⁴ Süsie puo kituo kekreiko ketse la di sie, ‘Kiepie kebako ki hakemhie pushülie; a theheu kesepie bate, a thudo mu a ri puo phou kevithoko bieliete; mha peteko kesepie bate; nuyie heu nu vorcie,’ sishü.

⁵ Derei uko die süu le kemedza di u mhathoko nu vo phreta, mia puoe puo lie nu tsuta, kekreiu puo lhithotsa vota,

⁶ siro kekreiko puo kituoko telie di süko bie kezhase, mu süko dukhriwa.

⁷ Sitse kediu puo nou meyie phita. Süla puoe puo rüpfhünuoko ketsepie mia kedukhri süko dukhriwa mu uko nadiu thewa.

⁸ Süsie puo kituoko ki, ‘Nuyie he kesepie bate, derei kiepie kebako vorlie sü mote.

⁹ Süla nieko chapfüchaüko nu vo di themia ngukelie khe kiepie nuyie he nu vorliecie,’ sishü.

¹⁰ Süla kituoko chapfüchaüko nu vo themia ngukelie khe, kevi rei kesuo rei, ze vor kengulie; sidi u phreimia bu vor nuyie kiu ketshu chülie.

¹¹ “Derei kediu puo phreiko mehotuoü le tse mia puo nuyie pfhenei se mo di vor keba ngulie.

¹² Sitse puo süu ki, ‘Kezeu, no kidi nuyie pfhenei se mo di hanu ler ba ga?’ Sitse themiau die pulie kenjüta.

¹³ Süki kediue chalieko ki, ‘Nieko puo phi puo dzie phalie di kelhoupie chazou kezei nu shüwacie; sünu kra mu u hu thegeipie batuo.’

¹⁴ Kiepie keba we kra, derei kedakelie we tsacü la.”

Khezhanuo Kekhruo Dze Ketsokecü

¹⁵ Süsie Farisiko keze vo di puo die nunu puo tekelie rhü di kerüchü.

¹⁶ Sidi süko Herodmiako sa di ukoe pethakelieko ketsepie puo ki shü di sie, “Kepethau, no ketho nunu Ukepenuopfü zho pie pethaya, mu no miapuorei rhu pekreiya mokecü hie si; kekreilamonyü no mia puo gei rei n nei si kreiya mokecü la.

¹⁷ Süla no kedipuo le shi, se hieko ki puthie. Khezhanuo khruopie Kaisar tsükecü puotou mo mo ga?”

¹⁸ Sirei Jisu uko noudo kesuo silie di sie, “Ketherakezhako, nieko kiüdi a kedoya ga?

¹⁹ Khezhanuo priesa puo pie a pekiecie!” Sitse uko denari puo se vorshü.

²⁰ Ru puo sie uko ki, “Hau supuo miarhi mu supuo za ga?”

²¹ Uko sie, “Kaisar zo.” Sitse puo uko ki, “Kaisar vieko pie Kaisar tsüwalie, mu Ukepenuopfü vieko pie Ukepenuopfü tsüwalie.”

²² Uko die hau sikeshü ki uko ngota; mu uko puo khawa di tuota.

Rheilakesie Dze Ketsokecü

²³ Sünhie Sadukiko mia huo kesiamia rheilasielie kelho pu di vor puo ketso di sie,

²⁴ “Kepethau, Mosa hie ki, ‘Mia puoe puo nuo jü di siata ro, puo siezeu bu puo kimia lie di puo dzürieu yie pelhoucie,’ isi.

²⁵ Siro hie donu siezedzürie kechü thenie tuoya ru therieu thenu lie, mu puo nuo jü di siata, sidi puo kimia bu puo siezeu ze lhou.

²⁶ Siro mia kenieu sükemhie chüta mu seu rei, si zo vo thenieu tso.

²⁷ Sidi thela nu thenupfü rei siata.

²⁸ Di siro, kesiamia rheilakesie nhie, süpfü mia thenieko supuo kimia chü ta? Uko pete puo lie phre zeru.”

²⁹ Jisu uko die kela di sie, “Nieko kekrü, kekreilamonyü nieko kethodieko mu Ukepenuopfü kekuou rei siya kemo la.

³⁰ Kekreilamonyü rheilakesie ki thenu lie morei nyhü reiya mo, derei teigeidieliemia mhietaya.

³¹ Siro kesiamia rheilakesietsatie zowe, thiedzü Ukepenuopfü nie ki,

³² ‘A Abraham Kepenuopfü, Isak Kepenuopfü, mu Jakob Kepenuopfü,’ isi pie kezhü nie phrü mo zo me? Puo kesiako monyü kerheiko Kepenuopfü zo.”

³³ Themia krodiu hau sishü tse, puo kepetha die la u ngota.

Diekhakeshü Kezhatho-u

³⁴ Siro Farisiko puoe Sadukiko die va pejükewa silie di vo kengulie,

³⁵ sidi süko donu thezhokesimia puoe puo kedotuoü mha ketso di sie;

³⁶ “Kepethau, thezho-u nu diekhakeshü kiu kezhatho ga?”

³⁷ Sitse Jisu sie puo ki, “ ‘No n melou pete se, mu n kerheiro pete se, mu n nou pete se Niepuu n Kepenuopfü khrietuo.’

³⁸ Hauha diekhakeshü kezhatho-u mu kerietho-u zo.

³⁹ Siro kenieu ro: ‘N siezanuomia khriepie n thuo n kekhrie mhietuo,’ isikecüu zo.

⁴⁰ Thezho-u pete mu siedzekesiko rei diekhakeshü hanie geinu khepfü phre ba zo.”

Khrista Dze Ketsokecü

⁴¹ Siro Farisiko vor kengu ketha nu, Jisu sie,

⁴² “Nieko Khrista dze kedipuo le ga? Puo supuo nuo ga?” idi uko ketso. Sitse uko sie, “David nuou zo.”

⁴³ Sitse puo la sie, “Siüro, kimhie di David-e Ruopfüu nunu puo üse, Niepuu üdi kie di sie,

⁴⁴ “ ‘Niepuu sie a Niepuu ki, “A n ngumvümiako khapie n phi khro shüwa kemochie no a zatsa ba zocie,” ’ isi ga?

⁴⁵ David süki puo üse Niepuu üdi kie liro, siro kimhie di puo nuoü lalie vituo ga?”

⁴⁶ Sitse miapuorei puo die kelalie kenjüta, mu sünhie yawinu miapuorei mhapuorei pie puo ketso sa michieta.