Mathi 20 - Angami Naga CL (Re-edited) Bible (BSI)

Khubelie nu Mhakechümiako

¹ “Teigei kedi-e lie niepumia puoe mia bu puo khubelie nu mhachütuoü khiserüna vo mia zha khrükecü mhie zo.

² Süsie puo khunhie mhakra puo pie uko zha chüketuo kepfhekholieketa sie uko ketsepie puo khubelie nu shüwa.

³ Sidi puo bavüdo thepfüu meseki chazou la par ru puo mia kro puo lhithochü nu mhapuorei kechü jü di doupfü ketha ngulie,

⁴ sitse puo sie uko ki, ‘Nieko rei a khubelie nu tsucie, a nieko zha chüshü kezhü de chüshütuo.’ Süla uko tsuta.

⁵ Süsie puo khinhieluo mu keba se meseki pra di sükemhie chü la.

⁶ Siro keba pengou mesetazhü tse puo la pra kekreimia kro puo süki rüge ketha ngulie, sitse puo sie süko ki, ‘Nieko kiüdi zhate mhachü mo rüge haki tha ga?’

⁷ Sitse uko sie puo ki, ‘Miapuorei hie zhakhrü kemo lalie.’ Siru puo sie uko ki, ‘Siüro, nieko rei khubelie nu tsucie,’ sishü.

⁸ Siro thevatieta tse, khubelie niepuu sie puo lie kemeho-u ki, ‘No mhakechümiako kieshü di kenuothoko zha chü rierie di vo keriethoko ketso zha chüpie tsüwacie.’

⁹ Sitse bavüdo pengou mese kinu u zhakhrükelieko vor di mia puopuo denari puopuo ngu phrelie.

¹⁰ Siro uko tsu rieketako uko zha lietuoü kevor ki uko zha chü pekrashütuo nhiecü le di vor; derei uko rei mia puo khunhie mhakrau puopuo ngukelie zo.

¹¹ Siro ukoe u zha ngukelie ki vor uko niepuu ki panyata,

¹² sidi sie, ‘Kenuo hako bavüdo puo zie mhachü mo ze, mu süko bu hie zhate teile perhiepfü kemezhie di mhachükecüko ze ketoute,’ sita.

¹³ Derei puo sie süko mia puo ki, ‘A zeu, a n kedowa mo; no rei denari puotuoü avu kepfhekholie mo me?

¹⁴ N zhau pielie di tuotalie; a pie n ketsü de pie kenuo hau rei tsüketuo a medo zo.

¹⁵ A thuo a vie pie a medo chükecü puotou zo mo me? A mephruomevuokecü la a ngupie n mhikeluya me?’

¹⁶ Sükemhie kenuomia rietatuo, mu keriemia nuotatuo.”

Jisu Puo Se Dze Kepu Va Seu

¹⁷ Siro Jisu Jerusalem nu khokezhü ki pethakelie kerekenieko ze krei tuo di puo chala nu uko ki,

¹⁸ “Harie, úko Jerusalem nu khotuoüzhie, mu sünu mia Themia Nuou tepie zievokezhako mu thezhokepethako dzie nu shüwatuo. Siro uko puo pejo di puo pesiawatuo;

¹⁹ siro puo khapie Judakemoko dzie nu shüwa di süko bu puo pie kethekre, puo vü tsiu puo gouwatuo; mu zha se nhie puo kesia nunu rheilasielietuo.”

Zebedi Nuonie Zuopfü Kecha

²⁰ Süki Zebedi nuonie zuopfü puo nuonie ze puo ki vor di puo mhodzünu khoutoutsu di puo ki puo mezhiemelota.

²¹ Sitse puo sie süpfü ki, “No kedipuo mengu ga?” Süpfü sie puo ki, “No n kedi nu a nuo hanie mia puo bu n zatsa mu mia puo bu n vitsa balieketuo n die khashücie,” sita.

²² Derei Jisu sie, “Nieko chaketuou si di cha tuo mote. Nnie a krietuoü keba hieu krielie vi me?” Sitse unie puo ki, “Hienie chülie vi zo.”

²³ Siru puo sie, “Nnie a hieu krie zotuo ketho, derei mia puo bu a zatsa mu mia puo bu a vitsa baketuo we a khashülie kenjü, derei süu we a Puou thuo kese setuoketamia vie zo.”

²⁴ Siro mia kerko die süu sishü tse, ukoe siezedzürie hanie gei u nei mota.

²⁵ Derei Jisu uko kielie di uko ki, “Judakemoko we kezhako bu u kekhaya, mu uko kezhakoe uko mho diyakecü nieko si batuo.

²⁶ Nieko donu we silie lho, sirei nieko donu kehoupuorei zha kenyümia nieko lie chü morosuo,

²⁷ mu kehoupuorei nieko donu rie kenyümia bu nieko kituo chütuo.

²⁸ Themia Nuou rei mia bu puo theketuo üdi monyü mia theketuoü tsiu themia kekra rhalieketuo la puo phou khashütuoü kevor zo.”

Jisu Mhiciemia Kenie Chü Pevikeshü

²⁹ Süsie uko Jeriko nunu tuotazhü tse, mia krodi puoe puo siemedzita.

³⁰ Süki mhiciemia kenie cha khieki ba. Unie-e Jisu vozhü ükecü silie tse shiekhoui di sie, “Niepuu, David Nuou, hienie ngumezhieshücie.”

³¹ Sitse themia kro-u unie bu kemekrie batanu di unie kechüta, derei unie shie kechü sa di, “Niepuu, David Nuou, hienie ngumezhieshü zocie,” sita.

³² Süki Jisu tseseipfü thata di unie kieshü di sie, “A bu nnie gei kedipuo chüshü nyüya ga?”

³³ Sitse unie sie puo ki, “Niepuu, hienie mhi bu mha ngulieyi,” sita.

³⁴ Süla Jisu puo noumezhieta di unie mhi bieshü. Sitsemetha unie mha ngulieta, mu unie puo siemedzita.