Mathi 19 - Angami Naga CL (Re-edited) Bible (BSI)

Kekhokevakecü Dze Kepetha

¹ Siro Jisu mha hako pu tseiwa tse, Galil nunu tuo Jordan rü khie Judia kijü nu vota.

² Siro mia krodidi puo siemedzi vota mu puo süko chü pevishü.

³ Süki Farisiko huomia vor puo kedo di sie, “Mia puoe mha huo la puo kimia khawalie vi me?”

⁴ Sitse puo sie, “Sietsenu unie chükeshüu ‘Puo thepfumia mu thenumia chüshü,’ ükecü dze phrü mo zo me?

⁵ Sidi sie, ‘Haha la themiau puo puo mu puo zuo khawa di puo kimia ze puo chütatuo, tsiu unie keze chü puo chütatuo.’

⁶ Süla unie kenie monyü chü puota zo. Süla Ukepenuopfüe chü kesakeshüu themia bu chükhowa hiecie.”

⁷ Sitse uko sie puo ki, “Siro kiüdi Mosae hie bu hie kimianuo khakewa leshü thushü di puo khawalie kevi hie ki diekhashü ga?”

⁸ Sitse puo uko ki, “Mosa nie bu nie kimianuo vawalie kevi khakeshü kekreilamonyü nie nou kere la zo, derei sietsenu zowe sishü mo.

⁹ Süla a nieko ki pushütuo, kehoupuorei pieüpiera la zo kemosie puo kimia khawa di kekrei lie la ro puo pieü chüta zo.”

¹⁰ Sitse puoe pethakelieko sie puo ki, “Mia puoe puo nupfünuo gei siliro, kiya kemo we vikuote.”

¹¹ Derei puo uko ki, “Die hau themia pete ze zolie kenjü, derei kekuo kha u tsükeshümia la rübei zo.

¹² Kekreilamonyü mia huomia u zuo va nu ketuo nunu iunukmia chü, siro huomia kekreimia bu u chüpie iunukmia chüwa, mu huomia teigei kedi la u thuo u pepi di iunukmia chü. Themia kehoupuorei die süu zelie keviu bu zeliecie,” sita.

Jisue Japie Nhicunuoko Ketsü

¹³ Süsie miae puo bu puo dzie chapie uko gei shü mu kechachüshünu di nhicunuoko ze puo ki vor. Sirei pethakelieko süko kerhieta,

¹⁴ derei Jisu sie, “Nhicunuoko bu a ki vorlie, uko kha hiecie, kekreilamonyü teigei kedi haicüko vie zokecü la.”

¹⁵ Sidi puo puo dzie yhapie uko gei shüshü di sünunu tuo lata.

Kenyimia Puo Mha Ketsokecü

¹⁶ Siro mia puo Jisu ki vor di sie, “Kepethau, a kechachie kerhei ngulieketuo la mha kevi kikecüpuo chü morosuo ga?”

¹⁷ Sitse Jisu sie puo ki, “No kiüdi a ki mha keviu dze ketsoya ga? Keviu sü mia puo rübei zo. No kerhei nu le nyü liro, diekhakeshüko zeliecie.”

¹⁸ Sitse süu puo ki, “Kiko ga?” Jisue sie, “No mia dukhri lho, No pieü chü lho; No rügu lho; No ketijü zhapu chü lho.

¹⁹ N puo n zuo rhulie, tsiu n siezanuomia khriepie n thuo n kekhrie mhietuo.”

²⁰ Sitse khriesau sie puo ki, “A mha süko ze phre tuote; a mha kikecüpuo tso mo baluo ga?”

²¹ Jisu sie puo ki, “No vi tseilie nyü ro, vo di n vie ketuoko zelie di khapie mhakejüko tsüwalie, siliro teigei n kinyi nyilietuo, sidi vor a siemedzilie.”

²² Derei khriesau die süu sishü tse puo nousuo siei di tuota; kekreilamonyü puo mhanyi phikecü la.

²³ Sitse Jisu sie puoe pethakelieko ki, “A nieko ki pu toushütuo, kenyimia puo bu teigei kedi nu leketuoe chülie re phi zotuo.

²⁴ A nieko ki pu sashütuo, kenyimia puo bu Ukepenuopfü kedi nu leketuou ki rei ut puo bu thepremei nu kepra we rüükuotuo.”

²⁵ Sitse pethakelieko die hau sikeshü ki u ngo phi di sie, “Di siro supuonie kelalie vi ta?” ita.

²⁶ Derei Jisu uko meho terü di sie, “Themia zo we süu chükelie jü, derei Ukepenuopfü la we mha pete chülie vi.”

²⁷ Sitse Pitor puo die kela di sie, “Harie, hieko we mha pete khawa di n siemedzi tuote, süla hie kedipuo ngulie ta?”

²⁸ Sitse Jisu sie uko ki, “A nieko ki pu toushütuo, nieko a siemedzi tuoketako, mhachü kesa lakecüu va Themia Nuou puo kediba zapuzayie kechüu gei bakelie ki nieko rei kediba kerekenie gei ba di Israel seyie kerekenieko nyie kecütuo.

²⁹ Themia kehoupuorei a za la u ki morei u siezedzürie morei u üpfünuo morei u puonuo morei u zuonuo morei u nuonuo morei u lieko khawaketau, süde thekrie keziengulietuo, tsiu kechachie kerhei sa welietuo.

³⁰ Derei rieketuoko kekra nuotatuo mu nuoketuoko kekra rietatuo.