Mathi 18 - Angami Naga CL (Re-edited) Bible (BSI)

Suomia üse Kezhathotie Shikecü

¹ Süki pethakelieko Jisu ki vor di sie, “Teigei kedi nu suomia üse kezhathotuo ga?”

² Sitse puoe nhicunuomia yopuo kielie di puo bu uko donu balie.

³ Sidi sie, “A nieko ki pu toushütuo, nieko rüdilie di nhicunuomia kemhielie kemosie nie mhakipuorei teigei kedi nu lelie kenjü zo.

⁴ Kehoupuorei puo chü kerünuopie nhicunuomia hayo mhiekelieu teigei kedi nu kezhatho-uwe.

⁵ Siro kehoupuorei a za nunu nhicumia hikecü yopuorei zeliekezhamia a zelieya.

Kephouma Dophiko

⁶ “Nie kehoupuorei a pelekezha kecü hako donu mia yopuorei chü pesuokeshümia, mha kegetsie kezha puo pie nie vo gei goushü di dzükezha kesou nunu pelheikhrikewa we nie dze vikuotuo.

⁷ Mhachü kepesuoko la kijüu we ce, chülietie! Mhachü kepesuoko vor molie lho zo; derei puo la mhachü kepesuo bu kevor-u we ce, chülietie!

⁸ “Siro n dzie morei n phi n chü pesuo liro, n geinu süu da kelhouwaliecie; n dzie kenie mu n phi kenie pfü di mia bu n kelhoupie kechachie mi nu shükewa ki n bou lalhi morei n phi lalhi di kerhei nu kele we n dze vikuotuo.

⁹ Siro n mhi n chü pesuoya liro, n geinu süu kerülapie kelhouwacie; n mhi kenie pfü di n kelhoupie mizie nu shükewa ki rei mhi puo pfü di kerhei nu kele we n dze vikuotuo.

Tekuo Jüketayo pie Kedievikeshü

¹⁰ “Nieko kecü hako mia yopuorei pese molieketuo le terü zoliecie; kekreilamonyü a nieko ki pushütuo, teigei uko dielieko teigei kebau a Puou zie meho sei baya.

¹¹ Kekreilamonyü themia Nuou jüketamia kelalietuo üdi vor zokecü la.

¹² Nieko kedipuo le ga? Mhanuü mia puo tekuo krie puo ba di süko donu puo yotuota ro, puo kekrei hiethepfüethepfüko pie kijüthou gei tha di vo jüketayo pfhü lho üme?

¹³ Siro a nieko ki pu toushütuo, puo süu ngulie ro, jüta kemo hiethepfüethepfüko ki rei süyo la puo neikuotaya.

¹⁴ Sütuoi teigei keba nieko Puou rei kecü hako donu puorei bu jüketa puo medo mo.

Phoumakewa Siezeu

¹⁵ “Siro n siezedzürie mia puo n gei kejo chü liro, vo di nnie rübei zokecü kinu puo kejo pu puo kiecie. Puo n die rünyülie liro, no puo nguliete.

¹⁶ Derei puo n die rünyü mvüta ro, no mia puo morei kenie ze sa vocie, mia keniekese tie se zhapu chü liro die kehoupuorei mvü kemeteilietuo.

¹⁷ Siro puo süko die rei rünyü mvüta ro pie kehou ki pucie; sidi puo kehou die rei rünyü mvüta ro, puo bu Judakemomia mu thesokeliemia mhietacie.

¹⁸ A nieko ki pu toushütuo, nie kijü nu mhakehoupuorei kha liro teigei rei kha zotuo, mu nieko kijü nu mhakehoupuorei khrükeshüu teigei rei khrüshü zotuo.

¹⁹ Siro a nieko ki pu sashütuo, nieko mia kenie kenourhe di mhakehoupuorei cha ro, teigei keba a Puou thuo mha süu chüshü nie tsü zotuo.

²⁰ Kekreilamonyü mia keniekese a za nu vo kehoukengukezhara a süko donu ba zotuokecü la.”

Kejo Vapie Ketsükecü

²¹ Sitse Pitor puo ki vor di, “Niepuu, mhanuü a siezedzürie mia puo a gei kephouma puo chüwa ro, a bu va kitsuo vapie puo tsütuo ga? Va thenietuo me?”

²² Sitse Jisu puo ki, “Va thenie icüu mo, derei va hietheniecü thenie reicie.

Kejo Vapie Tsükemo Kituou Dievi

²³ “Süla teigei kedi-e kedimia puoe puo kituomia puo vie se kebako ze mha süko kela mehotuoü kesie ze kemhie zo.

²⁴ Siro puo le kesie ki, mia puo talent nyie ker puo pu pfüzhüketa puo ze puo ki vor;

²⁵ mu puo thepu su hulie kenjüketa la puo niepuue sie puo mu puo kimia siro puo nuonuoko, tsiu puo vie pete zepie puo suwanuta.

²⁶ Süla kituo süue tsu puo mhodzünu khoutoupfülie di sie, ‘No a pfhe zashücie, sitse a n pu chü tseishütuolie’ idi puo mezhiemelota.

²⁷ Sitse kituo süu niepuu puo ngumezhieta di puo khashüwa, mu thepuko rei vashü puo tsüwa.

²⁸ Sirei kituo süu pra di puo dziese kituo kekrei puo denari krie puo puo pu pfükezhü puo ze keselie tse puo mezha kenie pielie di sie, ‘No a pu pfüketuoko chüshücie,’ sita.

²⁹ Sitse dziese kituo kekreiu tsu zhülie di sie, ‘No a pfhe zashücie; a n pu chü lashütuolie’ idi puo mezhiemelota.

³⁰ Derei puo mvüta, sidi puo pu chüshü kemochie puo teze vo kedieki nu shüpie ba tso.

³¹ Siro dziese kituo kekreiko mha süu ngu di uko nousuo phita, sidi vor uko niepuu ki mha süko pete pushü.

³² Süsie puo Niepuu puo kielie di sie puo ki, ‘No kerüzhü kituou! No a ki n mezhiemeloketa la no a pupfükezhü pete vapie n tsüwate.

³³ A n ngumezhiekeshü tuoi no rei n dziese kituou ngumezhieshü zhü mo üme?’

³⁴ Sidi puo niepuu puo noukemeyiepfü puo bu thepu pfükezhü pete chü tseishü kemochie puo pechüpenyüwanu di pie mia dzie nu shüwa.

³⁵ Sütuoi nieko kehoupuorei nie nou nu nie siezedzüriemia kejo vapie tsülie kemosie, teigei keba a Puou rei nieko gei sükemhie chü zotuo,” sita.