Mathi 17 - Angami Naga CL (Re-edited) Bible (BSI)

Jisu Rhi Kreiketa

¹ Zha sorou sie, Jisue Pitor mu Jakob siro puo siezeu Johan uko zelie di krei kijüthou kerükrie puo gei vota.

² Siro uko kengu kinu puo rhi kreita, sidi puo zie niaki kezie tuoi mu puo pfhenei krapouita.

³ Siro harie Mosa mu Elija unie-e vor uko pengu di puo ze kerüchü ketha ngulie.

⁴ Sitse Pitor sie Jisu ki, “Niepuu, úko keze haki bata ro vituolie; n medotuo üro, a haki nu pru se chüshütuo, puo n la, puo Mosa la mu puo Elija la,” sita.

⁵ Siro puo die pu thaluocü nu, kimhou ziekruoikecü puo shü mhai vor uko zepfülieta, tsiu kimhou geinu harie mhapfhe puo, “Hauha a Nuo a Khrietho-u zo, a puo ngu a neithoyakezhau, nieko puo die rünyüliecie,” isi vor.

⁶ Siro pethakelieko hau sikeshü ki, michie phita di tsu zerepfü zhüta.

⁷ Derei Jisu phir uko bie di sie, “Sielie mu michieta hie.”

⁸ Sitse ukoe tosie meho ru Jisu rübei sie miapuorei ngu mota.

⁹ Siro uko kijüthouu geinu la kerzhü tse, Jisu sie uko ki, “Themia Nuou kesia nunu rheilasielie kemochie nieko kengu hau dze pie mia puo ki rei pu hiecie.”

¹⁰ Sitse pethakeliekoe puo ketso di, “Kiüdi thezhokepethako Elija bu vor rietuo ücü puya mu?” ita.

¹¹ Sitse puo la sie, “Elija vor di mha peteko chü pevi la zotuo ketho,

¹² derei a nieko ki pushütuo, Elija vorwate, mu uko puo silie mota, di uko puo gei u nei u nyü chüwate. Sütuoi Themia Nuou rei uko dzie nu kemezhiekecü seüdzütuo,” sita.

¹³ Süze puo Johan mia dzülukepfüu dze uko ki pukecü pethakelieko rei lelie.

Jisu Terhuokesuo Ze Ketuo Nuo Yopuo Chü Pevikeshü

¹⁴ Süsie uko themia kro nu vorlie tse, mia puoe vor puo mhodzünu khoutou zolie,

¹⁵ di sie, “Niepuu no a nuoyo ngumezhieshü zocie, kekreilamonyü puo terhuovüzie chü kemezhie phi tuote; mu puo tsiemelie te mi morei dzü nu le tataya.

¹⁶ Siro ae puo ze noe pethakelieko ki vor, derei uko puo chü pevilie mote.”

¹⁷ Sitse Jisu sie, “Harie, kepele kejü mu ziezhü kemo phouu, a bu kichiepuo nieko ze batieya mu? A bu nieko gei kichiepuo a kethe ba zotuo ga? Puo ze haki vorcie!”

¹⁸ Sidi Jisue terhuokesuou kechüshü, sitse süu unuoyo geinu prata, mu nuo süyo sütei touki shürholieta.

¹⁹ Süsie pethakelieko thuo krei puo ki vor di sie, “Kiüdi hieko terhuokesuou whuolie lhota ga?”

²⁰ Sitse puo sie, “Nieko kepele ketsa la zo. Kekreilamonyü a nieko ki pu toushütuo, mhanuü nieko kepele gakrieshü de yopuorei bakecü sie nieko kijüthou hau ki, ‘No haki nu rüdi lutsa votacie,’ isishü rei süu rüditatuo, mu nieko mhakehoupuorei chülie kelho jütatuo.”

²¹ (Derei mha hako kecha mu kemevo geinu zo kemosie mha kekreipuo geinu rei chülie lho.)

Jisu Puo Se Dze Kepu

²² Süsie uko Galil nu vor kengulieta tse, Jisu sie uko ki, “Themia Nuou tepie mia dzie nu shüwatuoü bate,

²³ mu uko puo dukhriwatuo, derei puo zha se nhie rheilasielietuo.” Sitse uko nousuo phita.

Rüsuoki Khruo Khakeshü

²⁴ Siro uko Kapernaum nu vorlie tse, rüsuoki khruo khruoyakezhako Pitor ki vor ketso di sie, “Nieko kepethau rüsuoki khruo khashüya mo me?”

²⁵ Sitse puo sie, “U, khruoya,” sishü. Siro puo kinu vorlie tse, Jisu puo rüchü di sie, “Simon, n nou kele kimhie ga? Kijü hau nu kediko suomia kinu mha kepfüzha morei khezhanuo lieya ga? U thuo u nuonuoko kinu mo kekreimia kinu ga?”

²⁶ Siru Pitor sie, “Kekreimia kinu we.” Sitse Jisu puo ki, “Siüro puo nuonuoko we mha khashü morei vi.

²⁷ Derei úko themia hako nei kemo chüwa kelho la no dzükezha nu tsu di khuoshüwi se khuo shücie; sidi khuo shülie kerietho-u me ciegashü ro raka puo ngulietuo; no süu se vo a la mu n la khashüwacie,” sita.