Mathi 16 - Angami Naga CL (Re-edited) Bible (BSI)

Zasi Puo Chakecü

¹ Farisiko mu Sadukiko Jisu bu teigei nu zasi puo chüpie uko kienu di vor puo medophita.

² Sirei puo uko ki, “Thevatie ler tse nieko sie, ‘Tei vituoü bate, kekreilamonyü tei merie zhaketa la,’ siya.

³ Siro khise gei nieko sie, ‘Thie teirütuoü bate, kekreilamonyü tei merie mu zeide-i zhaketa la,’ isiya. Nieko tei zie meho di tei kevikesuo si kekreilieya, derei nieko puotei zasiko we silie kenjü.

⁴ Kerüzhü mu pieüpiera phouu zasi pfhüya, derei Jona geinu chüshüwaketa zasiu sie zasi kekrei puorei kha sashülie lhote.” Sidi puo uko khawa di tuota.

Farisiko mu Sadukiko Khrei

⁵ Siro pethakelieko dzükezha cie kekreitsatie vota, mu uko niekhrüda pfülie rükra mota.

⁶ Sitse Jisu sie uko ki, “Nieko menuoliecie, Farisiko mu Sadukiko khreiu la nieko kirei tuolie.”

⁷ Sitse uko thuo kerüchü di sie, “Haha, úko niekhrüda pfülie rükra moketa la zo.”

⁸ Derei Jisue süu silie di sie uko ki, “Nie kepele ketsako, kiüdi nie thuo nie donu niekhrüda pfülie moketa kepuya ga?

⁹ Nieko tsie rei puoca silie mo me? Niekhrüda pengou pie themia nyie pengou vachülie di nieko bu khopenuo kitsuo pfhü lalie ga?

¹⁰ Morei niekhrüda thenie pie themia nyie dia vachülie di nieko bu merha kitsuo pfhülie shicü nieko rükra mote me?

¹¹ Kiüdi nieko a niekhrüda kemo puo dze pu keba cau silie mo ga? Nieko Farisiko mu Sadukiko khreiu kitsa nie kireiliecie!”

¹² Süze uko puo uko bu niekhrüda khreiutsatie monyü Farisiko mu Sadukiko kepetha dietsatie u kireinushü ücü lelie.

Pitor Jisu Dze Phrakeshü

¹³ Süsie Jisu Kaisaria Filipi rüna nu vorlie tse, puo sie puoe pethakelieko ki, “Mia Themia Nuou üse supuo üya ga?” idi ketso.

¹⁴ Sitse uko sie, “Huomia pucü Johan mia dzülukepfüu üya, kekreiko pucü Elija mu huomia Jeremia morei siedzekesiko mia puo üyalie.”

¹⁵ Puo sie uko ki, di siro “Nieko a üse supuo üya ga?”

¹⁶ Siru Simon Pitor sie, “No Khristau, rhei tuoyakezha Ukepenuopfü Nuou zo.”

¹⁷ Sitse Jisu sie, “Jona nuou Simon, no thejakepfütho zo, chüüzie nunu monyü, teigei keba a Puou thuo pie n pesipengushü zokecü la.

¹⁸ Süla harie, no Pitor, a tsiedi hau geinu a kehou chütuo; siro Hades kharuko puo penyülie lho.

¹⁹ A teigei kedi cabiko pie n tsütuo; tsiu no kijü nu khakecüko teigei rei khatuo mu mhakehoupuorei kijü nu khrüshü ro teigei rei khrüshü zotuo,” sita.

²⁰ Süsie puoe pethakelieko bu puo Khristau zo ükecü se mia puo ki rei pu hienuwa.

Jisu Puo Mezhie mu Puo Se Dze Kepu

²¹ Sü yawinu Jisue Jerusalem nu vo di phichüko mu zievokezhako siro thezhokepethako dzie nunu kemezhie phiketuo mu mia bu puo dukhriwa di zha se nhie rheilasielie morosuo ükecü pupie pethakelieko kie tuota.

²² Sitse Pitor puo ze mharapuo vo puo kerhie di sie, “Niepuu, kenyüthor! Mhakipuorei n bu silie lho zo.”

²³ Sitse Jisu reipra Pitor ki, “A sietsa votalie, Satan! No a chakha puo zo, kekreilamonyü no Ukepenuopfü medoko le monyü themia medoko leyakezha zocü la,” sita.

Krus mu U Thuo U Meliekecü

²⁴ Süsie Jisue pethakelieko ki, “Kehoupuorei a siemedzi kenyümia sümia bu u thuo u meliewa, mu u krus pielie, di a siemedziliecie.

²⁵ Kekreilamonyü kehoupuorei u thuo u phou pekru nyükezhamia süu pejüwatuo; derei kehoupuorei a la puo phou pejükeshüu süu ngu lalietuo.

²⁶ Siro miapuonie kijüu pete peviepie puo vie chülie ürei puo phou pekapejüwa ro kedipuo pralietuo ga? Morei mia puo kedipuo pie puo phousou chülie vituo ga?

²⁷ “Kekreilamonyü Themia Nuou puo Puou zayie se di puo dielieko ze tsurtuo, mu puoe mia puopuo mhatho kheki sü chü zhakhra chüshütuo.

²⁸ A nieko ki pu toushütuo, haki ketha themia huo Themia Nuou puo kedi chü kevor ngu kemochie sialie lho,” sita.