Mathi 15 - Angami Naga CL (Re-edited) Bible (BSI)

U Pfutsanuoko Kepetha Die

¹ Süsie Farisiko mu thezhokepethako huomia Jerusalem nunu Jisu ki vor di sie,

² “Kiüdi noe pethakelieko bu u phichümia zho varhuoya ga? Uko mhakecü mhodzü uko dzie meteiya mo.”

³ Sitse puo uko ki, “Nieko kiüdi nie thuo nie zhoko la Ukepenuopfü diekhakeshüu varhuoya ga?

⁴ Kekreilamonyü Ukepenuopfüe pucü, ‘N puo mu n zuo rhulie,’ tsiu ‘kehoupuorei puo puo morei puo zuo gei die kesuo pu ro, puo bu sia zotuo.’

⁵ Derei nie kehoupuorei puo puo morei puo zuo ki, ‘A mha pie nie khruohi kezhüu pie Ukepenuopfü tsüwate,’ iwa ro sümia we u puonuo rhu mo rei vi üya.

⁶ Sidi nie thuo nie zhoko la Ukepenuopfü die pie kemethuo chüwate.

⁷ Nie ketherakezhako! Isayae nieko dze siedzedie pu toupie zhü:

⁸ “ ‘Themia hako u tie se a rhuyakezha zo, derei uko nou we vo ratsa tuo;

⁹ Uko a rüsuo thedo chü, kekreilamonyü ukoe themia thuo rhükelie zhoko üse kepetha die üdi pethaya!’ ”

U Va Perhuwayakezhako

¹⁰ Süsie puoe themia krodiu kiepie puo ki shülie di sie uko ki, “Rünyülie di puocapuola siliecie.

¹¹ Themia me nu keleko themia va perhuwaya mo, derei themia me nunu parkezhako thuo themia va perhuwaya.”

¹² Sitse puoe pethakelieko vor di puo ki, “No pukeshüu la Farisiko u nou kekrütakecü si ba mo?”

¹³ Derei puo la sie, “Teigei keba a Puoue leishü kemo seiünha kheko phewatuo.

¹⁴ Uko bu si ba zolie; ukoe mhiciemia di mhicieko cha tha tuoyakezha zo. Siro mhiciemia thuo mhiciemia cha tha ro, kenienie te thekhe nu letatuo,” sita.

¹⁵ Derei Pitor sie puo ki, “Dievi hau ca pupie hie kieshücie.”

¹⁶ Sitse puo sie, “Nieko tsie rei mha hako lelieya mo me?

¹⁷ Mhakehoupuorei u me nu keleu u va nu ke, di khapie cavüchü nu shüwayakecü nie si mo me?

¹⁸ Derei u me nunu parkezhako u melou nunu parya, mu süko u va perhuwaya.

¹⁹ Kekreilamonyü u melou nunu kerüzhü noudoko, mia kedukhri, pieü, pierüü, kerügu, ketijü zhapu, mia ketha hako paryakecü la.

²⁰ Mha hako thuo themia va perhuwaya; derei u dzie metei mo di mhacükezha la themia va perhuwaya mo.”

Kananmiapfü Puo Kepele

²¹ Süsie Jisu thechü sünunu tuo Tur mu Sidon rünatsa vota.

²² Süki sütsa lhouyakezha Kananmiapfü puo vor puo ki, “Niepuu, David Nuou, no a ngumezhieshücie! A nuopfü terhuokesuo bu puo kebi ze tuote,” idi cha shiekhouita.

²³ Derei puo dieca puorei pie hapfü ki pu la mota. Sitse puoe pethakelieko vor puo ki pu bei di, “Puo ketsewacie, kekreilamonyü puo u siemedzi shie tuo zotakecü la,” sita.

²⁴ Ru puo la sie, “A ketsepie Israel seyie jüketa tekuoko ki rübei keshü zo.”

²⁵ Derei hapfü phir puo mhodzünu khoutoupfü di sie, “Niepuu, a khruohishü zocie,” ilata.

²⁶ Puo la sie, “Nhicunuoko nouva kelhoupie tefünuoko tsükewa puotou mo.”

²⁷ Sitse hapfüe sie, “Ulie, Niepuu, sirei tefünuoko zorei u niepumia mizhü geinu uca rürie ketsuko rei pacüya zolie,” sita.

²⁸ Süla Jisu hapfü ki, “Thenupfü, n kepele zha za ha! N kemenguu chüpie n ketsüu chüliecie.” Sitse sümesetouki puo nuopfü sü vilieta.

Jisu Kechümia Kekra Chü Pevikeshü

²⁹ Süsie Jisu sünunu tuo Galil dzükezha merhie vota, siro puo kijüthouu gei kho di sügei balie.

³⁰ Sitse themia krodikoe phiyhomia, kerünyiemia, mhiciemia, keliehuomia mu kekrei kekra rei ze puo ki vor. Ukoe süko khapie puo phi ki shü, sitse puo süko chü pevishü,

³¹ süla themia kroko keliehuomia die pukelie, kerünyiemia vikelie, lalhimia chatuokelie mu mhiciemia mha nguketa ngushü di uko ngota. Sidi uko Israel Kepenuopfü tsheta.

Jisu Themia Nyie Dia Vachükeshü

³² Süsie Jisue pethakelieko kie kengupie puo ki shülie di sie, “A themiako ngumezhiete, kekreilamonyü uko zha se a ze tuote mu mhapuorei kecü jüketa la; mu a uko vachü mo di uko ketseshü nyü mo, kekreilamonyü uko cha nu phisiata rei si momu.”

³³ Sitse pethakelieko sie, “Úko rayha nu tuokecü ha kirapuo nu kecüca krodi haicü kelhuo ngulietuo ga?”

³⁴ Sitse Jisu sie, “Nieko niekhrüda kitsuo tuoluo ga?” Sitse uko sie, “Thenie mu khuo kecü huo.”

³⁵ Sitse puo themia kroko bu ke kijü balienushü.

³⁶ Sidi puo niekhrüda thenieko mu khuoko pielie di kethezie khashü di süko bietshielie di pie pethakelieko tsüshü, mu pethakeliekoe khapie themia kroko tsüshü.

³⁷ Sidi uko pete süko cü di pevü phrelie, süsie ukoe cü kepesha puoseko merha ketshu thenie kengulie.

³⁸ Siro uko keze mhakecüko thenuthenuo mu nhicunuoko sa kemo mia nyie dia.

³⁹ Jisu themiako ketsekewa sie puoe rou nu lelie di Magadan kijütsa vota.