Mathi 14 - Angami Naga CL (Re-edited) Bible (BSI)

Johan Mia Dzülukepfüu Se

¹ Süki kediu Herod Jisu meyie parketa dze sishü;

² sitse puo sie puo kituoko ki, “Hau Johan mia dzülukepfüu zo; puoe kesia nunu rheisiete, süla ungomhatho hako puo geinu chü keba zo,” sita.

³ Kekreilamonyü, Herod-e puo siezeu Filip kimia Herodiapfü la Johan telie di puo phapie kedieki nu shüwa,

⁴ Johan puo ki, “No süpfü liekecü thezho mo!” sikeshü la.

⁵ Siro Herod puo dukhriwa nyü tuo rei, puo themia kro-u preita, uko puo üse siedzekesimia puo üketa la.

⁶ Derei Herod kepenuo teisozhau vor tse, Herodia nuopfü mia mhodzünu nashüshü, di Herod nei chülieta,

⁷ süla puo keneipfü süpfü mhakehoupuo cha rei pie puo tsüketuo rüseshüwata.

⁸ Sitse süpfü puo zuo die lie di, “No Johan mia dzülukepfüu tsü pie mekhou puo nu shülie di se vor a tsücie.”

⁹ Sitse kediu puo nou kemezhie phita, derei puo rüse dieu la mu puo kinu hie kebako la süu khashü puo tsütuo üdi pushüwa;

¹⁰ sidi puo mia ketsepie kedieki nu shü di Johan tsü zielie.

¹¹ Sidi mekhou puo nunu puo tsüu pie vor rüüpfü tsüwa, mu süpfü rei süu se vo puo zuo tsüwa.

¹² Sitse puoe pethakelieko vor puo rüngetsa toupie vo khruwa; sidi uko vo Jisu ki pushü.

Jisu Mia Nyie Pengou Vachükeshü

¹³ Süsie Jisu süu silie tse, puo thuo rou puo nunu mia kejüra puo vota. Derei themia kroko süu sishü tse, uko rünako nunu tuo vor puo siemedzita.

¹⁴ Siro puo kijü keso nu par tse themia krodi puo ngu; sitse uko ngu puo noumezhieta di uko kechükenyüko chü keshürhoshü.

¹⁵ Siro thevatietazhü tse puoe pethakelieko puo ki vor di sie, “Thechü hau mia kejürate, mu menuote; süla themiako ketsewa di uko bu vo rünako nu u thuo u la kecüca khrülietacie.”

¹⁶ Sitse Jisu sie uko ki, “Uko bu tuota morei vi; nieko mha huo khapie uko bu cücie!”

¹⁷ Siru uko sie, “Hieko niekhrüda pengou mu khuo kenie rübei sie kekrei puorei tuo mote.”

¹⁸ Sitse puo sie, “Süko se a ki vorlie,” sishü.

¹⁹ Siro puo themiako bu phiechü gei balienushü. Süsie puo niekhrüda pengou mu khuonie pielie di tosie teigei meho di jashü; süsie niekhrüdako bietshielie di khapie pethakelieko tsüshü, mu pethakelieko rei süko pie themia kroko tsüshü.

²⁰ Siro uko pete rei cülie mu pevü phrelie; mu uko puose cü kepeshako khopenuo kerekenie ketshu pfhülie.

²¹ Siro süko cükecü, thenuthenuo mu nhicunuoko sa kemo mia nyie pengou mese.

Jisu Dzü Mho Chatuokecü

²² Süsie puoe themia kroko ketse ketha ki pethakelieko bu rükri rou nu le balie di puo mhodzü rie dzükezha khie kekreitsa pfülienushüwa.

²³ Siro puo themiako ketsewaketa sie, puo rübei kecha chütuoü kijüthouu gei vota. Siro thevatieta tse, puo rübeita,

²⁴ derei süki rouu kijüu ze pecietho vota mu dzü rüpfhü sier süu vata, kekreilamonyü teirükrierükhrie uko hetacü la.

²⁵ Siro khiserüna Jisue dzükezha mho geinu cha tuo uko ki vorzhü.

²⁶ Derei pethakelieko puo dzükezha gei vorkezhü ngu tse, ukoe michie zo shiekhoui di sie, “Temi puote,” ita.

²⁷ Derei Jisu rükri sie uko rüchü di, “Thepfulie! A zomu; michie hiecie,” sishü.

²⁸ Sitse Pitor sie, “Niepuu, no zo ketho ro, a bu rei dzü mhonu tuo n ki phirlie kevi chüshücie.”

²⁹ Sitse puo sie, “Phirlie,” ishü. Süla Pitor rouu nunu par di dzü mho geinu cha tuo Jisu ki phi.

³⁰ Derei puo teirükhrie phi keba ngu di michieta, sidi rüle dzü khro letatuo üta. Sitse puo shie puo rhiechü di sie, “Niepuu, a kelashücie!”

³¹ Siru Jisu rükri puo dzie yhapie puo mezalie di sie, “Harie n kepele ketsau, no kiüdi kenoudota ga?” sita.

³² Siro unie rouu nu lekelie sie teikhrieu lata.

³³ Süki rouu nu ketuoko vor puo rüsuo di sie, “No Ukepenuopfü Nuou ketho zo,” sita.

Jisu Genesaret nu Kechükenyüko Chü Keshürhokeshü

³⁴ Süsie uko süu cie pralie tse tuo Genesaret kijü nu vorlie.

³⁵ Sitse themia sünu kebako puo silieta, sidi uko mia ketsepie rüna sükhieümhou keba pete nu shü di mhachü keba pete ze puo ki vor,

³⁶ sidi ukoe kechükenyüko bu puo pfhephrie zorei bienu cha; mu süu biekelie khe shürholieta.