Mathi 13 - Angami Naga CL (Re-edited) Bible (BSI)

Lieciemia Puo Tsia Keva Dievi

¹ Siro sünhie Jisu ki sünunu tuo vo dzükezha khieki balie.

² Sitse mia krodi vor puo khieki kengulieta, süla puoe rou puo nu le balie mu themiako pete keso nu tha.

³ Sitse puo dievi nunu uko ki mha kekra pu di sie, “Rünyüliecie! Tsiakevau puo tsia vatuoü tsu.

⁴ Siro puo tsia vakeshü ki huo te cha nu tsuta, sidi perako vor süko pa cülieta.

⁵ Siro huo te kijü puojü shü kemo ketsietsoru nu tsuta, mu rünyo shü kemo la süko tsü mha sierta.

⁶ Derei teirünia par uko phieshü tse; süko u mie kejü la phie kerüwiwa.

⁷ Siro huo te zohu donu tsuta, süla zohuko zha sier uko gekhriwa.

⁸ Derei kekreiko te kijü kevi nu tsulie di puo si vülie, huo krie puo, huo hiesorou mu huo ser.

⁹ Kehoupuorei u nyie kenyimia bu rünyüliecie.”

Dieviko Kese Ca

¹⁰ Sitse pethakelieko vor di puo ki, “No kiüdi dieviko nunu uko ki mha puya ga?” sidi ketsota.

¹¹ Sitse puo sie, “Nieko bu zo we teigei kedi dze kesouko silie kevi pie tsüwate, derei süu pie uko we tsü mo.

¹² Kekreilamonyü kehoupuorei mha puo gei kebau pie tsü sashütuo, sidi puo bu kra philietuo; derei mhapuorei ba kemo-u we, puo kinu puo kebayo rei chüsetatuo.

¹³ Haha la a dievi nunu uko ki puyakecüu sü ‘uko mehocü we mehoya, derei nguya mo, uko rünyücü we rünyüya, derei puoca silieya mo.’

¹⁴ Hau Isaya siedzekesiu uko dze pupie kezhü: ‘Nieko rünyü we rünyütuo, derei silie lho; mu nieko meho we mehotuo, derei lelie lho.

¹⁵ Kekreilamonyü themia hako melou rüvote, tsiu uko nyie kenyiebite, siro uko mhi rei mhimie tuote; mocü sie we uko mhi mha ngulie, mu uko nyie mhapfhe silie, tsiu uko nou pie puocapuola silie sidi rüreilie, sitse a uko chü keshürhoshütuomu ru,’ ikecü dieko uko geinu tseilieta zo.

¹⁶ Derei nie mhi mha ngulieyakezha mu nie nyie mhapfhe silieyakezha la nie thejakepfütho.

¹⁷ A nieko ki pu toushütuo, siedzekesiko mu miathomia kekra nie nguyakezhako ngu nyü phi vor, derei ngulie mo, uko nie rünyükezhako rünyü nyü phi vor, derei rünyülie mote.

Jisu Dievi Cau Pukeshü

¹⁸ “Siro tsia keva dieviu ca rünyüliecie.

¹⁹ Themia huo kedi dieu rünyülie di puoca lelie mo keba nu, kesuou vor di puo melou nu leketau sesetaya; haue tsia te cha nu tsuketau zo.

²⁰ Tsia te ketsietsoruko gei tsuketau liro rünyüshü mu u nei siei di lie mhaikelieu mhie zo.

²¹ Derei themia süu puo mie kejü la zopuoki rübei bakelie zotaya; sidi dieu la kemezhiekecü morei mia u pesekecü sier tse puo tetsu mhataya.

²² Siro tsia vapie zohu donu shükewau, themia süu dieu rünyülie, derei kijüu rüliko lepie thenou kenyü chü mu kishükinyi kemehou bu dieu gewa, sidi puo si vülie moketau zo.

²³ Derei tsia vapie kijü kevi nu shükewau zo we dieu rünyülie di puoca silie; mu puo si rüchülie petuoya, sidi huo krie puo; huo hiesorou mu huo ser vülieya.”

Zotshü Tsia pie Kedievikeshü

²⁴ Puo dievi kekrei puo pie uko ki pu di sie, “Teigei kedi-e mia puo puo lha tsia kevi pie tsu puo lie nu prukeshü mhie zo;

²⁵ derei mia zeketa ki, ngumvümia vor zotshü tsia pie telha donu prushüwa di tuota.

²⁶ Siro telhako lhou sier puo si rüchülie tse, zotshüko rei parta.

²⁷ Sitse themiau kituoko vor di sie puo ki, ‘Niepuu, no telha tsia kevi pie n lie nu prushü mo me? di siro zotshü hako kirapuo nu vorta ga?’ sita.

²⁸ Sitse puo uko ki, ‘Ngumvümia thuo hau chüshüwate.’ Sitse kituoko la sie puo ki ‘No hie bu süko piewaketuo n medo me?’ ita.

²⁹ Derei puo sie, ‘Si lho, nieko zotshü pie kengu vo tse telhako rei sa shülouwatuomu.

³⁰ Lieyie tei vor kemochie unie kenienie bu keze lhou balie; siro lieyie tei vor tse a thuo liekereko ki zotshüko bie kengulie rie di thewaketuo la süko khrolie, derei telhako we pie vo a lhaki nu kenguliecie,’ siwatuo.”

Gakrie Tsia pie Kedievikeshü

³¹ Süsie puo dievi kekrei puo pie uko ki pu la di: “Teigei kedi-e mia puo gakrie tsia yopuo se tsu puo lie nu ciekeshü mhie zo.

³² Süusü mha tsiako donu kecütho zo, derei lhou sier zhalie ro ga pete donu kezhatho puo chülieya, sidi seibo chülie di teirako bu puocoko geinu puo kru chülie kevi chülieya.”

Khrei pie Kedievikeshü

³³ Puo uko ki dievi kekrei puo pu di sie, “Teigei kedi-e khrei kemhie zo: miapfü puo khrei se vo thou kemejü ketshu se nu shüshü di süu pou kepar pfhe keba mhie zo.”

Jisu Dieviko Kese

³⁴ Jisue mha hako pete dievi nunu themia kroko ki pu; puoe dievi se mo di uko ki mhapuorei pu mo.

³⁵ Puo hau chükeshü thiedzü siedzekesiu bu: “A a tie bu dievi pie mha putuo; A kijü chülie tsenu keviepieketuoko pushütuo,” isi pie kezhü dieko bu tseilieketuo la.

Jisu Zotshü Tsia Dieviu Ca Pukeshü

³⁶ Süsie puoe themia kroko khawa di kinu leta. Sitse puoe pethakelieko puo ki vor di sie, “Lieu nu zotshü dze dieviu puoca hie ki pushücie.”

³⁷ Puo sie, “Tsia kevi prushüyakezhau sü Themia Nuou zo;

³⁸ lieu sü kijüu, mu tsia keviko sü kedinuonuoko; zotshü tsiako sü kesuou nuonuoko zo;

³⁹ siro süko prukeshüu ngumvü süu terhuokesuou; siro lieyieu sü kelhou tei thelatsa, mu liekereko sü teigeidielieko zo.

⁴⁰ Siro zotshü rhe kengupie mi nunu thewayakezha tuoi vo kelhou thelatsa rei sümhie zotuo.

⁴¹ Themia Nuou thuo puo dielieko ketseshü di uko bu puo kedi nu mia chü kephoumawayakezha pete tsiu ketho kemo kephouma pete pfhü kengulietuo,

⁴² sidi süko kelhoupie kemeriecü miü nu shüwatuo, sidi sünu kra mu u hu thegeipie batuo.

⁴³ Siro kemiathoko we Puou kedi nu niaki tuoi ziekruoipfü batatuo. Themia kehoupuorei u nyie kenyimia sümia bu rünyüliecie.

Keviepie Kezhü Kinyi Dieviu

⁴⁴ “Teigei kedi-e lietsa puo nu kinyi keviepie kezhü mhie zo; mia puo vo süu ngulie di kevie lapie zhüwa; süsie puo keneipfü vo di puo vie ketuo peteko zelie di se vo süu khrülie.

Cü pie Kedievikeshü

⁴⁵ “Süsie rei teigei kedi-e lhithomia puo cü puoma kerepfü pfhü ketuo mhie zo;

⁴⁶ sidi puoe cü puoma kerethopfü puo ngulie, sitse puo vo puo vie pete zelie di süu khrülie.

Jal pie Kedievikeshü

⁴⁷ “Süsie rei teigei kedi-e jal kelhoupie dzükezha nu shü di khuo neiünei tekelie mhie zo;

⁴⁸ Siro jal tshulie tse mia bu süu teshü dzükezha khie parlie, süsie ke balie di keviko pie u viebou nu shülie, derei kesuoko kelhouwa.

⁴⁹ Süla themia kelhou thelatsa rei sümhie zotuo. Teigeidielieko vor di kemiathoko donunu kerüzhüko kho kreiwatuo.

⁵⁰ Mu süko kelhoupie kemeriecü miü nu shüwatuo, sünu kra mu u hu thegeipie batuo.

Kinyibou Puo nu Mha Kesa mu Kewe pie Keba

⁵¹ “Nieko hako pete ca siliete mo?” Sitse uko sie, “U” sita.

⁵² Sitse puo uko ki, “Süla thezhokepethamia kehoupuorei teigei kedi dze pethapfülieketamia sü ki niepumia puoe kinyibou nunu mha kesa mu kewe hielakeshü mhie zo.”

⁵³ Siro Jisue dievi hako pu thewa tse sünunu tuota.

Nazaret nu Jisu Melieketa

⁵⁴ Siro puoe la puo thuo puo ra vor di sinagog nunu mia petha sedevü, süla ukoe u ngo di sie, “Themia hauha kirapuo nu mhasi hakemhie ngulie, mu kekuo kezha hako ngulieta mu?

⁵⁵ Puo sei mistiri nuou zo mo me? Puo zuo Maria mo me? Siro puo siezeko Jakob mu Josef tsiu Simon mu Juda nuoko mo me?

⁵⁶ Siro puo üpfünuoko pete u ze ba mo üme? Di siro puo kirapuo nu mha hako pete ngulieta ga?”

⁵⁷ Sidi uko puo gei unou kekrüta. Derei Jisu uko ki, “Siedzekesimia puo thuo puo ramia mu puo kikruu nu zo kemosie mia puo rhuyakemo jü.”

⁵⁸ Siro ukoe puo pele moketa la, sünu ungomhatho chü pekra mota.