Mathi 12 - Angami Naga CL (Re-edited) Bible (BSI)

Sabat Dze Ketsokecü

¹ Siro Jisu sabat zha puo nhie tuose lievu puo pfüthe vozhü, süki puoe pethakelieko merü tuota; süla uko telhakre merhelie di cü tuo.

² Siro Farisiko süu ngushü di sie Jisu ki, “Harie, noe pethakelieko sabat nhie chükecü hau thezho kemo puo chü tuote.”

³ Sitse puo uko ki, “Nieko David mu puo ze ketuoko merüketa ki kedipuo chüte shikecü dze phrü mo zo me?

⁴ Puo Kepenuopfü ki nu le di zievoko rübei sie kekreimia cüya kemo zho varhuo di Kepekieniekhrüda cü ze.

⁵ Sizomonyü zievoko thuo zorei sabat nhie rüsuokiu nunu sabat perhuta zorei kejo jü ükecü nieko thezho-u phrü mo zo me?

⁶ Derei a nieko ki pushütuo, rüsuokiu ki rei zhakuokecü puo haki tha.

⁷ Sirei, ‘A ruosuou ki rei ngukemezhie a nei,’ ikecü dieu ca niekoe sikecü sie we jokemomia pejolie lheciü.

⁸ Kekreilamonyü Themia Nuou sabat mho rei niepuu zokecü la.”

Dziesiamia Puo

⁹ Siro puo thechü sünunu tuose uko sinagogko nu vota.

¹⁰ Sitse sünu dziesiamia puo ba di ngulie. Süki uko puo pejo kenyü la puo ketso di, “Sabat nhie mia chü keshürhokecü thezho me?” ita.

¹¹ Derei puo sie “Mhanuü nieko huomia tekuo puo nyi di sabat nhie süu te kheho puo nu leta ro, puo süu merhashü par chazou shü motuo me?

¹² Di siro themia tekuo ki rei puoma re phi mo üme? Süla sabat nhie mha kevi chükecü puotou zo.”

¹³ Sidi puo themiau ki, “N dzie petoshücie,” sitse puo chashü ru süu vi lapie kekreitsatie mhielieta.

¹⁴ Derei Farisiko pra di kikemhie di puo biewatuo shiü rhüta.

Ukepenuopfü Kedakelie Kituou

¹⁵ Sirei Jisu mha hau silie tse, puo sünunu tuota, siro mia kekra puo siemedzita; mu puo süko pete chü keshürhoshü,

¹⁶ siro puo süko bu puo dze pu pesi hienu kekhawa.

¹⁷ Hau Isaya siedzekesiue pukeshüu tseilieketuo la zo:

¹⁸ “Harie, a kituou, a thuo puo kedakelieu, a khrieu, a nou zorei puo neiyakezhau. A a Ruopfü pie puo gei shütuo, mu puoe kethoca se Judakemoko pesishütuo.

¹⁹ Puoe mia ze keprüli tsiu shie zo tuolie lho, morei chapfüchaüko nu miapuorei puo pfhe silie lho.

²⁰ Puo kethocau bu kuolie kemochie; puoe tekhrie tsakezhü puorei bietshewa lho, tsiu puoe mi kepetu lo khukezhüyo rei pemhewalie lho!

²¹ Mu Judakemoko puo zau gei u kemerü batuo.”

Jisu mu Belzebul

²² Süki mia terhuokesuo bu kebi ze ketuo puo mhicie mu liehuokecü puo ze puo ki vor; ru puo süu chü pevishü, sidi keliehuo süu bu die pulie mu mha ngulie.

²³ Sitse themia kroko pete u ngo di sie, “Hau David nuouta zo monyü?” sita.

²⁴ Derei Farisiko süu sishü di sie, “Hau terhuokesuoko kediu Belzebul la zo kemosie terhuokesuoko whuolieya mo,” sita.

²⁵ Süki Jisu uko noudoko silie di sie uko ki, “Kedi kehoupuorei puo thuo puo pfüphrota ro kataya, mu nadi morei kikru kehoupuorei puo thuo puo pfüphrota ro thalieya mo.

²⁶ Siro Satan thuo Satan whuota ro, puo thuo puo pfüphrote, siliro kikidi puo kedi thalie ta?

²⁷ Mhanuü a Belzebul se di terhuokesuoko whuota üro nieko nuonuoko supuo kekuo se di süko whuowa ga? Süla süko thuo nieko ketsotuo.

²⁸ Derei a Kepenuopfü Ruopfü kekuo se di terhuokesuoko whuoya liro, siro Kepenuopfü kedi vor nie tso bate.

²⁹ Morei mia puoe kekuomia puo phawa perie moro kikidi le süu kinu puo vieko chülie vi ta? Puo phakelie sie nu puo kinu vieko chüliecü zotuo.

³⁰ Kehoupuorei a kitsa kemomia a ngumvümia zo, mu kehoupuorei a ze mha kengukemo-u mha kezakeziwayakezha zo.

³¹ Süla a nieko ki pushütuo, kephouma mu mia ketha kehoupuorei vapie themia tsütuo, derei Ruopfü ketha we vapie tsülie lho.

³² Kehoupuorei Themia Nuou gei die kesuo pu ro vashü puo tsütuo; derei kehoupuorei Kemesa Ruopfüu gei die kesuo pu ro, tsiedo kelhou ki mu tsiesieu nu rei vashü puo tsülie lho.

Seibo mu Puo Si

³³ “Seibo-u theke pevishülie, siro puo si kevi vülietuo; moro seibo-u theke pesuoshülie, siro puo si kesuo vüshütuo; kekreilamonyü puo si geinu puo bo-u silieyakezha la.

³⁴ Nieko prielepfü seyieko, nieko vi mo di kikidi mha kevi pulie vi ta? Kekreilamonyü u nou mha kekra bakecü la u tie bu pu parya.

³⁵ Themia kevimiae puo kinyibou kevi nunu mha kevi hielashüya, mu themia kesuomia puo kinyibou kesuo nunu mha kesuo hielashüya.

³⁶ A nieko ki pushütuo, themia die pukezha diethuodieruo kheko la rei u rüli ketsokecü nhie pu la phre zotuo,

³⁷ kekreilamonyü n dieko la no mezhülietuo, mu n dieko la no jotatuokecü la.”

Zasi Puo Chakecü

³⁸ Süsie thezhokepethako mu Farisiko huomia la sie puo ki, “Kepethau, hie n bu zasi puo chüshü di ngu nyüyalie,” sita.

³⁹ Derei puo uko ki, “Kerüzhü mu pieüpiera phou hau zasi pfhüyakezha zo, derei siedzekesiu Jona geinu chükeshüu sie zasi kekrei kha lapie puo tsü salie lhote.

⁴⁰ Jona teisozha se mu teizeizha se khuo kezhau vadi nu kezhü tuoi Themia Nuou rei teisozha se mu teizeizha se kijü vadi nu zhütuo.

⁴¹ Siro mia nyie kecüketuo zha nhie Ninevimiako themia phou hau ze sie di uko pejotuo, kekreilamonyü uko Jona kepetha die sikeshü ki u kephouma nunu thenoukedilie, mu harie Jona ki zhakuokecü puo haki tha zo!

⁴² Mia nyie kecüketuo nhie Pekhrotsa kedipfü themia hako ze sie di uko pejotuo, puo kijü vala nunu Solomon mhasidie rünyütuoü vorkecü la, mu harie, Solomon ki zhakuokecü puo haki tha zo!

Mesa Kemo Ruopfü La Kevor

⁴³ “Siro mesa kemo ruopfüe mia puo geinu praketa ki süu puo rüleichü pfhü dzü kejüko nu voya, derei süu ngulieya mo.

⁴⁴ Sitse puo sie, ‘A thiedzü ba di praketa a kiu nu la votatuo.’ Sidi puo sünu vor tse ki süu methuo mu ketso kezivipie keba ngulieya.

⁴⁵ Sitse puo tuo la pra puo ki rei suokuokecü ruopfü kekrei thenie ze la vor di uko keze ki sünu bataya; sidi themia süu rüli kenuotsa therietsa ki rei suokuotaya. Tsiedo themia kesuo phouu rei sümhie zotuo.”

Jisu-nuo Zuo mu Puo Siezedzürieko

⁴⁶ Siro puo themiako ki mha pu tha zoluocü nu, puo zuo mu puo siezedzürieko puo ze kerüchütuoü puo pfhü vor kitie thata.

⁴⁷ Süki mia puoe puo ki, “Harie n zuo mu n siezedzürieko n ze kerüchütuoü n pfhü vor kitie thalie.”

⁴⁸ Derei Jisu la sie hau pukeshüu ki, “Supfüpuoe a zuo mu suomia a siezedzüriemia ga?”

⁴⁹ Sidi puoe puo dzie chapie puoe pethakelieko tha di, “A zuo mu a siezeko sü hakowe!

⁵⁰ Kekreilamonyü kehoupuorei teigei keba a Puou medo chüyakezhamia sü a siezemia, a üpfünuo mu a zuonuo zo.”