Mathi 11 - Angami Naga CL (Re-edited) Bible (BSI)

¹ Siro Jisu die hako pie puoe pethakelie kerekenieko tarhokeshü sie, puo sünunu tuo uko nadiko nu mia petha mu puo dielieu pupie mia kietuoü vota.

Johan Mia Dzülukepfüu Dielieko

² Siro Johan kedieki nunu Khristau mhathoko sikelie ki, puoe pethakelieko huo ketsepie puo ki shü,

³ mu uko puo ki, “Mia puo vortuoü ketuou no me? Mo hie bu kekrei puo merü batuo ga?”

⁴ Sitse Jisu sie uko ki, “Nieko vo di Johan ki nie kerünyü mu kenguko pushücie:

⁵ Mhiciemia mha ngulie bate, phiyhomia chatuolie bate, mpa kechüko chü kemesalie bate, nyievümia mhapfhe silie bate, kesiamia rhei lalie bate, tsiu dieliekeviu pupie kejümia kieshü bate.

⁶ Mu kehoupuorei a gei jata kemomia thejakepfütho.”

Jisu Johan Mia Dzülukepfüu Ketshe

⁷ Siro süko tuotazhü tse, Jisue Johan dze pu themia krodiko kie di: “Nieko rayha nu kedipuo mehotuoü pra ga? Teikhrie bu he kenie keba tekhriebo puo me?

⁸ Mo, nieko kedipuo mehotuoü vo ga? Pfhenei puolo kemenepfü sekezhamia puo me? Pfhenei puolo kemene seyakezhamia kedimia kinu baya!

⁹ Di siro nieko kedipuo mehotuoü pra ga? Siedzekesimia puo me? U, mu sizomonyü siedzekesimia ki rei zhakuokecü puo zo.

¹⁰ Themia hau dze thupie ketuo, “ ‘Harie, a n mhodzü a dielieu ketseshüzhie, puo n mhodzünu n chau kesetuo,’ isi pie kezhüu zo.

¹¹ A nieko ki pu toushütuo, thenumia geinu lhou keparko donu Johan mia dzülukepfüu ki kezha puorei lhou sier mo; derei teigei kedi nu we kecütho-u zorei puo ki zhakuo.

¹² Johan mia dzülukepfüu teiki nu vor tsie ketso mia teigei kedi pfhü mvürümvü tuote, mu mvürümvü ketuomia süu pie u vie chüliezhie.

¹³ Siro Johan kevor mhodzü siedzekesiko pete mu thezho-u rei siedzedie pu vor zo;

¹⁴ tsiu nieko süu lietuo üro, puoe vortuo üdi pupie kezhü Elijau zo.

¹⁵ U nyie kenyimia bu rünyüliecie!

¹⁶ “Derei a bu tsiedo nuoko pie kedipuo ze kemejülie vituo ga? Sükosü nhicumia lhithochüko nu huoniehuo kie di,

¹⁷ “ ‘Hie luoü khou nie kie, sirei nie nie dowhuolie mo; hie thekrü chüshü, derei nie kralie mo,’ ikeba mhie zo.

¹⁸ Kekreilamonyü Johan vorkecü ki mhacümhakrie mo ru ukoe sie, ‘Puo terhuokesuo zeya!’ si.

¹⁹ Themia Nuou vor mhacümhakrie ru, uko puo ki, ‘Harie, cahuocayau mu kemezeu, khezhanuo kekhruoko siro kephoumako khrietho-u!’ ite. Derei mhasi zo we puo mhatho geinu puo mezhüko tha toushüya!”

Pele Kemvü Rünako

²⁰ Siro puoe ungomhatho kekra chükeshü rünako nu themiako thenoukedilie moketa la süko kerhieta.

²¹ Sidi sie, “Ce, Korasin! no we chülietie! Ce, Bethsaida! no we chülietie! Mhanuü nnie kinu chükeshü ungomhathoko Tur tsiu Sidon nunu chüshü ükecü we, uko gakhropfhe dzie mu mige pie u kenhepfü di thiedzütho nu uko nou kedilietatieciü!

²² Derei a nieko ki pushütuo, mia ketsoketuo zhanhie nieko ki rei Tur mu Sidon-nie we hielie rüükuotuo.

²³ Siro no Kapernaum, n chü kerükrie kho tei thutuoü ba me? Mo, n chü kerünuopie tsu Hades nu shüwatuo. Kekreilamonyü n geinu chükeshü ungomhathoko Sodom nu chüshü ücüwe, thie ketso rei süu ba zotieciü!

²⁴ Siro a n ki pushütuo, mia ketsoketuo zhanhie n ki Sodom kijüu we hielie rüükuotuo.”

A Ki Vor di Rüleilie

²⁵ Süteiki Jisu sie, “He-i, a Puo, tei mu kijü Niepuu, a n tsheya, kekreilamonyü no mhakesikeleko ki we mha hako keviepie tuo di pie nuoranuoko pesipengukeshü la.

²⁶ Ketho, Apuo, sikecü n neikecü la.

²⁷ A Puo thuo mha pete pie a dzie nu shüwate; mu Puou thuo zo kemosie miapuorei Nuou siya mo, sütuoi Nuou mu Nuou thuo süu thapie kieshüketuoko zo kemosie miapuorei Puou siya mo.

²⁸ “Kemezhie mu nie pie mesikezha khe a ki vorliecie, siro a kerülei pie nie tsütuo.

²⁹ Nieko a vocie pfülie, mu a kinu mhasilie; kekreilamonyü a zho vi mu a nou ko mocü la; silie liro nieko nie nou kerülei ngulietuo.

³⁰ Kekreilamonyü a vocie pfü rüü mu a pieu rei medza.”