Mathi 10 - Angami Naga CL (Re-edited) Bible (BSI)

Apostel Kerekenieko

¹ Süsie Jisue puo thuo pethakelie kerekenieko kie kengulie di uko bu mesa kemo ruopfüko whuolieketuo, mu kechükenyü tsiu kesuokemezie neiüko chü keshürholieketuo kekuo khapie uko tsüshü.

² Siro apostel kerekenieko za hako: kerieu, Pitor ükezha Simon mu puo siezeu Andria, Zebedi nuo Jakob mu puo siezeu Johan,

³ Filip mu Bartholoma; Thoma mu khezhanuo khruoyakezhau Mathi; Alfia nuou Jakob siro Thadia;

⁴ Kananmia Simon, mu Jisu tekeshü Judas Iskariot rei sa.

Kerekenieko Ketsekeshü

⁵ Jisu mia kerekenie hako tarhoshü di uko ketse di sie, “Nieko Judakemoko kijü morei Samariamia rüna puo nu rei vo hie,

⁶ derei Israel seyiemia jüketa tekuoko ki vocie.

⁷ Nieko vokecü ki, ‘Teigei kedi vor penuoteitewe,’ idi dieliekeviu pushüliecie.

⁸ Kechümia chü keshürhoshülie, kesiamia chü perheishülie, mpa kechümia chü kemeneshülie, mu terhuokesuoko whuowalie. Nie methuo ngulie zeru, methuo zashücie.

⁹ Nieko priesabou nu suna, rakachü morei mese pie kechü priesa puorei pfü hie,

¹⁰ nie rüve likhuo, morei boulie kenie morei phikou morei kethe puorei se hie. Kekreilamonyü mhachüyakezhau puo va ngu cü zhükecü la.

¹¹ Nieko tuo rüna kecü morei kezha kehoupuo nu le rei supuonie sünu puotou ba shikecü pfhüliecie, sidi nie tuo lata kemochie ki sünu balie.

¹² Nieko tuo ki puo nu lekelie ki süu kelushülie.

¹³ Mhanuü ki süu puotou ro nie jakeshüu bu sünu balie, derei ngulie sü mo üro nie theja bu nie gei la vortaliecie.

¹⁴ Mu kehoupuorei nie zelie mo, morei nie die rei rünyü moro, ki sünu morei rüna sünunu tuotaketuo ki nie phi gei nyophe rei kepfhüshüwalie.

¹⁵ A nieko ki pu toushütuo, mia ketsoketuo zhanhie rüna süu ki rei Sodom mu Gomora rünanie rüli we hielie rüükuotuo.

Kepechü Vorketuoko

¹⁶ “Harie, tekuo socie donu kevo tuoi a nie ketseshüzhü ho; süla nie do vipie tinyhü tuoilie mu nie zho menepie mekhru tuoilie.

¹⁷ Themia süko gei we nieko kireilie; kekreilamonyü uko nie tepie khenu kehouko nu shütuo, mu uko sinagogko nunu nie vütuo.

¹⁸ A za la mia bu nie teze ahngko mu kediko mhodzünu rei votuo, sügeisünu nieko bu süko mu Judakemoko ki zhapu chülietuo.

¹⁹ Mia nie tekeshü ki kikidi mha puta morei kedipuo puta, ikecü le nieko nou kemezhie hie, süteiki nie bu kedipuo putie shikecü khapie nieko tsü zotuokecü la,

²⁰ kekreilamonyü nie thuo mha pu lho, derei nieko Puou Ruopfüu thuo nie nou nu pushü zotuokecü la.

²¹ Siro siezedzürie thuo siezedzürie tepie mia bu dukhrituo, tsiu miapuonuoko rei unuonuo gei sükemhie chütuo, mu unuonuo thuo ukrü ngumvü sie di kedukhrituo.

²² Themia pete rei a za la nieko ngumecütuo. Derei kehoupuorei hiepfü zo tha thela tsokelieu kelalietuo.

²³ Siro rüna puo nu mia nie pechüketa ki, ta rüna kekrei puo nu votaliecie. A nieko ki pu toushütuo, Themia Nuou kevor mhodzü nieko Israel rünako nu vo ketso phrelie lho.

²⁴ “Kepethau ki pethakelieu zha mo; morei niepuu ki puo kituomia zha mo,

²⁵ süla pethakelieu puo kepethau mhielie mu kituomia puo niepumia mhiekelie sie vi zo. Mia ki niepuu thuo rei üse Belzebul üdi kieya liro, puo kikruko zo we süu ki rei pesekuotuo.

Supuo Prei Zhü Shikecü

²⁶ “Süla nieko süko prei hiecie, kekreilamonyü mhapuorei se mia pesipengulie lhoü whepie keba jü; tsiu mia bu si motuo üdi keviepie kezhü rei jü zo.

²⁷ A kezei nunu nie ki pukeshüko, kezie nunu pushülie; mu nie noupukeshüko ki tsüleko geinu shieshülie.

²⁸ Siro themo-u dukhriwa, derei ruopfüu dukhriwalie kenjükecüko prei hiecie; sirei Gehena nunu themo-u mu ruopfüu rei pekawalie keviu preikuoliecie.

²⁹ Ciekhrienuo kenie pie priesa puo nu zeya mo me? Sirei nie Puou medo zo kemosie süko puorei te kijü tsutalie lho.

³⁰ Nie la we nie tsütha pete rei phrü phreliete.

³¹ Süla michie hiecie; nieko ciekhrie kekra ki rei puoma rekuo eru!

Khrista Phra mu Kemo

³² “Süla themia kehoupuorei mia kenguki a phra liro, a rei teigei a Puou mhodzünu puo za pie putuo.

³³ Derei kehoupuorei themia mhodzünu a phra mvü ro, a rei teigei a Puou mhodzünu puo phra mvütatuo.

Kezekevi mo Derei Zhiecha

³⁴ “A kijü gei kezekevi khashütuoü vor ücü le hiecie; a kezekeviu monyü zhiecha khashütuo üdi vor zo.

³⁵ “Kekreilamonyü puo nuou bu puo puo ngumvü, puo nuopfü bu puo zuo ngumvü, tsiu puo miepfü bu puo niapfü ngumvüketuo la kevor zo;

³⁶ Siro mia puoe puo kikru thuo puo ngumvümia chütatuo.

³⁷ Kehoupuorei a ki puo puo morei puo zuo khriekuota liro, puo a themia chülie sü mo; mu kehoupuorei a ki puo nuou morei puo nuopfü khriekuoya liro, puo a themia chülie sü mo.

³⁸ Mu kehoupuorei puo thuo puo krus pie di a siemedzi moro a themia chü sü mo.

³⁹ Siro kehoupuorei puo phou pekrukelieu süu pejüwatuo; derei kehoupuorei a la puo phou pejükeshüu süu ngu lalietuo.

Zhakhrako

⁴⁰ “Kehoupuorei nieko zelieyakezhau a zelieya; mu kehoupuorei a zelieyakezhau a ketsekeshüu rei zelieya.

⁴¹ Kehoupuorei siedzekesimia puo za nunu siedzekesimia puo zelieyakezhau siedzekesimia zhakhra ngulietuo; mu themia kehoupuorei kemiathomia za nunu kemiathomia puo zelie ro kemiathomia zhakhra ngulietuo.

⁴² Siro kehoupuorei pethakeliemia za nunu dzüku hie puo rei pie kecütho hako yopuo zorei dieshü ro: a nieko ki pu toushütuo, süko puorei u zhakhra jütalie lho zo.”