Mathi 1 - Angami Naga CL (Re-edited) Bible (BSI)

Jisu Khrista Pfutsanuoko

¹ Abraham nuo David, David nuo Jisu Khrista pfutsanuoko za keru leshü.

² Abraham nuo Isak, Isak nuo Jakob, Jakob nuo Juda mu puo siezedzürieko,

³ mu Tamarpfü geinu Juda nuo Perez mu Zera unie penuolie; siro Perez nuo Hezron, mu Hezron nuo Aram.

⁴ Siro Aram nuo Aminadab, mu Aminadab nuo Nashon, tsiu Nashon nuo Salmon.

⁵ Siro Rahabpfü geinu Salmon nuo Boaz penuolie, mu Ruthpfü geinu Boaz nuo Obed penuolie, siro Obed nuo Jese,

⁶ mu Jese nuo Kediu David. Siro Uria kimiapfü geinu David nuo Solomon penuolie,

⁷ mu Solomon nuo Rehoboam mu Rehoboam nuo Abija; tsiu Abija nuo Asaf,

⁸ tsiu Asaf nuo Jehoshafat, siro Jehoshafat nuo Joram, mu Joram nuo Uzia,

⁹ tsiu Uzia nuo Jotham, mu Jotham nuo Ahaz, siro Ahaz nuo Hezekia.

¹⁰ Siro Hezekia nuo Manasseh mu Manasseh nuo Amon tsiu Amon nuo Josia,

¹¹ Siro uko teze Babilon nu kevo meseki Josia nuo Jekonia mu puo siezedzürieko penuolie.

¹² Siro uko teze Babilon nu voketa sie nu Jekonia nuo Salathiel penuolie, siro Salathiel nuo Zerubabel,

¹³ tsiu Zerubabel nuo Abiud, mu Abiud nuo Eliakim, siro Eliakim nuo Azor.

¹⁴ Azor nuo Zadok mu Zadok nuo Akim, siro Akim nuo Eliud,

¹⁵ tsiu Eliud nuo Eliazar mu Eliazar nuo Mathan, siro Mathan nuo Jakob,

¹⁶ mu Jakob nuo Maria nupfu Josef penuolie, mu puo geinu Jisu Khrista ükecüu penuolie.

¹⁷ Süla Abraham nunu vo David ketso phou keredia, siro David nunu vo uko teze Babilon nu kevo ketso phou keredia, mu uko teze Babilon nu kevo nunu vo Khrista penuokelie ketso phou keredia.

Jisu Khrista Kepenuo

¹⁸ Siro Jisu Khrista penuokecü hamhie. Puo zuo Maria bu Josef ze kerituoü kevakhase tuota, derei unie thenuthepfu chü lhouketa mhodzü süpfüe Kemesa Ruopfü geinu nuonipfü tuoketa silie.

¹⁹ Siro puo nupfu Josef miathomia puo zocü la mechü mhodzünu puo bu thetha pfü nyü mo di pekhre puo khawa nyüta.

²⁰ Sidi puo mha hau le keba nu, puo mho geinu Niepuu dieliemia puo puo ki vor di sie, “David nuo Josef, no Maria liepie n kimia chü michie hiecie, puo nuo lhoupfü kebayo Kemesa Ruopfü geinu zokecü la.

²¹ Puo thepfunuomia puo penuolietuo, mu no puo za thopie Jisu chüliecie, kekreilamonyü puoe puo themiako kephouma nunu uko kelalie zotuocü la,” sita.

²² Mha hako pete chüketa thiedzü Niepuue siedzekesiu geinu pupie kezhüu chü tseilieketuo la zo.

²³ “Harie, rüü phousepfü nuonipfülie di thepfunuomia puo penuolietuo, mu uko puo za thopie Immanuel chütuo,” mu Immanuel ca, “Ukepenuopfü u ze bate,” isi.

²⁴ Süsie Josef cosierlie tse Niepuu dielieu puo ki pukeshü tuoi, süpfü liepie puo kimia chülie,

²⁵ derei puo puo nuoyo penuolie kemochie puo kimia si mo; sidi puoe unuoyo za thopie Jisu chülie.