Mark 9 - Angami Naga CL (Re-edited) Bible (BSI)

¹ Süsie puoe uko ki, “A nieko ki pu toushütuo, haki huomia Ukepenuopfü kedi kekuo kevor ngu kemochie siatalie lho zokecü kro puo tha zo.”

Jisu Kelhou Chü Pekreikeshü

² Zha sorou sie Jisue Pitor, Jakob mu Johan zelie di uko rübei kijüthou kerükrie puo gei kho. Sitse uko mhinguki nu puo kelhou kreikhrota,

³ sidi puo pfhenei kra rütsheta, kijü nu miapuorei pfhe menyi pekrapie sükemhie chülie kenjükecü chüta.

⁴ Süki ukoe Elija mu Mosa unie Jisu ze kerüchü ketha ngu.

⁵ Sitse Pitor sie Jisu ki, “Rabi, úko keze haki ba ro vi zotuo; pru se chülie khe, puo n la, puo Mosa la, mu puo Elija la” ishü.

⁶ Puoe kedipuo pu morosuo shicü si mota, uko michiethorketa la.

⁷ Sitse kimhoushü vor uko soulie, mu kimhou nunu mhapfhe par di, “Hauha a Nuo a Khrietho-u zo, puo pfhe rünyüliecie!” si.

⁸ Süsie uko rükri lutsahatsa meho sie ru Jisu rübei uko ze ketha sie miapuorei ngu mota.

⁹ Siro uko kijüthou geinu kerkezhü ki puo uko kha bei di uko bu Themia Nuou kesiako donunu rheilasielie kemochie uko mha kenguko se mia puo ki rei pu hienuwa.

¹⁰ Süla uko kesiako donunu rheilakesie sü puoca kedipuo shi icü huoniehuo ketso di puo die ze bata.

¹¹ Süsie uko puo ketso di, “Kiüdi Thezhokepethako Elija bu vor rie morosuo ükecü puya ga?”

¹² Sitse puo sie uko ki, “Ketho, Elija vor di mha peteko chü pevi lashütuo. Kiüdi siro Themia Nuou kemezhiepie doneiü chü mu mia bu puo meliewatuo ükecü dze thupie tuo ga?

¹³ Derei a nieko ki pushütuo, Elija vorwate mu puo dze thupie kezhü tuoi mia puo geinu mia medoko chüwate,” sita.

Mesa kemo Ruopfü Puo Gei ketuo Yopuo Chü Pevikecü

¹⁴ Süsie uko pethakelieko ki vor tse, mia krodi puo uko houpfü ketha ngulie, mu thezhokepethako huo uko ze kemeü tha.

¹⁵ Siro themia kroko puo ngushü tse uko ngo phi di ta puo ki vo puo keluta.

¹⁶ Sitse puo uko ki, “Nieko uko ze kedipuo keprüli ba ga?” idi ketso.

¹⁷ Ru krodiu donu mia puo sie, “Kepethau, a a nuou ze n ki vorya; mesa kemo ruopfü puo ze tuokecü la puo die pulieya mo;

¹⁸ mu kehourapuorei puo ketsilie ro puo nepie kijü shüpie zhüwawaya; sidi puo mhitsie meluorherhe di puo hu thegei krükrütaya, sidi meteitotaya; mu a noe pethakelieko bu süu whuowanushü, derei uko süu chülie kenjüte.”

¹⁹ Sitse puo uko ki, “Harie, kepele kejüko, a bu kichiepuo nie ze batuo ga? Tsiu kichiepuo nie gei shügeshühie batuo ga? Puo ze a ki vorcie.”

²⁰ Sitse uko süu ze puo ki vor. Siro mesa kemo ruopfüu puo ngushü mumetha unuoyo pechü phita, sidi puo pfü kelhoupie kijü shüwa di puo mhitsie meluorherhepfü zhüta.

²¹ Sitse Jisu sie, “Puo teicie kichiepuo hituota ga?” idi puo puou ketso. Ru puo sie, “Puo nhicu nunu hituota zo.

²² Siro mesa kemo ruopfüu va kekra puo biekhriwatuo üdi puo kelhoupie mi nu rei mu dzü nu rei shüwawaya; derei no mha huo chülie vi ro hie ngumezhie di hie khruohishücie.”

²³ Sitse Jisu sie puo ki, “No chülie vi ro le? Peleyakezhamiae mhakehoupuorei chülie vi zo!”

²⁴ Sitse puo puo sü shiekhoui di sie, “A rei peleyawe, a kepele ketsa ha chü pekrashü a tsüyi!” si.

²⁵ Siro Jisu krodiu ta kewhuo vorkezhü ngu tse puo mesa kemo ruopfü süu ruo di sie puo ki, “Keliehuo mu nyievü ruopfüu, a n ki puya, no puo geinu pratacie, sidi mhakipuorei puo nou la le hiecie.”

²⁶ Süki ruopfü süu ruorüi mu puo pechüpenyü phishü di prata, mu unuoyo ngupie kesiamia mhie zhüta tse, themia kekra sie, “Puo siate,” ita.

²⁷ Derei Jisu puo dzie teshülie di puo phoushü tse puo siethalieta.

²⁸ Süsie puo kinu vorlie tse, puoe pethakelieko pekhre puo ki, “Kiüdi hieko cüu whuolie kenjüta ga?”

²⁹ Sitse puo uko ki, “Hamhiekecü ha kecha nunu zo kemosie parlieya mo,” sita.

Jisu Puo Se Dze Kepu

³⁰ Süsie uko sünunu tuo Galil pfüthe vota. Siro mia puo bu rei süu si nyü mota;

³¹ kekreilamonyü puoe pethakelieko petha di uko ki, “Themia Nuou tepie mia dzie nu shüwa di mia bu puo dukhriwatuo, sirei puo dukhrikewa zha se sie puo rhei lasielietuo,” si.

³² Derei uko puo pukeshüko caüla silie mota mu puo ketso rei michieta.

Supuo Kezhatho-u Ga?

³³ Siro uko Kapernaum nu vorlie di kinu lerlie tse puo uko ketso di, “Nieko chala nu kedipuo pu kemeü tuo ga?”

³⁴ Derei uko kemekrieta, kekreilamonyü uko cha nu ketuo ki supuo kezhatho chütuo shikecü se kemeü tuo.

³⁵ Siro puo ke balie, di kerekenieko kieshü di uko ki, “Kehoupuorei rie nyü ro, puo bu kenuotho-u chülie mu mia pete kituo chülie.”

³⁶ Süsie puo nhicunuo yopuo ze vor uko donu balie mu süyo pielie di sie, uko ki,

³⁷ “Kehoupuorei a za nunu nhicunuo hikecü yopuorei zelieyakezhau, a zelieya; mu kehoupuorei a zekeliemia a rübei monyü a ketsekeshüu rei zelieya.”

U Ngumvükemomia U Kitsa Zo

³⁸ Johan sie puo ki, “Kepethau, hie mia puo n za se terhuokesuoko whuo ketuo ngu, mu puo hie siemedzi kemo la puo bu chü hienuwate.”

³⁹ Derei Jisu sie, “Puo kha hie, kekreilamonyü miapuorei a za nunu ungomhatho chü tuo di a tha mhatalie kenjü zo.

⁴⁰ Kehoupuorei u ngumvükemomia u kitsa zo.

⁴¹ A nieko ki pu toushütuo, themia kehoupuorei nieko Khrista za seketuo la dzü hie yopuorei pie nie dieshü ro, mhakipuorei puo zhakhra pejüwalie lho.

Kephouma Dophiko

⁴² “Kehoupuorei a pelekezha kecü hako mia yopuorei chakha chükeshüu mha kegetsie kezha puo pie puo vo gei kheshü di kelhoupie dzükezha nu shükewa we puo dze vikuo.

⁴³ Mhanuü n dzie n chü pesuoya liro, da kelhouwacie, n dzie kenie pfü di mhetaya kemo mizie nu kele ki lalhi di kerhei nu kevo we n dze vikuo.

⁴⁴ (Sünu puo khuko siataya mo mu mi rei mhetaya mo.)

⁴⁵ Siro n phi n chü pesuo liro da kelhouwacie; n phi kenie pfü di n kelhoupie mizie nu shükewa ki lalhi di kerhei nu kele we n dze vikuo.

⁴⁶ (Sünu puo khu siataya mo mu mi rei mhetaya mo.)

⁴⁷ Tsiu n mhi n chü pesuo liro kerülawacie; n mhi kenie pfü di mizie nu kele ki mhi puo pfü di Ukepenuopfü kedi nu kele we n dze vikuo,

⁴⁸ sünu puo khu siataya mo mu mi rei mhetaya mo.

⁴⁹ “Metsie pie mha pecüyakezha tuoi, mi pie kehoupuorei the pecü phre zotuocü la.

⁵⁰ Metsie vi zo; derei metsie zorei puo kelhe jüta ro, nieko kedipuo pie süu chü pelhe la ta? Metsie tuoi nie kelhe nyilie, mu huoniehuo ze kezevi balie.”