Mark 7 - Angami Naga CL (Re-edited) Bible (BSI)

U Puotsanuo Zho Kepetha

¹ Süsie Jerusalem nunu kevor Farisiko mu thezhokepethako huo sa vo puo houpfülie,

² sitse süko puoe pethakelie huomia mesa mo di, puoca u nanyü zho ze u dzie metei mo di, mhacükecü ngu.

³ (Kekreilamonyü Farisiko mu Judamia pete u puotsanuo zho ze u dzie metei menuo kemosie mhacüya mo;

⁴ tsiu lhithochü nunu vor rei u dzie metei kemosie mhakehoupuorei cüya mo, siro süsie rei tehiemekhou, tieligali mu mese pie kechü mhakhouko mu thegiko puo zho tou medzi di khrü morokesuo la.)

⁵ Süla Farisiko mu thezhokepethako sie puo ki, “Kiüdi no pethakeliekoe phichümia zho medzi mo di u dzie bu rhu di mhacüya ga?”

⁶ Sitse puo uko ki, “Isayae ketherakezhako dze siedzedie pu toushü di thupie kezhü hamhie, ‘Themia hako u tie se a rhuyakezha zo, derei u noue a ze kepecie phi tuo;

⁷ Uko a rüsuo thedo chü tuote, uko themia thuo chücü zhoko se Kepenuopfü zhoko üdi pethayacü la.’

⁸ Niekoe Kepenuopfü diekhakeshüko khawa mu themia thuo kechü zhoko ze menuo tuoya.”

⁹ Sitse puo uko ki, “Nieko Ukepenuopfü diekhakeshüko khawa di nie puotsanuo zhoko keze do si phite.

¹⁰ Kekreilamonyü Mosae sie, ‘Nie puo nie zuo rhulie;’ mu ‘Kehoupuorei puo puo morei puo zuo rüsekezhau bu sia zotuo.’

¹¹ Derei mhanuü miapuonie puo puo morei puo zuo ki, ‘A mhakehoupuorei se n khruohi kezhükoe Korban-u te,’ (puoca, pie Kepenuopfü tsüshüte,)

¹² no mhapuorei n puo morei n zuo la chüshü mote,

¹³ sükemhie di nie thuo nie pfutsanuoko zho se mia petha di Ukepenuopfü dieu pie kemethuo chüwate. Mu nieko hamhiekecü kekra chü tuoya,” sishü.

Mia Chü Perhuwayakezhako

¹⁴ Süsie puo themia krodiu kie lalie di sie, “Nieko pete a die rünyülie di siliecie.

¹⁵ Mhakehoupuorei chazou nu themia nou le di puo perhuwaya mo, derei themia nou nu keparko thuo puo chü perhuwayakezha zo,

¹⁶ (Süla kehoupuorei unyie nyi di rünyüketuomia bu rünyüliecie.”)

¹⁷ Sidi puoe themia krodiu khawa di tuo kinu le tse puoe pethakelieko dieviu ca ketsota.

¹⁸ Puo sie uko ki, “Nieko mhasi mo hathede chü tuo zoluo me? Chazou nu themia nou leyakezhako themia chü perhuwalie kenjü,

¹⁹ süko u melou nu le monyü u va nu ke di cavüchü nu votayakezha nieko leya mo zo me?” (Puoe sükemhie di kecüca pete mesa üshü.)

²⁰ Puo la sie, “Themia nou nu paryakezha thuo themia chü perhuwaya.

²¹ Kekreilamonyü themia nou nu mha kesuo kemedo: pierüü, kerügu, mia kedukhri,

²² pieü, kemehou, u nou kerüzhü, mha kese, kepierakecü, mia ngu u mhikelukecü, mia mele, kemiakokecü, kerhanyakecü parya.

²³ Mha kesuo hako pete u nou nu par di u chü perhuwaya,” sita.

Thenupfü Puo Kepele

²⁴ Süsie Jisu thechü sünunu tuo Tur rünatsa vota. Sidi puoe ki puo nu lelie mu miapuorei bu puo sünu keba si nyü mota. Derei puo rüshülie kenjüta,

²⁵ süki miapfü puo puo nuopfü mesa kemo ruopfü bu puo kebi zetuoketapfü puo, puo dze si mumetha kenourhei vor puo phi nu zhüta.

²⁶ Thenu süpfü Sairofonik nunu kevor Judakemomiapfü puo. Sitse hapfüe puo bu puo nuopfü gei terhuokesuou whuowanu chata.

²⁷ Süsie puo hapfü ki, “Nhicuko bu pevülie riecie, nhicunuoko nouva kelhoupie tefüko tsükewa puotou mokecü la,” sita.

²⁸ Derei hapfü la sie, “Kepethau, siürei tefünuoko rei mizhü khro nu nhicunuoko ca rürie ketsurko pacüya zolie,” si.

²⁹ Süla puo sie hapfü ki, “N die süu la, no tuolie, terhuokesuou n nuopfü geinu prate ho.”

³⁰ Sitse süpfü kinu vo ru unuoyo thezhü gei zhü mu terhuokesuou puo geinu praketa ngulie.

Jisue Nyievümia Puo Chü Pevikeshü

³¹ Siro puo Tur rünatsa nu la vorlie, sidi Sidon pfüthe Dekapoli rünatsa nu Galil dzükezha nu vor.

³² Sitse mia nyievü mu die pu keluodekecümia puo ze puo ki vor; sidi uko puo bu süu bieshünu puo ki cha beita.

³³ Süla puoe themia krodiu nunu puo ze krei mharapuo vo di, puo dziekinuo pie themia süyo nyieto nu shü mu puo mhitsielie di se puo meü bieshü.

³⁴ Sidi puo teigei meho mu hapfhüishü di sie, “Efatha,” puoca, “Cie parliecie.”

³⁵ Siru puo vapuonu mhapfhe silieta, mu puo meü rüprei parlie di puo die pu kemecielieta.

³⁶ Süsie Jisu themiako bu süu se mia puo ki rei pu hienu beiwa, derei uko bu pu hienukeshüu pu kechükuota.

³⁷ Sitse themia pete u ngo pie u ngothorta di sie, “Puo mhakehoupuorei chü pevi seshü ze; puo nyievümia bu rei mhapfhe silie mu keliehuomia bu rei die puliete!” ita.