Mark 5 - Angami Naga CL (Re-edited) Bible (BSI)

Jisue Mesa Kemo Ruopfü Ze Ketuo Puo Chü Keshürhokeshü

¹ Süsie uko tuo dzükezha lutsakhie vo di Gerasin kijü nu vorlie.

² Sidi puo rou nunu tuo parlie tse mesa kemo ruopfü bu puo kebi ze tuoketamia puoe mekhruko nunu tuo par puo ze keselie.

³ Puo mekhru chü nu lhou baya; mu miapuorei puo kekhase balieya kemo puo, thegiro rei pie puo phase balieya mo;

⁴ tsiekenuo thegiroko pie puo phi puo dzie pha derei puo phakeshü thegiroko zorei biethe phaphawaya; sidi miapuorei puo kekhase balieketuo kekuo jütaya.

⁵ Teisoteizei pete nu puoe mekhruko mu kijüthouko gei whi kho mu ke di shie kemerie chü siro ketsie pie puo thuo puo bie kerüza sei baya.

⁶ Siro puoe ratsanu Jisu ngu tse, ta vo puo mhodzünu khoutou zhülie;

⁷ di shie kemerie chü di sie, “Jisu, Kerükrietho Kepenuopfü Nuou! no a gei kedipuo chütieya ga? A Kepenuopfü za se n ki puya, a pechüpenyü hie zocie!” sita.

⁸ Kekreilamonyü Jisu puo ki, “Harie, mesa kemo ruopfüu no themia hau geinu tuo prataliecie,” isiketa la.

⁹ Süsie Jisu puo ki “N za supuo ga?” si. Puo sie, “A za Legion; hieko kekra tuocü la,” ita.

¹⁰ Mu puoe Jisu bu rüna süu nunu uko whuowa hienu cha beita.

¹¹ Sükisü thevo krodi puo kijüthou phi nu mha nge cütuo.

¹² Ru mesa kemo ruopfüko puo ki cha bei di sie “Hieko bu thevo kro nu lelieketuo la no hie ketsepie süko kro nu shüwacie,” sita.

¹³ Süla puo uko whuoshü tse mesa kemo ruopfüko ta pra di thevoko nou leta; mu thevo kro-u, nyie kenie mese ta tsiekhie gei vo di rüsou dzükezha nu leta, sidi dzükezha nunu uko pelheikhri phrewa.

¹⁴ Süsie süko kepfheko nadi nu mu lieko nu vo di thedzeu pushü. Sitse themiako kedipuo chüte shikecü mehotuoü par.

¹⁵ Süsie uko Jisu ki vo di terhuokesuo bu puo kebi ze ketuo legion bu puo gei kebau, puo melou mecielie di puo pfhe dzie baketa ngulie di michie phita.

¹⁶ Siro mha süko kenguko terhuokesuo bu puo kebi ze ketuou gei chüketa mu thevoko dze rei pie mia ki pushü.

¹⁷ Sitse uko Jisu bu u sonuo kinu tuotanu u mezhiemelo beita.

¹⁸ Süsie Jisu rou nu letazhü tse hadzü terhuokesuo bu puo kebi ze ketuou puo ze tuotatuoü puo ki chata.

¹⁹ Derei Jisu mvüta, di puo ki, “No tuose n kinu n khriethomiako ki vo di uko ki Niepuu n gei chükeshüko mu kidepuo n ngumezhieshü shicü pie pushücie.”

²⁰ Sitse puo tuota di vo Dekapoli nu Jisue puo gei mhachükeshü pete pie mia ki pushü; mu mia pete rei u ngo phita.

Jaira Nuopfü mu Jisu Pfhephrie Biekeliepfü

²¹ Süsie Jisu rou nunu tuo lase lutsakhie pfülie tse, themia krodi puo vor puo houpfülie; mu puoe dzükezha khieki ba.

²² Sitse sinagog nu kezhamia puo puo zae Jaira ükecüu vor di puo ngulie di tsu puo phi nu zhüta.

²³ Sidi puo mezhiemelo bei di, “A nuopfü siatatuo üzhüte. Vor di n dzie yhapie puo gei shücie, sitse puo vilie di rheilietuo.”

²⁴ Süla puoe puo ze vota. Siro themia krodi puo siemedzi di puo getoutou tuota.

²⁵ Siro thenumia cie kerekenie thezie kru di kemezhie tuoketapfü puo rei tuo.

²⁶ Hapfü va kekra darukesimia bu puo theke, sidi puo vie ketuokoyo peka phrewa; sirei vikelieu monyü suo miemieta.

²⁷ Hapfüe Jisu dze sishü di themia krodiu medzi puo sietsa vor di puo pfhephrie bieshü;

²⁸ puoe, “Mhanuü a puo pfhephrie bielie zorei, a shürholie zotuo,” ikecü le tuoketa la.

²⁹ Sitse vapuochü thezie kru mo mhata; mu puo kechü vilieketa puo thuo puo geinu silieta.

³⁰ Sitsemetha kekuo puo geinu praketa silie di Jisu rürei vo themia kroko meho di sie, “Supuo a pfhe bie ga?”

³¹ Sitse puoe pethakelieko sie puo ki, “Themia krodi n ge toutouketuo nu no kimhie di, ‘Supuo a bie ga?’ ilietuo mu!”

³² Derei puoe supuonie süu chüshü shicü pfhü di lutsahatsa mehota.

³³ Sitse thenupfü puo gei kedipuo chüte shikecü silieta, süla puo michie pe zo di vor te puo mhodzünu tsu, sidi puo ki mha pete pu phreshü.

³⁴ Siru puo hapfü ki, “A nuopfü, n kepele thuo n chü keshürhoshüte ho. N nou mene di votalie mu n kechüu bu vilietacie.”

³⁵ Sitse puo die süko pu ketha nu kezhau ki nu mia huo vor di sie, “N nuopfü siate. Kiüdi kepethau bu kemezhie satuo ga?”

³⁶ Derei Jisu uko pu ketha sikemopfü chü di sie sinagog nu kezhau ki, “Michie hie, peleu pele zolie!” sita.

³⁷ Siro puo Pitor tsiu Jakob mu Jakob siezeu Johan sie miapuorei bu puo siemedzi vo mvüta.

³⁸ Siro uko vor sinagog nu kezhau ki tsolie tse, themia kra mu thekrü chü bouübi keba ngulie.

³⁹ Siro puo kinu lelie di uko ki, “Nieko kiüdi kra bouübita ga? Unuoyo siata mo derei zekezhü zo.”

⁴⁰ Sitse uko puo kreta, süla puo uko pete bu kitie prata, sidi unuoyonuo puo mu puo zuo tsiu puoe ze ketuoko rübei zelie di unuoyo kezhü bou nu leta.

⁴¹ Puoe unuoyo dzie teshülie di puo ki, “Talitha kum,” puoca, “Rüüpfü, sierliecie!”

⁴² Sitse puo ta mhai sier di cha tuo tuota (hapfü cie kerekeniete). Mha hau la uko bu u ngo phita.

⁴³ Siro puo uko bu süu dze pie mia puo ki rei pu hienu beiwa, sidi puo uko bu mha pie süpfü vachüshünu pu.