Mark 4 - Angami Naga CL (Re-edited) Bible (BSI)

Lieciemia Puo Tsia Keva

¹ Süsie puo dzükezha khieki nu mia petha la sie. Themia krodi vor puo houpfülieketa la puoe rou puo nu le bata, mu themiako dzükezha khie kijü keso nu ba.

² Sitse puo dievi nunu mhaneiü se uko petha, mu puo uko pethakecü nu hakemhie pushü.

³ “Rünyüliecie! Tsiakevau tsia vatuoü tsu.

⁴ Siro puo tsia prukeshü ki, huo te cha nu tsuta, sitse perako vor di süko pa cülieta.

⁵ Siro tsia huo te ketsietsoru rünyo shü kemonu tsuta, mu rünyo shü kemo la tsiako tsü mha sierlie.

⁶ Süsie niaki thusier tse süko puomie kre pesou kemo la phie pesiawa di kitota.

⁷ Tsia huo te zohu donu tsuta, mu tsü sier tse zohuko bu süko gecüwaketa la puo si rüchülie mota.

⁸ Mu kekreiko te kijü kevi nu tsukelieko lhou sier zhalie di puo si rüchülie, sidi huo ser, huo hiesorou mu huo krie puo vülie.”

⁹ Sidi puo sie, “Themia kehoupuorei unyie kenyimia, sümia bu rünyüliecie!” sishü.

Dievi Kese Ca

¹⁰ Siro puo keba nu kerekenieko ze puo houpfü keba kro puoe puo dievi cako ketsota.

¹¹ Sitse puo sie uko ki, “Keviepieketuo die kesou Ukepenuopfü kedi dze pie nieko we tsüwate, derei chazou kekreiko ki we mha pete rei dievi nunu puya,

¹² Süko geinu, ‘Uko meho we mehotuo, derei ngulie lho, uko rünyü we rünyütuo, derei puoca silie lho; uko rürei la vor di uko kejo valie lho ücü la.’ ”

Jisu Tsia Keva Dieviu Ca Pukeshü

¹³ Sidi puo uko ki, “Nieko dievi hau silie mo me? Siliro nieko kikemhie di dievi peteko ca silietuo ga?

¹⁴ Tsiakevau dieu prushü.

¹⁵ Mu dieu prupie cha khie shükewako hako zo: uko silie tse, Satan kenourhei vor dieu te uko nou keleko seseketako zo.

¹⁶ Mu prupie ketsietsoru gei shükewako hakoha: uko dieu sikeshü ki uko nei siei di lielie.

¹⁷ Derei uko mie sou kemo la, zopuoki rübei balie, sidi dieu la kepechü morei kemezhiekecü sier tse, uko süu khamhawa.

¹⁸ Kekreiko liro prupie zohu donu shükewako: hakoha dieu rünyülie,

¹⁹ derei kijüu rüliko, kishükinyiko kemehou mu kemehou kekrei neiüko bu dieu ge pejüwa di puo si rüchülie motayakezhako zo.

²⁰ Siro prupie kijü kevi nu shükelieko hakoha: Uko dieu rünyülie mu lielie, di u si rüchülie, sidi huo ser, huo hiesorou mu huo krie puo vülie.”

Mituu pie Merha Khro Keba

²¹ Siro puo uko ki, “Mia mi petupie mituba gei mo di merha khro morei thezhü khro baya me?

²² Kekreilamonyü pie mia pesipengushütuo ükecüu sie mhapuorei keviepie keba jü; mu mia bu ngulietuo ükecüu sie mhapuorei kepekhre jü zokecü la.

²³ Süla kehoupuorei unyie nyi di rünyüketuomia sümia bu rünyüliecie.”

²⁴ Siro puo la sie uko ki, “Nie rünyükeshüko le menuoliecie; nie mejükeshü tuoi mejüpie nie tsütuo; mu sü kezie rei kha sapie nieko tsü zotuo.

²⁵ Kekreilamonyü kehoupuorei kenyimia khapie u tsütuo mu themia kehoupuorei kejümia puo kinu ketuokoyo rei chüsetatuo,” ita.

Tsia Rüchükecü Dievi

²⁶ Siro puo sie, “Ukepenuopfü kedi-e huomia tsia se tsu prushü,

²⁷ di theva vo zeta mu teisolie ro la siertata iba, sirei tsiau kimhie di tsü par di zha miemielieya shikecü si kemo mhie zo.

²⁸ Kijüue puo thuo puosi rüchülie, therieu puo bo-u, süsie puolha pralie, süsie puokre mu puokre geinu puosi rüchü tshulie.

²⁹ Derei telha me lotsolie tse lieyie tei tsoketa la puo zhiepfhinuo se süko relieya.”

Gakrie Tsia Dievi

³⁰ Siro puo sie, “We Ukepenuopfü kedi pie kedipuo ze kemejü ta? Morei we süu la dievi kikecüpuo se ta?

³¹ Süue gakrie tsia yopuo kemhie zo, süyo se tsu kijü nu prukeshü ki mha tsia pete ki cü,

³² derei se tsu leishü di tsü parlie ro ga pete ki zhataya, sidi puo co kezhazhacü the parlieya, di teirako bu puo khrükhro nu rüselie kevi chülieya”, sita.

³³ Jisu dievi hamhiecü kekra se mia petha; puo uko silie kevi de dievi nunu uko ki pu.

³⁴ Puo dievi se mo di uko ki mhapuorei pu mo, derei puo puoe pethakelieko rübeiketa ki puoca pete vatshashüya.

Jisu Khriedi Kekhakewa

³⁵ Siro sünhie thevatieta tse puo uko ki, “Úko tuo lutsakhie pfüta khe,” sishü.

³⁶ Mu uko themia kro-u khawa di puo siedziko rei Jisu le baketa rouu nu lelie di puo ze tuota. Süki rou kekrei huo rei tuo.

³⁷ Siro khriedi puo sierta, mu dzü rüpfhüu vo rouu vata, sidi dzü bu rouu tshuta.

³⁸ Derei puo we rou sietsa nu tsükhe puo se di zezhü; sitse uko puo kesoulie di sie puo ki, “Kepethau, úko siatatuo ükezhü n noumeca mo me?”

³⁹ Sitse puo sierlie di teikhrieu kerhieshü di dzükezhau ki “Kemekrie zeitalie!” sishü. Sitse teikhrieu kemerie chü sa mo di la zeita.

⁴⁰ Sitse puo uko ki, “Nieko kiüdi michieya ga? Nieko tsie rei nie kepele nyilie mo zo me?”

⁴¹ Sitse uko kedethorwaketa la uko huoniehuo ki, “Themia hauha kikecüpuota mu? Teikhrie mu dzükezha thuo rei puo die zeyakecü ha!”