Mark 3 - Angami Naga CL (Re-edited) Bible (BSI)

Dziesiamia Puo

¹ Süsie puo la sinagog nu le, mu sünu dziesiamia puo ba di ngulie.

² Süki uko puo pejokecü le di sabat nhie puo themia süu chü keshürhoshütuo mo lho shicü meho terü ba.

³ Sitse puo dziesiau ki, “Phirliecie.”

⁴ Sitse puo uko ki, “Sabat nhie mia gei mha kevi chükecüu tuo mo, mia gei mha kesuo chükecü thezho ga? Mia chü perheituo mo mia dukhrituo ga?” Derei uko kemekrieta.

⁵ Sitse puoe puo nei mo di reipra lutsahatsa mia mehoshü; siro uko nou kere la puo nousuo di sie, themiau ki, “N dzie yhashücie.” Siru puoe puo dzie yhashü, mu puo dzie vilieta.

⁶ Süsie Farisiko tuo prata di kenourhei Herodmiako ze puo dukhriwaketuo do rhüta.

Dzükezha Khie Themia Krodiu

⁷ Süsie Jisu puoe pethakelieko ze dzükezhatsa vota, mu Galil nunu themia krodi puo siemedzita;

⁸ puo mhatho peteko dze sishü di, uko themia kekra Judia, Jerusalem, Idumi-a, Jordan rü khie lutsa nu, tsiu Tur mu Sidon merhieko nunu puo ki vor.

⁹ Siro themiako krathorketa la, themia kro-u bu puo ge motuo üdi pethakelieko bu rou yopuo dojüpie balienushü;

¹⁰ kekreilamonyü puo themia kekra chü keshürhokeshü la, u kechü nyiketa khe puo bietuo üdi puo getoutou tuota.

¹¹ Siro mesa kemo ruopfüko kehoukipuorei puo ngu tse tsu puo mhodzünu zhülie di shiekhoui di sie, “No Kepenuopfü Nuou zo,” ita.

¹² Sirei puo uko bu puo dze pie mia pesi hienu di uko kha beiwa.

Jisu Apostel Kerekenie Kedakelie

¹³ Süsie puo kijüthou gei kho di puo neicüko bu puo ki vornu kieshü; sitse uko puo ki vor.

¹⁴ Sitse puoe mia kerekenie kedalie di süko üse apostelko ülie, süko bu puo ze tuonu mu uko ketsepie mia pethatuo üdi,

¹⁵ tsiu terhuokesuoko whuolie kevi kekuo kha uko tsüketuo la.

¹⁶ Süla puoe mia kerekenie kedalie; süko Simon (puoe puo za thopie Pitor chükeshüu),

¹⁷ Zebedi nuou Jakob mu puo siezeu Johan, (puoe unie za thopie Boanerges, puoca “Teikese nuonie” chüshü),

¹⁸ mu Andria, Filip, Bartholoma, Mathi, Thoma, Alfia nuou Jakob, Thadia, Simon (Kanan-u),

¹⁹ Judas Iskariot, Jisu tekeshüu. Süsie puo kinu la vota;

Jisu mu Belzebul

²⁰ mu themia krodi vor kengu lalie, süla uko mhacü reilie kenjüta.

²¹ Siro puo kikruko sü sishü di puo kekhawatuoü vo, kekreilamonyü themiakoe “Puo nyata zo,” idi puketa la.

²² Siro thezhokepethako Jerusalem nunu kevorko sie, “Puo Belzebul ze tuote, mu terhuokesuoko kezhau kekuo kha puo tsü di puo bu terhuokesuoko whuo tuote,” idi puta.

²³ Süla puo süko kielie di dievi nunu uko ki, “Kimhie di Satan thuo Satan whuolie vituo ga?

²⁴ Mhanuü kedi puoe kepfüphro di puo thuo puo petsouta ro kedi süu thalie motaya.

²⁵ Mhanuü kikru puoe puo thuo puo pfüphrota ro, kikru süu balie kenjü.

²⁶ Süla Satan rei puo thuo puo pfüphrota ro puo thalie kenjü di katatuo.

²⁷ Siro mia puoe kekuomia puo ki nu le puo vienyako vatuo üro süu phalie rie kemosie chülie kenjü, derei phakelie sie puo ki nu le puo vie valie vi.

²⁸ “A nieko ki pu toushütuo, themia kephouma doneiü mu Ukepenuopfü ketha neiü puya shierei vapie tsüwatuo,

²⁹ derei kehoupuorei Kemesa Ruopfü thayakezha sie mhakipuorei vapie tsülie lho, mu kechachie kephouma nunu jotatuo.”

³⁰ Kekreilamonyü ukoe sie, “Puo mesa kemo ruopfü ze tuote,” idi puketa la zo.

Jisu Siezedzürie Kethoko

³¹ Sitse puo zuo mu puo siezeko vor kitie thalie, sidi uko mia ketsepie puo kie.

³² Siro themia krodi puoe puo houpfü ba; sitse uko sie puo ki, “N zuo mu n siezeko siro n üpfünuoko n ze kese nyü di n pfhü vor kitie thalie.”

³³ Sitse puo sie, “Suomia a zuo mu a siezedzüriemia ga?”

³⁴ Sidi rei lutsahatsa puo houpfü kebako meho di sie, “A zuo mu a siezenuoko sü hako zowe.

³⁵ Kehoupuorei Ukepenuopfü medo-u chüyakezhamia a siezemia, a üpfünuo mu a zuonuo zo.”