Mark 2 - Angami Naga CL (Re-edited) Bible (BSI)

Jisu Kerünyiemia Puo Chü Pevikeshü

¹ Siro zha huoyo sie puo Kapernaum nu la vor, mu süki puo kinu ba ükecü mia silieta.

² Süla themia kekra vor kengulie di kikha ketso rei themia tha jü zota, mu puo dieu pie uko petha ba.

³ Sitse mia dia kerünyiemia puo pie puo ki vor.

⁴ Mu uko themia krodiu la puo ki lelie kenjüta, süla uko puo ketha mede nu kikhru phalie, siro uko süu phakelie sie themia süu bu puo zhüu gei zhülie di puo pie kerünuo tsurshü.

⁵ Sitse Jisu uko kepele ngushü di kerünyieu ki, “A nuo n kephoumako vashü n tsüwate ho,” sishü.

⁶ Siro thezhokepethako huo sünu ba ru uko u nou nu medo di sie,

⁷ “Kiüdi themia hauha hakemhie puya shi? Puo Ukepenuopfü thate, Ukepenuopfü rübei zo kemosie, supuonie mia kephouma vashü mia tsülie vi ta?”

⁸ Sitse Jisu puo ruopfü nunu uko noudoko si mhailie di sie uko ki, “Nieko kiüdi nieko nou haikecü leya ga?

⁹ Kerünyie hau ki, ‘N kephouma vashüwate ho,’ idi pukecüu rüükuotuo mo, mo sie, ‘Sielie di n zhü chü pielie di chatuolie’ ikeshüu rüükuotuo ga?

¹⁰ Derei nieko bu Themia Nuou kijü hanu mia kephoumako vashülie kevi kekuo bakecü silieketuo la,” idi puo kerünyieu ki,

¹¹ “A n ki puya, sie n zhü chü pielie di tuo n kinu votalie.”

¹² Sitse puo uko pete mhodzü nunu puo zhü chü mhailie di tuo prata; sitse uko pete u ngo mu Ukepenuopfü tshe di sie, “Hie mhakipuorei hakemhie ngu chie mo zo,” sita.

Jisu Levi Kiekelie

¹³ Süsie puo tuo dzükezha khieki vozhü ru themia krodi puo puo ki vorlie; sitse puo uko pethashü.

¹⁴ Siro puo tuo sa phizhü ru khezhanuo kekhruou Levi, Alfia nuou khezhanuo kekhruo ki nu ba di ngulie, di sie puo ki, “A siemedziliecie,” sishü tse puo sielie di puo siemedzita.

¹⁵ Siro puo Levi ki nu hietuo üdi ke balie, süki khezhanuo kekhruomia kekra tsiu kephoumamia kekra vor Jisu mu puoe pethakelieko ze ba; uko mia kekra puo siemedziketa la.

¹⁶ Siro Farisimia mu thezhokepethakoe puo kephoumamia siro khezhanuo kekhruomia ze mhacü keba ngushü, sitse uko sie puoe pethakelieko ki, “Kiüdi puo khezhanuo kekhruomia mu kephoumamia ze mhacüya ga?” sita.

¹⁷ Siro Jisu hau sishü tse sie uko ki, “Themia keshürhomia darukesimia se morei vi, derei süu kechükenyümia la zo; ae miathoko monyü kephoumako kietuoü vorcü zo,” ishü.

Mevokecü Dze Ketsokecü

¹⁸ Siro Johan-e pethakelieko mu Farisiko mevo ba, süki mia vor puo ki, “Johan siedziko mu Farisiko siedziko mevoya, derei kiüdi n siedziko we mevoya mo ga?”

¹⁹ Sitse Jisu uko ki, “Yasau keba chie nuyie he nu kebako mevotuo me? Siya mo! Yasau uko ze keba chie uko mevolie kenjü.

²⁰ Derei uko kinu yasau zetaketuo teisozhako vortuo, mu sünhie uko mevotatuo.

²¹ “Miapuorei pfhe rütatakemo puo se vo pfhe kewe pekhuoya mo, kekreilamonyü pfhe kesa süu rütakeshü ki pfhe keweu shürhakuowayakezha la.

²² Siro miapuorei zu kerünyie pie chüzhüsü kewe nu shüya mo; kekreilamonyü zue chüzhüsüu pfüphawaketuo la. Sidi zu mu chüzhüsüu kenienie rei pekawaya; derei mia zu kesa se chüzhüsü kesa nu khashüyakezha zo.”

Sabat Dze Ketsokecü

²³ Süsie sabat puo nhie puo mia lievu puo pfüthe vozhü, siro uko tuo vokezhü ki puoe pethakelieko telhakre merhe tuo.

²⁴ Sitse Farisiko puo ki, “Harie kiüdi sabat nhie thezho varhuo haiya ga?”

²⁵ Siru puo uko ki, “Nieko thiedzü David mu puo kezeko merü di kecüca se morosuoketa ki kedipuo chüshü shiü phrü mo zo me?

²⁶ Abiathar zievokezhatho-u chü keba ki, puo Ukepenuopfü ki nu le zievoko zo kemosie kekreimia cükecü thezho mo zokecü Kepekieniekhrüdau cülie, sidi huo khapie puo ze ketuoko rei tsüshü,”

²⁷ sidi puo sie uko ki, “Sabat zhaue themia la chüshü, mu sabat la themia chüshü mo;

²⁸ süla Themia Nuou sabat mho rei niepu zo.”