Mark 16 - Angami Naga CL (Re-edited) Bible (BSI)

Jisu Rheilakesie

¹ Siro sabat-u tseita tse, Maria Magdalapfü, Jakob-nuo zuo Maria, mu Salomi, uko puo mo kenheketuo la mha kethengu huo khrülie.

² Siro zhadoudo-u zha therie nhie khise niakithu sierlie tse uko mekhru nu vor.

³ Süki uko sie huoniehuo ki, “Supuo mekhru kikha nunu ketsieu phoushü úko tsütuo shi,” ituo.

⁴ Süsie uko meho sie ru ketsieu rütouketa ngulie, süu zha phi.

⁵ Sidi uko tuo mekhru nu le ru khriesamia puo pfhenei kekra se di thezatsa bacü ngulie; sitse uko vapethowa.

⁶ Derei puo uko ki, “Nieko ngo hiecie, nieko Nazaret Jisu mia puo goukewau pfhüketuo si bate. Puo rheisiete, puo haki ba mote. Harie, mia puo khapie kezhü chüu rei mehocie.

⁷ Derei vo di puoe pethakelieko mu Pitor ki puo nieko mhodzü rie Galil nu votazhü ücü pushücie; puo hadzü nieko ki pukeshü tuoi nieko vo sünunu puo ngulietuo ho.”

⁸ Süla uko mekhru nunu pra di ta mhapuochü vota, kekreilamonyü uko nou kehoukeruo chü mu u kedethepfü di uko mia puo ki rei mhapuorei pu mota, ukoe michie phiketa la.

Jisue Maria Magdalapfü Pengukeshü

⁹ Zhadoudo zha therie nhie puo rheilie di vo puo thiedzü miapfü puo geinu terhuokesuo thenie whuokewa Maria Magdalapfü pengu kerietho chüshü.

¹⁰ Sitse hapfü vo thiedzü puo ze ketuoko u nousuo mu kra kebako ki pushü.

¹¹ Derei uko puo rheisielie di hapfü pengushüücü si rei süu pelelie mota.

Jisu Pethakelie Kenie Pengukeshü

¹² Hau sie puo puorhi kekrei puo nunu rüna nu vokezhü mia kenie pengu lashü.

¹³ Sünie la vor di kekreiko ki pushü, derei uko unie pele mota.

Jisu Pethakelieko Ketsekeshü

¹⁴ Süsie kerepuokrüko keze mhacü keba nu puo vo di uko pengushü; sidi puo uko kerhieta, kekreilamonyü uko kepele kejü mu uko nou kere la mu mia puo rheilakesie kenguko die rei pele mvüketa la.

¹⁵ Sidi puo uko ki, “Nieko kijü pete nu vo di dieliekeviu pie themia pete pethashücie.

¹⁶ Themia kehoupuorei pelelie di dzülupfükelieu kelalietuo; derei kehoupuorei pelelie kemo-u pejowatuo.

¹⁷ Pelekezhamia gei zasi hako tuotuo, uko a za nunu terhuokesuoko whuolietuo; uko pfhe kesa neiü se mha putuo;

¹⁸ uko tinyhü chüpielietuo, mu uko therei krie zo rei uko krowalie lho; uko u dzie yhapie kechümia gei shütuo, mu süko shürholietuo.”

Jisu Ze Teigei Sieketa

¹⁹ Süsie Niepuu Jisu uko ki mha pushükewa sie, puo ze teigei khota, sidi vo Ukepenuopfü zatsa bata.

²⁰ Siro uko thechü kehourapuo vo rei dieliekeviu se pethata, tsiu Niepuu uko ze mhachü mu zasiko se uko kepetha dieu mvü kemeteishüshü tuota.