Mark 15 - Angami Naga CL (Re-edited) Bible (BSI)

Jisu Pilat Mhodzünu Vokecü

¹ Siro teisolie tse zievokezhakoe phichüko, thezhokepethako mu mechükehouu pete ze kerüchü. Sidi uko Jisu phalie di ze vo Pilat dzie nu shüwa.

² Sitse Pilat sie puo ki, “No Judako kediu me?” idi ketso. Sitse puo sie, “N kepuu zo.”

³ Sitse zievokezhako mha kekra se puo pejota.

⁴ Siro Pilat puo ketso la di, “No mhapuorei pu lho me? Harie mia kiderei n pejo tha mu?” sishü.

⁵ Derei Jisu mhapuorei pu mota, süla Pilat bu puo ngota.

Jisu Gouwanu Pukeshü

⁶ Siro puoe thenyiu teiki ukoe chakeshü kediemia puo khashü uko tsüya.

⁷ Süki Barabas ükecü puo mia ze sorkari petsou sie di mia dukhriwakecüu rei kedie chü ba.

⁸ Süki themia kro-u vor di Pilat ki thiedzü zho tuoi puo ki cha.

⁹ Sitse puo uko die kela di, “Nieko a bu Judako kediu khashüwa nyüya me?” si.

¹⁰ Kekreilamonyü zievokezhako puo ngu urokecü la puo khapie puo dzie nu shüükecü puo silieketa la.

¹¹ Derei zievokezhako themia kro-u pfü kerhüshüwata di Pilat bu Barabas khashü uko tsüwanu chata.

¹² Sitse Pilat uko ki, “Siro a bu nieko puo üse Judako kediu üyakezhau pie kedipuo chütuo ga?”

¹³ Sitse uko shiekhoui la di, “Puo gouwalie,” ita.

¹⁴ Süla Pilat sie, “Kita di, puo kekrükecü mhatho kikecüpuo chüwa ga?” idi uko ketso. Derei uko shie u rhiechükuo di, “Puo gouwacie!” ita.

¹⁵ Süla Pilat themia kro-u nei chü nyüta, sidi Barabas khapie uko tsüwa; mu Jisu vüwa di puo gouwanu di khapie uko dzie nu shüwata.

Chüpahiko Jisu pie Kethekrekecü

¹⁶ Süsie Chüpahiko Jisu ze kedikiu kitiezha nu leta (süue ahng kiu); sidi uko pete kie kengulie.

¹⁷ Sidi uko puo bu pfhe meriemegekecü selie; mu zohu kechiepie tsüre puo chülie di süu pie puo tsü gei shü.

¹⁸ Süsie uko puo kelu di sie, “Judako kediu, rhei kechau chücie!” sita.

¹⁹ Siro uko kethe puo pie puo tsü vü, puo mho mhitsie, tsiu khoutoulie di puo rüsuo.

²⁰ Siro puo pie kethekrekewa sie, puo geinu pfhe meriemegekecüu rhuowa di puo pfheneiko pie puo gei shü lashü. Süsie uko puo gouwatuo üdi puo ze vota.

Krus geinu Jisu Goukewa

²¹ Süki ukoe rüna nunu Kurinmia Alexander mu Rufu unie puou Simon, kemvü chüpie puo bu Jisu krus pie voketuo la zelie.

²² Sidi uko puo ze Golgatha (puoca Tsütsoru) ükecü thechüu nu vorlie.

²³ Süsie uko zu mu mür kereikecü pie puo tsü; derei puo süu krie mvüta.

²⁴ Süsie uko puo gouwata, mu suomia puo pfhenei kiu ngulielietuo shi idi süko dape di kezalie.

²⁵ Siro uko puo goukewa ki khise keba thepfüta.

²⁶ Siro puo pejokecü die thupiekezha hamhie: “Judamia Kediu,” si.

²⁷ Siro uko sekecümia kenie, mia puo puo zatsa mu mia puo puo vitsa idi pie puo sa gou.

²⁸ Hakemhie di, “Puo phrüpie thezho kevarhuoko saliete,” idi thupie ketuo kethodieu bu tseilie.

²⁹ Siro themia kekhokeke pete tsüge puo rhie di, “Yha, no rüsuokiu bie pesuowa di zha se nu chü lashüketuou sü,

³⁰ n thuo n kelalie di krus geinu kerliecie!” sita.

³¹ Sümhie zievokezhako mu thezhokepethako rei puo krenyü di huoniehuo ki, “Puo kekreimia we kelalie, derei puo thuo puo kelalie kenjüte ha!

³² Khrista, Israelko kediu bu krus geinu kerliecie, siro hie rei pelelietuo,” ita. Siro Jisu sa goupiekezhanie rei puo kengata.

Jisu Se

³³ Siro keba kerekenie nu vo keba se ketso kijü pete zeibouita.

³⁴ Mu keba se ki Jisu melie shiekhoui di, “Eloi, Eloi, lama sabakthani!” puoca “A Kepenuopfü, a Kepenuopfü, no kiüdi a khawata ga?” sishü.

³⁵ Siro süki ketha mia huo puo pfhe si di, “Harie, puo Elija kiezhie” si.

³⁶ Süki mia puo ta vo sponj puo pie kekhrodzü selie di kethe puo tie nunu pie kho puo bu krienu khapie puo tsü di sie, “Tsiehieluo, Elija vor krus geinu puo pie kershütuo mo lho shi meho tha khe,” sita.

³⁷ Süsie Jisu melie shiekhouishü di puo ruopfü khashüwata.

³⁸ Mu süki rüsuokiu nu pfhe lhapiekezhau puo tsüle nunu rürha tsu puo phi tso di kenie chüta.

³⁹ Siro chüpahi kriemhokezhau puo mhodzüki tha di puo kimhie di siate shicü ngu tse, puo sie, “Themia hau Ukepenuopfü Nuou ketho zo!” sita.

⁴⁰ Süki thenumia huo rei kepecie nu meho tha; süko donu Maria Magdalapfü, Jakob nhicuu mu Joses unie zuopfü Maria, tsiu Salomi uko rei tha.

⁴¹ Ukoe puo Galil nu bakecü ki puo siemedzi mu puo lie chü; siro thenumia kekrei kekra Jerusalem nunu puo ze kekhoko rei tuo.

Jisu pie Khrukewa

⁴² Süsie thevatie ki, mu sünhie mha kesekecü zhau, sabat mhodzü nhiekecü la,

⁴³ siro Ukepenuopfü kedi pfhetuoyakezha Josef ükecü Arimathiamia puo vor; puo pehüko donu therhukepfümia puo; puo thepfu se zo di Pilat ki vo Jisu mo-u cha.

⁴⁴ Siro Pilat puo siata ücü si di puo ngota, süla kriemhokezhau kie ze vor di Jisu siaketa puotei chata mo kishicü ketso.

⁴⁵ Siro puo kriemhokezhau ki puo siaketa silie tse, themo-u pie Josef tsüwanushüwa.

⁴⁶ Sitse Josef linen pfhe khrülie, mu themo-u lhouse kerlie, di linen pfheu pie kezülie, sidi pie vo tsiekrie nunu mekhru hopie kezhüu nu khruwa. Sidi puo ketsie kezha puo ketoupie mekhru kikhau khawa.

⁴⁷ Siro Maria Magdalapfü mu Joses-nuo zuo Maria unie puo pie kezhü chüu ngu.