Mark 13 - Angami Naga CL (Re-edited) Bible (BSI)

Jisue Kerüsuokiu Kaketuo Pukeshü

¹ Süsie puo rüsuoki nunu parzhü tse, puoe pethakelieko mia puo sie puo ki, “Harie, kepethau, ketsieko mu kiko kide zha shi!”

² Sitse Jisu sie puo ki, “No ki kezha hako ngu tha mo? Ketsie hako biemewa di ketsie puo bu rei kemhosepfü zhülie lho.”

Mha Kebvükecü mu Kepechü Vorketuo

³ Süsie puo vo rüsuokiu kepetsoutsa Oliv Kijüthou gei balie tse Pitor, Jakob, Johan mu Andria uko pekhre vor puo ki,

⁴ “Kedikechükipuo mha hako chütatuo shi, mu mha hako pete chütaketuo la zasi kedipuo pekieshütuo shi, hie ki pucie.”

⁵ Sitse Jisu uko ki, “Miapuorei bu nie se zeta molieketuo la nie kirei terülie.

⁶ Mia kekra a za se vor di, ‘A süu zowe!’ idi mia kekra se zetatuo.

⁷ Siro nieko terhüko mu terhü kechü dze diekrie sishü ro, nie nou kehoukeruo chüta hiecie, hako chü molie lho, derei süu puotei thelau moluo.

⁸ Kekreilamonyü seyie puoe seyie kekrei puo ze kegeituo, mu kedi puoe kedi puo ze keperhietuo; süki lukihaki kiükishütuo; pekrie vortuo. Hako nuonuovachü therieko zo.

⁹ “Siro nieko rei nie kireiliecie; kekreilamonyü mia nieko tepie mechükehouko nu shütuo; mu sinagogko nunu nie vütuo; siro ahngko mu kediko mhodzünu zhapu chüshüketuo la nieko a la süko mhodzünu rei thatuo.

¹⁰ Derei dieliekeviu se seyie pete ki pushüwa rietuo.

¹¹ Siro nieko merhashü ze dienyaki nu kevo ki nie kedipuo putuo shicü lepie nie nou kemezhie hiecie, derei puoteiu vor tse nie bu die punukeshüko pie pu zoliecie, kekreilamonyü nie puketuo dieko nie die monyü Kemesa Ruopfü kinu vortuo.

¹² Siezedzürie thuo huoniehuo teshüpie kesia nu shütuo, mu miapuonuoko rei u nuonuo gei sükemhie chütuo, tsiu mianuonuoko rei u krünuoko ngumvü di mia bu süko dukhrituo;

¹³ siro a la themia pete bu nie ngumecütuo. Derei hie zo tha thela tsokelieu kelalietuo.

Kemezhie Phiketuo

¹⁴ “Sirei nieko mha va perhu sekecü kemecü chü zokecüu tha zhü kemonu ketha ngukelie ki (kephrümia bu süu lelie) süki Judia nu kebako bu ta kijüthouko gei votalie;

¹⁵ mu ki tsüle gei kebau bu la ke hie, morei puo ki nunu mhapuorei chülietuoü la le hie;

¹⁶ siro lie nu ketuou bu puo pfhe chütuoü la vo hie.

¹⁷ Süki thenumia nuonipfü ketuoko mu u nuonuo nuyakezhako we kemezhie phituo!

¹⁸ Mha hako bu teisei ki chüta molieketuo la chaliecie.

¹⁹ Kekreilamonyü süki kemezhietuo, Ukepenuopfü kijüu chülie tse nunu vor tsie ketso kemezhiekecü süthede chü kemo mu thiesie mhakipuorei silie kelho chü vor zotuo.

²⁰ Siro Niepuu thuo teisozha süko chü pedzüshü motuo ücüwe, miapuorei kelalie lho; derei puoe puo thuo kedakelieko la, teisozha süko chü pedzüwate.

²¹ Mu sükisü kehoupuorei nie ki, ‘Harie, Khrista haki ba,’ morei ‘Lere-i, puo luki ba!’ isi rei pele hiecie.

²² Kekreilamonyü ketho kemo Khrista mu ketijü siedzekesiko sier di zasiko mu u ngoko chüpie mia pekie di chülie kevi sie kedakelieko rei setuo.

²³ Derei nie pfheüla balie; a pedzü mha peteko pie nie ki pushüwate ho!

Themia Nuou Vorketuo

²⁴ “Derei kemezhiekecü teisozha süko sie, niaki zeitatuo, tsiu khrü zieshü motatuo,

²⁵ mu teigei nu themvüko rürietatuo, tsiu teigei ketuo kekuoko shü keniewatuo.

²⁶ Süsie ukoe ‘Themia Nuou kimhou geinu’ kekuo kezha se zapuzayie chü di kevor ngutuo.

²⁷ Süsie puo dielieko ketseshü di kijü kela nunu vo tei kela ketso mu teikhrie diako nunu puoe kedakelieko kie kengulietuo.

Chiedebo-u geinu Kepetha Die

²⁸ “Siro chiedebo-u geinu kepetha dieu siliecie: puo co medzü lale di puonyü kesa the kepar ki teiletietakecü nieko silieya.

²⁹ Sütuoi mha hako chüketa ki nieko puoe penuoketa, kikha ki thaketa siliecie.

³⁰ A nieko ki pu toushütuo, mha hako pete chüwa kemochie thephou hau jütalie lho.

³¹ Tei mu kijü jütatuo, derei a dieko we jütalie lho.

Miapuorei Si kemo Teisozha mu Bavüdo-u

³² “Sirei teisozha morei bavüdo süu Puou zo kemosie miapuorei, teigeidielieko morei Nuou rei si mo.

³³ Nie kireilie, pfheüla balie; kedikechükipuo puotei süu vortuo shicü si kemo la.

³⁴ Süusü mia puoe puo ki khapie puo kituoko tsüshü mu mhatho u thetse kha u tsüshü mu kikha kepfheu bu rei pfheüla balienushü di rüveketa mhie zo.

³⁵ Süla nieko pfheüla ba zoliecie, kekreilamonyü nieko rei ki niepuu thevatie tuo mo khisoteiluo tuo mo, thevü kekhou ki tuo mo, khise tuo shi: puo kevor tei si kemo la,

³⁶ moro puo mhai vor nie zezhü di ngulie rei silie kelho la.

³⁷ Siro a nieko ki pu ketha hau themia pete ki pu tha zo: Pfheüla baliecie.”