Mark 12 - Angami Naga CL (Re-edited) Bible (BSI)

Lieciemia Kro Puo pie Kedievikeshü

¹ Siro puo dieviko nunu uko ki mha pu di sie, “Mia puo khubelie puo cielie di cakhapie süu houlie, khubedzü theketuo la zutse chülie, mu rükhouba puo chülie; sidi khapie lieciemia kro puo pelewa di rüna kekreira vota.

² Siro reketuo teiu vor tse, khubesi puo ya meseko pfhü kenguketuo la kituomia puo ketsepie lie nyie kebako ki shü.

³ Derei uko puo telie di puo vüwa, mu dziethuo puo ketsewa.

⁴ Siro puo kituo kekrei puo ketse lashü, siru uko puo tsü vükerüzashü di puo pie kezhasewa.

⁵ Süsie puo kekrei puo ketse lashü, sitse uko süu dukhriwa. Siro uko sükemhie di theke kekrei kekra rei vüshü mu dukhriwata.

⁶ Puo tsie rei mia puo baluo, süu puo nuo puo khrieu zo. Süla puo sie, ‘Uko a nuou sü rhulietuo,’ idi thela nu puo nuou ketsepie uko ki shü.

⁷ Derei lieu nyiesekebako sie huoniehuo ki, ‘Hauha kayieute; khe, úko puo dukhriwatuo, sitse puo kayieu sü u vie chütatie,’ sita.

⁸ Süla uko puo telie mu dukhriwa di kelhoupie khubelieu nhaphie shüwa.

⁹ Siliro khubelie niepuu kedipuo chütuoü sie ta? Puo vor di lie nyiesekebako pekawa di khubelieu khapie kekreimia tsüwatuo.

¹⁰ Nieko kethodie hau phrü mo zo me? ‘Ki kechükoe khawaketa tsieu mia süu pie puo ke nu tsie kemeyietho-u chüte;

¹¹ Hauha Niepuu thuo chüshü zo, mu süu u mhiki we u ngo zo.’ ”

¹² Siro ukoe puo uko pehe di dievi hau puketa silie tse, uko puo telie nyüsie, derei uko themia krodiu preita. Süla uko puo khawa di tuota.

Khezhanuo Kekhruo Dze Ketsokecü

¹³ Süsie uko puo die nunu puo tekelie le di Farisiko huo mu Herod kro-u nu huomia ketsepie puo ki shü.

¹⁴ Siro uko vor di sie puo ki, “Kepethau, no dietho mu mia puo gei rei n nei si kreiya mokecü hie si ba; kekreilamonyü no miapuorei rhu pekreiya mocü la, derei ketho-u se di Ukepenuopfü zho pie pethashüya. Khezhanuo khruopie Kaisar tsü ro thezho-u petsoute me?

¹⁵ Hie bu süu khashütuo mo lho ga?” Derei uko kethera ketuo ngu di puo sie uko ki, “Kiüdi nieko a kedo nyüya ga? Denari puo se vor di a bu mehoshücie.”

¹⁶ Sitse uko puo se vorshü. Süla puo uko ki, “Hau supuo tsü mu supuo za tuo ga?” Siru uko sie, “Kaisar zo,” sita.

¹⁷ Süla Jisu sie uko ki, “Kaisar vieko pie Kaisar tsüwalie mu Ukepenuopfü vieko pie Ukepenuopfü tsüwalie.” Sitse uko puo la uko ngo phita.

Kesiamia Rheilakesie Dze Ketsokecü

¹⁸ Süsie Sadukiko, kesiamia rheilasielie lho üdi puyakezhako puo ki vor puo ketso di sie,

¹⁹ “Kepethau, Mosa hie la thukeshü mhanuü mia puoe puo nuo jü di siata ro puo siezeu bu puo kimiapfü lie di puo dzürieu yie pelhounu di pu.

²⁰ Siro thiedzü mia thenie keze siezedzürie chü, uko donu phichütho-u kiyalie, derei puo nuo jü di siata;

²¹ sidi kenieu bu sami süpfü lie ru süu rei puo nuo jü di siata; sükemhie di mia seu rei siata.

²² Sidi thenieko pete u nuonuo jü di siata. Süsie thela nu thenupfü rei siata.

²³ Siro rheilakesie ki süpfü uko supuo kimia chü ta? kekreilamonyü thenieko puo lie phre ze ru,” ita.

²⁴ Sitse Jisu uko ki, “Nieko kethodieko mu Ukepenuopfü kekuou si kemo haha la, kekrü tuoya mo üme?

²⁵ Uko kesia nunu rheilakesie ki uko thenu lie morei nyhü reiya mo, derei teigeidielieko mhietatuo.

²⁶ Mu siro kesiamiako rheilakesie dze la zo we, nieko Mosa leshüdau nunu seinyho-u dze phrü mo zo me? Sünu Ukepenuopfü puo ki, ‘Ae Abraham Kepenuopfü, Isak Kepenuopfü mu Jakob Kepenuopfü,’ isi.

²⁷ Puo kesiako monyü kerheiko Kepenuopfü zo; nieko kekrü phite.”

Diekhakeshü Kezhatho-u

²⁸ Süki thezhokepethamia puo vor uko keprüli ketha silie, mu puo ukoe die kela toushüwaketa silie tse, puo sie puo ki, “Diekhakeshü kiu kerietho-u ga?”

²⁹ Sitse Jisu rei sie, “Kerietho-u sü, ‘Harie Israel, rünyüliecie. Niepuu úko Kepenuopfü, Niepuue puo rübei zo;

³⁰ no n melou pete se, n kerheiro pete se, n nou pete se, mu n kekuo pete se Niepuu n Kepenuopfü khrietuo.’

³¹ Kenieu ro, ‘No n siezanuomia khriepie n thuo n kekhrie mhietuo.’ Diekhakeshü kekrei puorei hanie ki kezha jü.”

³² Sitse thezhokepethau sie puo ki, “No puotou zo, kepethau; ‘Puo rübei sie kekrei jü ükecü no pu toushü zo’;

³³ mu ‘U melou pete siro u kesikele pete tsiu u kekuo pete se puo khrie morosuo,’ ikecü, siro ‘u siezanuomia khriepie u thuo u kekhrie mhietuo ükecüe,’ kethe ruosuoko mu ruothoruoriko pete ki rei meyiekuo zo,” sishü.

³⁴ Siro Jisue puo mhale menuo di pu lakeshü silie tse, puo sie puo ki, “No Ukepenuopfü kedi ze kepecie zotuo mo,” sishü. Puo hau pukeshü sie miapuorei puo ki mhapuorei ketso sa michieta.

Messiah Dze Ketsokecü

³⁵ Siro Jisu rüsuokiu nunu mia petha ketha ki, puo sie, “Kiüdi thezhokepethako Khrista üse David nuou ücü pulietuo ga?

³⁶ David thuo rei Kemesa Ruopfü nunu sie, ‘Niepuue a Niepuu ki, “A n ngumvüko khapie n phi khro shüwa kemochie, No a zatsa ba zocie,” isi zo.’

³⁷ David thuo rei puo üse Niepuu üya ro, kimhie di puoe puo nuo ülietuo ga?” Süki themia krodiu u nei siei di puo die rünyü ba.

Jisue Thezhokepethako Pejokeshü

³⁸ Siro puo uko petha di sie, “Thezhokepethako la nie kireiliecie, uko pfhenei kerütshu se di phere tuoya, lhithochüko nu rei mia bu u rhu di uko kelucü u neiya,

³⁹ siro sinagogko nu rei theba kevithoko nu ba nyüya mu thehethehie nu rei therhubako nu ba nyüya!

⁴⁰ Sükoe samipfüko ki peka cü tuoya mu kemelha di cha pecha phishüya, süko we mia ki rei u kepejo rekuotuo!” sishü.

Thenu Samipfü Mha Khakeshü

⁴¹ Süsie puoe rakabouu kepetsou touki ba di mia krodi rakabouu nu mha khakeshü meho ba. Siro mhakenyimia kekra raka kha phishü ba.

⁴² Süki sami mhakejümiapfü puo rei vor di dapra kenie, puoca priesa puo mese kelhoushü.

⁴³ Sitse puo puoe pethakelieko kielie di uko ki, “A nieko ki pu toushütuo, mhakejü sami hapfüe mha khapie rakabou nu shü ketha kekreiko pete ki rei khashü kekrathowe.

⁴⁴ Kekreilamonyü mia we u ketshukelhuo chü keba nunu khashü hu, derei puo we mhakejü donu rei puo kinyi se lhou keba pete khashüwate.”