Mark 11 - Angami Naga CL (Re-edited) Bible (BSI)

Jisu Meyiemeluo Jerusalem nu Kele

¹ Siro uko tuo Jerusalem kepenuoki Betfage mu Bethani rünanie khie Oliv Kijüthou gei vorlie, sitse puoe pethakelie kenie ketseshü,

² di sie unie ki, “Tuose nnie mhodzütsa keba rünau nu vocie, mu nnie sünu volie mumetha, nnie miapuorei puo gei siekemo gada yopuo khepie tha di ngulietuo ho; süyo phreilie di ze vorlie.

³ Mia huo nnie ki, ‘Nnie kidi hiya ga?’ idi ketso ro, ‘Niepuu hau se morosuoyalie, mu puo ketse lapie hanu shü mhaiwatuo,’ isiliecie.”

⁴ Süla unie tuo vo tse cha khie kikha kepenuoki puo nu mia gada yopuo khepie ketha ngulie. Süla unie süyo phrei tha tse,

⁵ süki kethako huomia sie, “Nnie kiüdi gadayo phrei tha ga?” ita.

⁶ Süla unie rei Jisu unie ki kepu tuoi pushü; sitse süko unie bu süyo phreilieta.

⁷ Süsie unie gadayo ze Jisu ki vorlie tse, uko pfheko pie süyo gei khrashülie; sidi puo bu süu gei balie.

⁸ Siro themia kekra u pfhe pie cha khrashü, mu kekreiko lie nunu seico zapie chau khrashü.

⁹ Siro themia puo mhodzütsa ketuoko mu puo sietsa ketuoko shiekhoui di sie, “Hosana! Niepuu za se vorkezhüu thejakepfütho zo!

¹⁰ U puou David kedi vorkezhüu thejakepfütho zo! Tei pesotho gei rei Hosana!” ita.

¹¹ Süsie puo Jerusalem nu lelie di rüsuoki nu vorlie; siro puo reipra lutsahatsa mha pete mehoshü, mu menuotazhükecü la, puoe kerekenieko zelie di tuo Bethani nu vota.

Jisu Chiedebo Rüsekewa

¹² Süsienhie uko Bethani nunu parkezhü ki puo va merüta.

¹³ Sidi puoe kepecie nunu chiedebo puoe puo nyü thekeba ngushü mu sügeinu mha huo ngulietuo nhie idi vo. Derei puo süki vor tse, puonyü sie mhapuorei ngulie mo, kekreilamonyü süki chiedesi kevü tei mocü la.

¹⁴ Sitse puo süu üse, “Mhakipuorei miapuorei bu n geinu n si cü lalie lho,” sita. Süki puoe pethakelieko die süu si.

Jisu Rüsuoki Chü Kemesakecü

¹⁵ Süsie uko Jerusalem nu vorlie. Sidi puo rüsuoki nu le di sünu mha khrü mu zekebako pete whuota, siro puo priesa keli kebako mizhü mu paruonuo kezeko bako phou pela phrewa;

¹⁶ sidi puo mia puo bu rei mha pie di tuo rüsuoki nu vo mvüta.

¹⁷ Siro puoe uko petha di sie, “ ‘A ki üse seyie neiüko pete la kechaki puo chütuo, ikecü thupie zhü mo üme?’ Derei nieko hau pie kerügumia ki puo chü bate.”

¹⁸ Sitse zievokezhako mu thezhokepethako süu sishü di, uko puo dukhrikewa cha pfhüvüta; ukoe puo preicü la, kekreilamonyü themia krodiu pete puo kepetha die la u ngo phretacü la.

¹⁹ Süsie thevatieta tse, Jisu mu puoe pethakelieko nadiu nunu tuota.

Chiedebo-u geinu Kepetha Die

²⁰ Siro süsieduü uko tuo vokezhü ki, chiedebo-u sia zotsu puo mie tsokeba ngulie.

²¹ Sitse Pitor puo sielelie di sie puo ki, “Rabi, mehoshücie! No rüsekewa chiedebo-u sü siate.”

²² Siru Jisu uko ki, “Ukepenuopfü gei nie kepele nyiliecie.

²³ A nieko ki pu toushütuo, nieko kijüthou hau ki, ‘No rülou dzükezha nu letacie,’ idi kenoudo moto di puoe pukeshüu chülieketuo pele tou liro süu chülie zotuo.

²⁴ Süla a nieko ki puya, nieko nie mezhiemelo di mhakehoupuorei chashü ro, süu ngulieta ükecü pelelie, sitse süu ngulie zotuo.

²⁵ “Siro nie kehoukipuorei chatuo üdi siethakelie ki, huomia gei nie nei kemo ba ro vashü tsüwaliecie, sitse nieko Puou rei nie kejokemouko vashü nie tsütuo.”

²⁶ “Derei nie kekreimiako kejo vashü moro teigei nieko Puou rei nie kejoko vashülie lho.”

Jisu Kekuo Dze Ketsokecü

²⁷ Süsie uko Jerusalem nu la vorlie. Siro puo rüsuokiu nu tuo vokezhü ki, zievokezhako, thezhokepethako mu phichüko puo ki vor,

²⁸ di puo ki, “No kedipuo kekuo se mha hako chü tuoya ga? Supuo n bu mha hako chülie kevi kekuo kha n tsü ga?”

²⁹ Sitse Jisu sie uko ki, “A nieko ki mhapuo ketsotuo, nieko a die kelashücie, siliro a rei kedipuo kekuo se mha hako chütuo shicü pie nieko ki pushütuo.

³⁰ Johan mia dzülukepfüu teigei nu vor mo themia ki nu vor ga? A die kelashücie.”

³¹ Sitse uko thuo kemeü di sie, “We, ‘Teigei nuwe,’ ishü ro puoe sie, ‘Di siro nieko kiüdi puo pele mo ga? isitie.’

³² Derei we sie, ‘Themia kinu vorwe,’ ishütuo ürei” uko themia kro-u prei, kekreilamonyü themia pete puo üse siedzekesi kethomia puo üdi peleyacü la.

³³ Süla uko Jisu ki, “Hie si mo,” ishü. Sitse Jisu uko ki, “Siro a rei kedipuo kekuo se mha hako chüya shicü nieko ki pulie lho,” siwata.