Mark 1 - Angami Naga CL (Re-edited) Bible (BSI)

Johan Mia Dzülukepfüu Kepetha

¹ Ukepenuopfü Nuou Jisu Khrista, dieliekevi die therieu:

² Süu Isaya siedzekesiue, “Harie, n mhodzü a a chalieu ketseshütuo, puo n cha keseshütuo;

³ mia puo rayha nunu shiekhoui di: ‘Niepuu cha keseliecie, puo chako chü kemezhüliecie!’ idi thupie kezhü mhiei!”

⁴ Johan mia dzülukepfüu rayha nu vor di kephoumako valieketuo la thenoukedikelie dzülukepfü se mia petha.

⁵ Süki Judia kijü pete nu mu Jerusalemmia pete puo ki pra di u thuo u kephoumako phra phre di Jordan rü nunu dzülupfülie.

⁶ Siro Johan-e ut mie pie kechü pfhenei se tsiu chüzhü chiepha se puo chie phapfü, ku mu mepfhidzü se puo ca chü.

⁷ Siro puo pucü, “Mia puo a sie vorkezhüu a ki zhakuo; a nuketsu puo phikoupha rei phreilie sü mo.

⁸ A we dzü nunu nieko dzülu khakeshü zo, derei puo we Kemesa Ruopfü nu nieko dzülu khashütuo,” isi.

Jisu Dzülupfükelie

⁹ Siro süki Jisu Galil kijü Nazaret nunu vor di Jordan rü nunu Johan bu puo dzülu khashü.

¹⁰ Siro Jisu dzü nunu parlie mumetha puoe tei kokeshü mu Ruopfüu mekhru rhi kemhie puo gei tsurkecü ngu.

¹¹ Süsie teigei nu mhapfhe puo; “No a Nuo a khrietho-u; a n ngu a neithor zo,” isi ker.

Jisu Kedokecü

¹² Süsie Ruopfüu puo hüze mhai rayha nu vota.

¹³ Siro zha hiedia rayha nu ba di Satan bu puo kedo; sidi puo nhachüko ze ba mu teigeidielieko puo vaphi tuo zo.

Jisu Khuoketemia Dia Kiekelie

¹⁴ Siro mia Johan telieketa sie, Jisu Galil nu vor di Ukepenuopfü dieliekeviu pie mia petha,

¹⁵ di sie, “Puotei sü tso bate, Ukepenuopfü kedi vor penuo bate, thenoukedilie di dieliekeviu peleliecie,” si.

¹⁶ Siro Jisu Galil dzükezha khie tuo vokezhü ki, khuoketemia kenie, Simon mu puo siezeu Andria unie jal se khuote tuo di ngulie: unie khuoketemiacü la.

¹⁷ Sitse Jisu unie ki, “Nnie a siemedziliecie, siro a nnie bu themia ketemia chütatuo.”

¹⁸ Sitse unie unie jal kha mhawa di puo siemedzita.

¹⁹ Süsie puo tuo za phizhü ru Zebedi nuo Jakob mu puo siezeu Johan unie rou nunu unie jal pekhuo ba di ngulie.

²⁰ Si mumetha puo unie kieshü; sitse unie unie puo Zebedi mu zhakhrü ze ketuoko khapie rou nu bawa di puo siemedzita.

Mesa Kemo Ruopfü Ze Ketuou

²¹ Siro uko Kapernaum nu vorta; sidi sabat vorlie tse, puoe sinagog nu le di mia petha.

²² Sitse uko puo kepetha dieko sishü di u ngota, kekreilamonyü puoe thezhokepethako mhie monyü puo kekuo nyi se di mia pethakecü la.

²³ Sütei touki mesa kemo ruopfü bu puo kebi zetuoketamia puo sinagog nu ba,

²⁴ ru puo ruorüi di sie, “Nazaret Jisu, no hieko ze kedipuo chütieya ga? No hieko pekawatuoü hanu vor me? A n si, no Ukepenuopfü Kemesau zo,” sita.

²⁵ Derei Jisu puo kerhie di sie, “Kemekrietalie, sidi puo geinu partacie!”

²⁶ Sitse mesa kemo ruopfüu themiau pfükelhou mu ruorüishü di puo geinu prata.

²⁷ Themia pete u ngopie mhapuochü di sie huoniehuo ki, “Hau kedipuote mu? Puo kekuo kenyi kepetha die kesa puote! Puo mesa kemo ruopfüko ki rei mha pushü ru süko puo die zete,” sita.

²⁸ Süsie puo za kemeyie dze süu Galil kijü pete nu keza mhamha vota.

Jisu Themia Kekra Chü Keshürhokeshü

²⁹ Süsie uko sinagog nunu tuota, sidi uko Jakob mu Johan ze salie di Simon mu Andria unie kinu leta.

³⁰ Süki Simon kimianuo zuo rukizhü, mu uko hapfü dze pie puo ki pu mhashü.

³¹ Sitse puo süpfü ki phi di puo dzie teshülie di puo phoushü. Ru puo rukiu lata mu puo sie uko lie chü merei bata.

³² Süsie niaki leta tsiu thevatieta tse, mia kechükenyü mu terhuokesuo bu u kebi ze ketuo kekra ze Jisu ki vor.

³³ Siro nadiu nu themia pete vor kitie nu kengu phrelie.

³⁴ Sidi puo kechükenyü neiüko kekra rei chü keshürhoshü mu terhuokesuo kekra rei whuowa; siro puo terhuokesuoko bu mhapuorei pu mota, kekreilamonyü süko puo supuo shicü siketa la.

Jisu Galil nunu Mia Pethakecü

³⁵ Siro khise teiso pi par kemonu puo sielie di tuo mia kejüra puo vo di kecha chü bata.

³⁶ Sitse Simon mu puo zeko puo pfhü vor.

³⁷ Sidi uko puo ngulie tse, puo ki, “Mia pete n pfhü tuotelie.”

³⁸ Siru puo sie, “Úko tuose sonuoki rünako nu vo khe, a bu süko nu rei mia pethashüketuo la; kekreilamonyü a süu chüketuo la kevor zo.”

³⁹ Sidi puo Galil kijü pete nu vo di uko sinagogko nu mia petha mu terhuokesuoko rei whuo tuota.

Jisu Mpa Kechümia Puo Chü Keshürhokeshü

⁴⁰ Siro mpa kechümia puo vor di puo mhodzünu khoutoulie di sie, “N medo üro, no a chü kemesalie vi zo,” idi puo mezhiemelota.

⁴¹ Ru Jisu puo noumezhie di puo dzie yhapie süu nyüshü di sie “A medowe, no mesaliecie.”

⁴² Sitse mpa kechüu puo geinu vi mhata, sidi puo mesata.

⁴³ Süsie puo süu kha bei di kenourhei puo ketsewa,

⁴⁴ di sie, “No hau dze mia puo ki rei pu hiecie, derei no zievo-u ki vo di n mo pie puo pekieshücie, sidi mia bu silieketuo la, n chü kemesalieketa ruotho Mosa pupie kezhüko chüwaliecie,” si.

⁴⁵ Derei puo vo süu dze pu phi di, dieu pu keza tuota, süla Jisu bu rüna nu lelie suo di vo rüna khie tuota; mu mia lukihaki nu puo ki vorta.