Malaki 2 - Angami Naga CL (Re-edited) Bible (BSI)

¹ Siro tsie, he-i zievoko, diekhakeshü hauha nieko la zo;

² Niekoe rünyü mo, niekoe süu pie a za chü kemeyieketuo la pie nie melou nu shülie moliro, krodiko Jihovae puya, a rüse pie nie gei shütuo mu a nie thejako rüsewatuo; ketho zo a uko rüsewate, kekreilamonyü nieko süu pie nie melou nu shülie kemo la.

³ A nie nuosenuoyieko kerhieshütuo, mu thubuo kelhoupie nie zie vatuo, nie ruosuo buoko, sidi a mhodzü nunu nie khawatuo.

⁴ Süla tsie, a diekhakeshü hau pie nie ki shü ücü silie, süu a dietseidiekho-u Levi ze tuolieketuo la, krodiko Jihovae siya.

⁵ A puo ze dietseidiekho chükelieu sü kerhei mu vitho dietseidiekho zo, a sünie pie puo tsüshü; kekie hau therhu nunu morosuo, mu puoe a rhu tsiu a zau prei thalie.

⁶ Kepetha ketho-u puo me nu tuo, mu kekrükecü puorei puotie nu ngulie mo. Puoe mezhü mu puotou di a ze tuo, mu puoe themia kekra bu kephouma therhielie.

⁷ Kekreilamonyü zievomia tie-e kesikele rüguose ba morosuo, mu themiae puotie nunu chatha pfhü morosuo, kekreilamonyü puoe krodiko Jihova dieliemia zokecü la.

⁸ Derei niekoe rüreise nie chau therüte; nieko chathau medzi di themia kekra bu u phi mesükelie chüshü; niekoe Levi dietseidiekho-u bie pesuowa, krodiko Jihovae siya,

⁹ süla a nie bu themia peteko mhodzü rütsekecü mu zhasekepfümia chüwate, sümho rei nieko a zhoko se balie mo derei nie chatha khakeshüko nu nie nei si kreite.

Judae Dietseidiekho-u Perhukewa

¹⁰ U pete u puo puo zo mo üme? Ukepenuopfü puo thuo u chüshü moü me? Siüro kidi we huoniehuo gei diethoshülie mo di u puonuoko dietseidiekho-u perhuwa ga?

¹¹ Judae pele thalie mote, tsiu Israel mu Jerusalem nu mha kerütsekecü chüwate; kekreilamonyü Judae Jihova kemesachüu, puo khrieyakecüu perhuwa, sidi pelekemomia nuonuo lieliete.

¹² Jihova bu Jakob pfhekiko nunu mha haikecü kechüko kehoupuorei zhapuchü morei pfhekhokeshü, morei ruosuo se krodiko Jihova ki kevor pete dathewalie.

¹³ Siro nieko hau rei chü sa, Jihova ruosuobau mhodzü, kekra mu meheimelokecü pie wheshü kekreilamonyü puoe nieko ruosuo lie sa mota, morei puo nei di nie dzie nunu lie sa motacü la.

¹⁴ Nieko sie, “Kiüdi puo chüshü mota ga?” idi ketsoya. Kekreilamonyü Jihova no mu n khriesaki ze lhoukeliepfü nnie donu zhapuu chüshü rei, no puo pele thalie mote, hapfü n dziesepfü mu dietseidiekho geinu n kimia chükeliepfü zo ürei.

¹⁵ Hapfüha Ukepenuopfüe puo chüshü mo üme? Chüüphou mu ruopfü rei puo vie! Di siro Ukepenuopfü kedipuo mengu ba ga? Ukepenuopfü keprei yieu zo. Süla nie thuo nie mehoshüliecie, sidi mia puo bu rei puo khriesaki ze lhoukeliepfü gei dietho mowa hiecie.

¹⁶ Kekreilamonyü a kekhokevakecü ngumecü, Jihova, Israel Kepenuopfüe puya, mu mia kemvü kechüpie u wheseketuomia rei, krodiko Jihovae siya. Süla nie menuo tuolie mu pele kemo chüta hie.

¹⁷ Nie diepuko la Jihova puo nyiete. Sishierei niekoe sie, “Hie kikecüpuo nunu puo bu puo nyieta ga?” siya. Sidi nie sie, “Mha kesuo kechümia zorei pete Jihova mhodzünu we vi zo mu puo uko ngu puo neiya.” Morei, “Kethoca Kepenuopfü kirapuo ba ga?” isiya.