LUK THUKESHÜ DIELIEKEVI 8 - Angami Naga CL (Re-edited) Bible (BSI)

Jisu Ze Ketuo Thenuko

¹ Süsie chaba kemonu puo napfünadiko tsiu socüsonuo kheko nu vo di Ukepenuopfü kedi dze dieliekeviu pupie mia petha; siro kerekenieko puo ze tuo;

² tsiu kesuo ruopfü nu mu kechükenyü nunu chü keshürhokelie thenuko huo rei sa tuo: süko Maria, Magdala üyakezhapfü, puo geinu terhuokesuo thenie whuokewapfü;

³ mu Herod kiu nu kezha chüyakezha Chuza kimia Joana; siro Susana, tsiu süko zo kemo u thuo u mhakra se Jisu mu pethakelieko khruohiyakezha thenumia kekrei kekra rei sa.

Lieciemia Puo Tsia Keva Dievi

⁴ Siro rüna puo sie rüna puo nunu idi mia krodi puo vor kengulieta; sitse puo dievi nu mha pu di sie;

⁵ “Mia puoe puo tsia vatuo üdi tsu mu puo tsia vakeshü ki, tsia huo te cha nu tsuta, sidi mia bu kedewa, siro teirakoe pa cülieta.

⁶ Siro huo tetsu ketsietsoru gei zhüta, sidi süko tsü par tse kijü puojütse kejü la rüwi toita.

⁷ Siro tsia huo te zohuko donu tsuta, sidi zohuko süko ze lhou par tse süko gekhriwa.

⁸ Siro huo te kijü kevi nu tsulie, sidi süko zha sier di thekrie vülie.” Sidi puo mha hako pushükewa sie, “Kehoupuorei u nyie nyi di rünyü kenyümia sümia bu rünyüliecie!” idi shieshü.

Dievi Kese Ca

⁹ Süsie puoe pethakelieko puo ki dieviu ca kedipuo shicü ketsota.

¹⁰ Sitse puo sie, “Nieko bu we Ukepenuopfü kedi dze die kesouko silienuwate, derei kekreiko ki we dievi nunu puya, kekreilamonyü, ‘sükoe meho rei ngulie lho, rünyü rei silie lho.’

Tsia Keva Dieviu Ca Pukeshü

¹¹ “Dieviu ca sü hau zo; tsiau sü Ukepenuopfü dieu zo.

¹² Cha nu tetsuketako liro dieu rünyülie, derei Satan vor di uko nou nu dieu seseketau zo, uko bu pelelie di kelalie moketuo la.

¹³ Siro te ketsietsoru gei tsuketako liro, dieu rünyükeshü ki u nei siei di liekelieko. Derei uko mie jü, uko puotei huoyo rübei pele balie, sidi dophi uko gei phir tse thalie moketako.

¹⁴ Siro zohu donu ketsuko we dieu rünyülie di lhou za phi tse kelhou nu nounyüko siro kinyiko mu u nei u nyü chükecüko bu u phawa di memielie moketako zo.

¹⁵ Siro kijü kevi nu tsukelieko we dieu rünyülie di u nou dietho tsiu mezhü mu u shüshüta mo di süu se zo tha u si vükelieko zo.

Mituba gei Miu

¹⁶ “Siro miapuorei mi petupie mhabou khro keviepie baya mo, morei pie thezhü khro baya mo, derei süu khapie mituba gei baya, siliro kinu keler pete kezie ngulieya.

¹⁷ Kekreilamonyü se mia pesishülie lho ükecü mha keviepieketuo puorei jü, morei mia bu si mu ngulie lho ükecü mha kepekhre puorei jü zocü la.

¹⁸ Süla nieko kimhie di rünyüya shiü menuoliecie; kekreilamonyü kehoupuorei mha kebau khapie puo tsü sashütuo, derei kehoupuorei mha ba kemo-u kinu mha keduo yopuo ba üdi leyakezhau rei chüseta zotuocü la.”

Jisu-nuo Zuo mu Puo Siezeko

¹⁹ Süsie Jisu-nuo zuo mu puo siezeko puo ki vor, derei themia krathorketa la puo ki lelie suota.

²⁰ Sitse mia puo ki, “N zuo mu n siezeko kitie vor thalie, uko n ze keseshü nyüya.”

²¹ Siru Jisu sie uko ki, “A zuo mu a siezeko sü Ukepenuopfü dieu rünyülie di chüüzeyakezhako zowe.”

Jisu Khriedi Kechü Zeikewa

²² Khunhie puo puoe pethakelieko ze di rou puo nu le balie tse puo uko ki, “Úko rüzieu ciese lutsakhie pfüta khe.” Sidi uko tuo sedeshü,

²³ derei uko rouu thu vozhü ru puo zetsuta. Siro süki rüzie nu khriedi puo sierta, tsiu dzü ler rouu tshunuota, mu uko pete rei kemichie nu tuota.

²⁴ Süla uko puo ki vo puo kesou di sie, “Kepethau, Kepethau úko katatuoüzhie.” Sitse puo sier teikhrie tsiu dzükerüpfhüko ruoshü, sitse süko la zeita mu kemekrieta.

²⁵ Sitse puo sie, “Nieko kepele kirapuo tuo ga?” Derei uko pete u ngo mu michie phi phreta, sidi huoniehuo ki, “Themia haunie supuota dimu? Puo teikhrie mu dzü ki mha pushü ru süko puo die zeketa ha!”

Jisu Terhuokesuo Ze Ketuo Puo Chü Pevikeshü

²⁶ Süsie uko Galil dzükezha mhodzütsa keba Gerasin kijü nu vorlie.

²⁷ Sidi puo tuo keso nu pralie tse, rüna sünu terhuokesuoko bu puo kebi zeketuomia puo ze keselie. Siro themia hau puo pfhenei se mo mu mekhruko nu rübei sie ki nu baya moketa puotei telheta.

²⁸ Süki puo Jisu ngu tse, shiekhoui di te puo mhodzünu tsuzhüta; mu shiekhoui di sie, “Jisu, Kerükrietho Kepenuopfü Nuou, no a ze kedipuo chü ta? A n ki a mezhiemeloyawe, no a pechü hiecie,” sita.

²⁹ Kekreilamonyü puo themia süu geinu mesa kemo ruopfüu bu pratanu di putakecü la, (ruopfü süu hamhodzü phi puo ketsi ze tuota; sidi mia bu puo pfhe baya, tsiu thegiro mu phikha se puo phapfü baya zo; derei puo kepha sükosü biethe phaphawa di terhuokesuou bu puo kechü ze rayhako nu tsutatayacü la).

³⁰ Süki Jisu puo ketso di sie, “N za supuo ga?” Sitse puo sie, “A za Legion,” sita. Kekreilamonyü terhuokesuo kekra puo nou batacü la.

³¹ Sitse uko puo bu uko ketsepie kheho kesoutho-u nu shü hienu chata.

³² Siro süki thevo krodi puo kijüthou phi ki nu mha nge cütuo. Süla terhuokesuoko Jisu bu uko whuopie süko nu shüwa nu cha: süla puo uko bu silienuwata.

³³ Süla terhuokesuoko themiau geinu par di ta thevoko nou leta; sidi thevo kro-u pete tarüsou tsiekhiekha tsu di te rüzie nu le uko pelheikhri phrewa.

³⁴ Siro thevo kepfheko mha süko ngu di ta vo nadiko mu rünako nu pu phreshüwa.

³⁵ Sitse themiako kedipuo chüte shicü mehotuoü par, sidi uko Jisu ki vor tse, terhuokesuoko puo geinu praketa themiau puo pfhe puo nei selie mu puo nou meciephrüipfü di Jisu phi ki bakecü ngulie. Siru uko michie phita.

³⁶ Siro mha süko ngukecükoe kimhie di terhuokesuo ze ketuou viliete shicü uko ki pushü.

³⁷ Sitse Gerasin kijü ki themia pete puo bu uko ki nunu tuotanu chata; ukoe michie phiketa la. Süla puo rouu nu lelie di tuo lata.

³⁸ Süsie puo geinu terhuokesuoko praketa themiau puo ze tuotatuo üdi puo mezhiemelo; derei Jisu puo ketse di sie,

³⁹ “N kinu la voliecie, sidi Ukepenuopfüe n gei kedipuo chüshü shiü pushülie.” Sitse themiau nadi nu vo di Jisu puo gei mha kedithedepuo chüshüte shicü dze pu tuota.

Jaira Nuopfü mu Jisu Pfhephrie Biekeliepfü

⁴⁰ Siro Jisu la vorlie tse themia kroko u nei phi di puo zelie, uko pete rei puo pfhe bakecü la.

⁴¹ Süki puo za Jaira ükecü sinagog nu krütamia puo vor. Sidi puo tsu Jisu phi nu zhülie di puo bu puo ki vonuta,

⁴² kekreilamonyü puoe puo nuo cie kerekenieketapfü puo rübei zo, ru süpfü siatatuoüzhüketa la. Sidi puo tuo vokezhü ki themia kroko puo getoutoupfü tuota.

⁴³ Sünu thenumiapfü puoe cie kerekenie thezie krutuoketapfü puo, puo vie pete zepie darukesimia bu puo theke, derei miapuorei puo chü keshürholie moketapfü puo rei tuo.

⁴⁴ Süpfü puo sietsa vor di puo pfhephrie bieshü tse vapuonu puo gei thezie kru mota.

⁴⁵ Sitse Jisu sie, “Supuo a nyü ga?” siru mia pete moü phreta tse, Pitor sie, “Kepethau, themiako n houpfü di n ge toutoutuo ze.”

⁴⁶ Derei Jisu la sie, “Mia puo a bie tou zo, kekreilamonyü kekuo a geinu prate.”

⁴⁷ Süki thenupfü rüshülie kenjüta, süla puoe michie pe zo di vor puo mhodzünu zhüta, sidi puo mechü mhodzü nunu puo kedipuo la puo pfhephrie bie shi mu kimhie di puo shürho mhailiete shicü puta.

⁴⁸ Sitse puo sie süpfü ki, “A nuopfü, n kepele thuo n chü keshürhoshüte ho; n nou mene di volie.”

⁴⁹ Puo die süko pu ketha nu sinagog pehüu ki nu mia puo vor di sie, “N nuopfü siate; kepethau kenyha sa tuo hietacie,” sita.

⁵⁰ Siro Jisu hau sishü tse sie puo ki, “Michie hie, peleu pele zolie, silie ro puo kelalie zotuo.”

⁵¹ Sidi puo kiu tsolie tse, Pitor, Johan mu Jakob, tsiu unuopfü-nuo puo mu puo zuo zo kemosie miapuorei bu puo ze le mvüta.

⁵² Süki mia pete kra di puo krü phi tha ru puo uko ki, “Nieko kra hiecie; kekreilamonyü puo siata mo, derei zekezhü zocü la.”

⁵³ Sitse uko puo siata zokecü sikecü la puo kreta.

⁵⁴ Derei puoe puo dzie teshülie tsiu puo kie di sie, “Rüüpfü, sierliecie!”

⁵⁵ Sitse puo ruopfü la vorlie di puo mhai sielie, ru Jisu mia bu mha se vor puo bu cülienushü.

⁵⁶ Sidi puo puo puo zuo unie bu unie ngota; derei puo uko bu mha süko se mia puo ki rei pu hienuwa.