LUK THUKESHÜ DIELIEKEVI 5 - Angami Naga CL (Re-edited) Bible (BSI)

Jisu Siedzimia Kielie Kerieko

¹ Va puo Jisu Genesaret zieu khieki tha tse, themiako puo kinu Ukepenuopfü die rünyütuoü vor puo getoutou zota.

² Sitse puo rüzieu khie rou kenie bakecü ngulie; mu khuoketekoe sünie khawa di vo u jal keshü tuota.

³ Siro rou sünie puo Simon vie ru puo sünu lelie di puo bu khu zase rüzieu nu sa lelienuta. Süsie puo rouu nu balie di sünunu sier mia krodiu petha.

⁴ Siro puo die pu thewa tse Simon ki, “Rouu khuse dzü kesou nu philie di khuotelieketuo la nieko jal kelhoushücie.”

⁵ Sitse Simon sie, “Niepuu, hieko teizeizha pete hie rhiechü zo, derei mhapuorei ngulie mo. Sirei no siüro n die la a jal kelhou lashütuo.”

⁶ Uko sishü tse khuo kekra bolie di uko jal pfürhawatuoüta.

⁷ Süla uko dzieziepie rou kekreiu nu ketuo pezako kie di uko bu vor kekhruohinuta. Sitse uko vor di khuoko pie rou kenienie tshulie tse rounie rületatuoüta.

⁸ Ru Simon Pitor süu ngushü tse, puo tsu Jisu phi nu khoutoulie di sie, “Tuo a therütayi, Niepuu, a kephoumamia zo mu!” sita.

⁹ Kekreilamonyü puo mu puo ze ketuo kheko rei uko khuo kekra telieketa ngu di u ngo phreketa la;

¹⁰ siro sütuoi Simon Pitor ze ketuo Zebedi nuo Jakob mu Johan unie rei u ngota; sitse Jisu sie Simon ki, “Michie hiecie; thie yawinu a n bu themia tetatuo.”

¹¹ Siro uko rounie teshüpie rüzie khie shüwa tse, uko vie pete khawa di puo siemedzita.

Jisu Mpa Kechümia Puo Chü Pevikeshü

¹² Siro va puo puoe vo nadiko puo nu ba ru mpa chü phiketuo puo rei sünu ba. Themia süu Jisu ngukelie ki, puo tsu kijü zerepfü di puo ki puo mezhiemelo di sie, “Niepuu, no n medo üro, no a chü kemesawalie vi zo!”

¹³ Sitse Jisu puo dzie yhapie puo bie di sie puo ki, “A medowe, No mesaliecie!” Sishü mumetha puo geinu mpa kechüu vita.

¹⁴ Siro puoe süu bu mia puo ki rei pu hienuwa. Sidi puo sie, “Sielie, di mezhü zievo-u ki vo di n thuo n pie zievo-u pekieshücie; sidi themia bu silieketuo la Mosa diekhakeshü tuoi no mesaketa ruotho-u chüwalie,” sishü.

¹⁵ Derei puo rüli pu kemo-u monyü pu krakuo sata, tsiu puo die rünyütuoü mu u kechükenyüko nunu shürholietuo üdi mia krodi vor kengulieta.

¹⁶ Sirei puo tuo rüdei themia kejüra vo di kecha chü bata.

Jisu Lasiamia Puo Chü Pevikeshü

¹⁷ Khunhie puo, puo mia petha keba ki, Farisiko mu thezhokepethako huo süki ba, (sükoe Galil, Judia mu Jerusalem rüna kheko nunu vor); mu mia chü keshürholieketuo Niepuu kekuo rei puo ze tuo.

¹⁸ Süki mia kro puo thezhü puo geinu lasiamia puo toupie vor, mu uko süu pie kinu le di pie vo Jisu mhodzünu shütuoü sie,

¹⁹ derei themia krathorcü la uko puo pie leketuo cha pfhü pejüta, süla uko puo toupie kikhru mho gei sie di süu biephalie di puo zhü geinu puo khapie themiako donu Jisu mhodzüki shü.

²⁰ Puo uko kepele ngulie tse puo sie, “A zeu, n kephoumako vashü n tsüwate ho.”

²¹ Sitse thezhokepethako mu Farisiko kepu di, “Ukepenuopfü ketha die puyakezha themia hau supuote mu? Ukepenuopfü zo kemosie supuonie mia kephoumako valie ta?”

²² Siro Jisu uko noudoko silie di sie uko ki, “Nieko kiüdi mha sükemhieko leya mu?

²³ ‘N kephoumako vapie n tsüwate ho,’ idi kepuu, mu ‘Sie di cha tuoliecie,’ ikecü die sünie kiu pu rüükuotuo ga?

²⁴ Derei kijü nu themia kephoumako vashü tsülieketuo Themia Nuoue kekuo bakecü nieko bu silie kenyü la,” idi puo lasiau ki, “A n ki puya, no sielie, n zhü chü pielie di tuo n kinu votacie.”

²⁵ Sishü mumetha puo uko mhodzü nunu sie puo zhü chüpie di Ukepenuopfü tshe zo puo thuo puo kinu vota.

²⁶ Süla themia peteko u ngo phreta, sidi uko Ukepenuopfü tshe mu michie phi sa di sie, “Thie úko mha kethekhrükecü nguwata zo!”

Jisu Levi Kiekelie

²⁷ Mha hako sie puo tuo prazhü ru khezhanuo khruoyakezha Levi ükecü mia puo khezhanuo kekhruo ki nu ba di ngulie ru puo sie, “A siemedziliecie.”

²⁸ Sitse puo mha pete khawa di puo siemedzita.

²⁹ Süsie Levi puo ki nu puo la thehe kezha puo keseshü, tsiu sünu khezhanuo khruoyakezha kekra mu kekreimia huo rei sa di vo uko keze mizhü geinu hie ba.

³⁰ Süki Farisiko mu thezhokepethako vor pethakelieko gei panya di sie, “Kiüdi nieko khezhanuo khruoyakezhako mu kephoumamiako ze mhacümhakrieya ga?”

³¹ Sitse Jisu sie, “Keshürhomia darukesimia se morei vi; derei darukesimia kechümia la zo.

³² A kemiathoko kietuo üdi vor monyü kephoumamia bu thenoukedilieketuo la kevor zo.”

Mevokecü Dze Ketsokecü

³³ Siro uko sie puo ki, “Johan-e pethakelieko we Farisikoe pethakelieko mhie di tsiekenuo mevo mu chakuo phi, derei noe pethakelieko we mhacümhakrie baya ze.”

³⁴ Sitse Jisu uko ki, “Mia puo thenu lie di mia ze hiekecü ki yasau keba nu puo khriethoko bu mevo balie vi me?

³⁵ Derei mia bu süko ki nu yasau zetaketuo tei puo vortuo; mu süze uko mevotatuo.”

³⁶ Siro puo uko ki dievi pu sa di, “Miapuorei pfhe kesa se pfhekrau pekhuoya mo; mhanuü sishü ro, pfhe kesau rei pfürhawatuo, tsiu pfhe kesayoe pfhekrau ze kemhie motatuo.

³⁷ Siro miapuorei zu kerünyie pie chüzhüsü kewe nu shüya mo, sishü üro, zu kesau chüzhüu pfü phawatuo, sidi zuu krutatuo, tsiu chüzhüsü rei pekawatuo.

³⁸ Derei zu kerünyie rupie chüzhüsü kesa nu shü morosuo.

³⁹ Tsiu miapuorei zu kewe krielieketa sie kesa mengu laya mo, kekreilamonyü puoe ‘Keweu vi,’ ” isiyacü la.