LUK THUKESHÜ DIELIEKEVI 2 - Angami Naga CL (Re-edited) Bible (BSI)

Jisu Kepenuo

¹ Siro sükisü Augustu Kaisar-e kijü nu keba pete bu u za thuketuo die puo khashü.

² Nuolhou phrü kerietho hau Kurini-e Siria ahng chü keba ki chü.

³ Tsiu mia pete u za thutuoü u thuo u ra vo phre.

⁴ Siro Josef rei Galil kijü Nazaret rünau nunu tuo Judia nu David rüna Bethlehem ükezhau nu vo, puo David-nuo kinumia mu puo yiemia zocü la.

⁵ Puo za thutuo üdi puo ze kerituoüwaketapfü Maria rei ze vo, mu süpfü nuoze tei bata.

⁶ Ru unie vo sünu keba ki süpfü puo nuoze tei vorta.

⁷ Sidi puo nuo nuorieu thepfumia yopuo penuolie, sidi pfhe pie puo kezülie di khapie peri bu mhacüyakezha khou nu zhü, kekreilamonyü rüsoki nu unie la thechü jüketa la.

Tekuokepfheko mu Teigeidielieko

⁸ Siro rüna sünu tekuokepfheko terha zhü di theva u kuoko pfheya ru.

⁹ Süki Niepuu dieliemia puoe vor uko mhodzünu thalie, mu Niepuu kezieu uko vapie lutsahatsa ziekruoita, süla uko michie phita.

¹⁰ Derei teigeidielieu sie uko ki, “Nieko michie hiecie! Harie, themia pete u nei phiketuo dieliekevi a se nie ki vorzhie:

¹¹ Thie David rüna nunu Kelakelieu Niepuu Khrista sü penuoliete ho.

¹² Hau nie la zasiu chütuo: nieko pfhenyhie pie unuoyo kezüpie peri bu mhacüyakezha khou puo nu zhü di ngulietuo.”

¹³ Sishü tse teigei nu dieliemia krodi puoe puo ze Ukepenuopfü tshekecü hamhie:

¹⁴ “Tei pesotho gei Ukepenuopfü bu puo za kemeyieu chüliecie; mu kijü keba themia puoe puo neiyakezhako bu kevi chüwaliecie!”

¹⁵ Süsie teigeidielieko uko khawa di teigei khota tse, kuopfheko huoniehuo ki, “Úko Bethlehem nu vo di Niepuu u ki pukeshü mhie mhachüketako meho khe.”

¹⁶ Sidi uko kenourhei vo ru Maria mu Josef unie, mu unuoyo bu peri khou nu zhü di ngulie.

¹⁷ Siro uko süu ngulie tse, nuo hayo dze uko ki pukeshüko pie mia ki pushü.

¹⁸ Mu tekuokepfheko pukeshüko kesi khe u ngo phita.

¹⁹ Derei Maria mha hako pete pie puo nou shüse di süko le sei tuota.

²⁰ Siro tekuokepfheko teigeidielieu pie uko ki pukeshü kemhie touu ngukelie la, Ukepenuopfü za pu kemeyie siro puo tshe mu rhu di tuo lata.

Jisu Za Thokelie

²¹ Siro puo penuokelie zha thetha tseita di unuoyo zhükere tei tsolie tse, puo za thopie Jisu chülie, theza süu puo nuonipfülie kemonu teigeidielieu thuo thoshü zo.

Jisu Ze Rüsuoki nu Kevo

²² Siro Mosa zho-u nu kepu tuoi u chü kemesaketuo teisozhako tsolie tse, Josef mu Maria unie unuoyo pie Niepuu tsüketuo la Jerusalem nu kho;

²³ (Niepuu zho-u nu thupie kezhü hamhie, “Thepfu nuorie penuokelie khe kelakreipie Niepuu vie chütuo.”)

²⁴ Süla Niepuu zho-u nu pupie kezhü “Khruleinuo kenie moro paruonuo kemedzü kenie” ikeshü mhie di sünie sa se kho di ruosuo chü.

²⁵ Süki mia puoe puo za Simeon üdi Jerusalem nu baya; siro themia süu miatho tsiu pecü di Israelmia nou thu peluoshüketuou merü tuoya mu Kemesa Ruopfü puo gei tuo.

²⁶ Siro Kemesa Ruopfü thuo puo bu Niepuu Khristau ngu kemochie siatalie lho ükecü puo ki pupie tuo.

²⁷ Ru Ruopfüu Simeon hü ze rüsuokiu nu vor; mu süki thezho-u nu kepuko chütuo üdi, puo krünie unuoyo Jisu ze rüsuokiu nu vor,

²⁸ mu Simeon unuoyo toupielie di Ukepenuopfü tshekeshü hamhie:

²⁹ “Niepuu, no n die medzi di, tsie we noune nunu n kituou ketseshüwazhie;

³⁰ a mhipie n kelakelieu nguwatacü la,

³¹ No themia pete mhodzünu kesekeshüu,

³² Judakemoko la kezie pesipengukeshü puo, mu n themia Israelko la zayieu.”

³³ Siro puo dze pukeshü süko la puo puo puo zuonie bu u ngota.

³⁴ Siro Simeon japie uko tsüshü, sidi unuoyo zuo Maria ki, “Harie nuo hayoha la Israelmia kekra bu krütatuo mu la sie reilietuo; mu mia bu puo petsouketuo zasi puo,

³⁵ tsiu themia kekra noudo hiepie ngulie kevi chüshütuo, mu zhiecha pie n melou keze chü zotuo,” sita.

³⁶ Süki siedzekesipfü puo ba, puo za Ana, hapfüe Asher yiemia Fanuel nuopfü. Puo cie thenie rübei puo nupfu ze lhou, mu puo phichü phi bata.

³⁷ Puo samipfü puo zo mu cie hiethethaediata. Hapfüe mhakipuorei rüsuokiu cietaya chie mo; sidi puo theva rei khinhie rei Ukepenuopfü rüsuo di mevo mu cha baya.

³⁸ Sütei touki thenu süpfü vor, di Ukepenuopfü tsheta, mu unuoyo dzepie Jerusalem rhashüketuo pfhe keba pete ki pushü.

Jisu Ze Nazaret nu La Kevor

³⁹ Süsie Niepuu zho-u nu chü morokesuo pete chü tseikewa sie, uko keze la Galil nu uko ra Nazaret nu vota.

⁴⁰ Siro nuo süyo phichülie mu meteilie; tsiu mhasi pie puo tshulie mu Kepenuopfü ngukemezhieu rei puo gei balie.

Jisu Rüsuokiu nu Kevo

⁴¹ Teiciekepra Ciekevonyi nyikecü la puo puo mu puo zuo unie Jerusalem nu kho seiya.

⁴² Sidi puo cie kerekenieketa ki, u zho ki tuoi uko thenyiu nu kho.

⁴³ Mu thenyiu tseita di la vorkezhü ki unuoyo Jisu sü Jerusalem nu bata, derei puo puo puo zuo unie hau si tuo mo.

⁴⁴ Siro unie puo üse rüvemia kro-u nu tuo nhiecü le tuo zo, sidi unie zha puo chatuo nu vota, süsie unie seyiemiako mu unie zeko donu puo pfhü sie.

⁴⁵ Sidi unie puo ngulie mota tse, unie la Jerusalem nu puo pfhü vo.

⁴⁶ Sidi zha se sie nu rüsuoki nu ba di puo ngulie; süki puo kepethako donu ba di uko die rünyü mu uko ki mha ketso iba.

⁴⁷ Siro puo die kesi kheko puo kemecie mu uko die kelakeshüko la uko ngo phreta.

⁴⁸ Süki unie puo ngu di unie ngota; sitse puo zuo sie puo ki, “A nuo, no kiüdi hienie gei hita mu? N puo hienie bu hienie nou kemezhie se di n pfhütuoe.”

⁴⁹ Sitse puo sie unie ki, “Kiüdi nnie a pfhü tuo ga? A a puo ki nu ba morosuokecü nnie si mo me?”

⁵⁰ Derei unie puo pukeshü cau silie mota.

⁵¹ Süsie puo unie ze Nazaret nu vota, tsiu puo unie die ze ba zolie, siro puo zuoe die hako pete pie puo nou shüse tuota.

⁵² Siro Jisu mhasi miemielie mu phichü sierlie, sidi Ukepenuopfü mu themia khrie rei pfülie.