LUK THUKESHÜ DIELIEKEVI 1 - Angami Naga CL (Re-edited) Bible (BSI)

Pie Theofil Ketsü

¹ Mia kekra rei u donu mhachü tseikewako dze pfhükengukelieko kesieso di thushü,

² mu ukoe therie nu mhachüketako kengumia mu dieu chaliemia chü di tha hie kie toukeshü tuoi.

³ Thetshepfüyakezha Theofil, a rei mha sükosü dze therie nunu meho menuowaketa la, kesieso di thu lapie n ki shü ro viketuo leliete,

⁴ sidi n bu hamhodzü no pethapfükelieko ketho zokecü si toulieketuo la.

Johan Mia Dzülukepfüu Kepenuo Pesikeshü

⁵ Herod Judia kijü mho kedi chü keba ki, zievomia puo puo za Zakaria ükecü puo tuo, puoe zievo chüyakezha Abija kro-u nu mia puo. Puo kimiae Aron yiemia, mu puo zae Elizabet.

⁶ Unie kenienie rei Ukepenuopfü mhodzünu miatho, tsiu Niepuu zhoko mu diekhakeshüko pete ze tseilieyakezhamia phre.

⁷ Derei unie nuo jü, kekreilamonyü Elizabet ha nuojüpfü puo, siro unie kenienie rei tsa phitazhü.

⁸ Siro puo Ukepenuopfü mhodzünu zievo kechü teiki puo kro-u zievo merei mhathoko kechü mese vor tse,

⁹ zievoko chüyakezha zho-u medzi di theza chü kesie ki kethengu theketuo puo kedalieta, süla puo tuo Niepuu rüsuoki nu leta.

¹⁰ Siro kethengu thekeba ki mechüu pete chazou nu kecha chü ba.

¹¹ Sitse Niepuu dieliemia puo vor kethengu thekeba ruosuobau thezatsa thalie di puo pengushü.

¹² Siro Zakaria süu ngukeshü ki puo keriewa di michieta.

¹³ Derei dielieu sie puo ki, “Michie hiecie, Zakaria, n kecha rünyüliete, mu n kimia Elizabet thepfunuomia puo penuoshü n tsütuo, mu no puo za pie Johan chütuo.

¹⁴ Unuoyo penuolie tse no n nei mu n noumvütuo, tsiu themia kekra rei u neituo,

¹⁵ kekreilamonyü puo Niepuu mhodzüki zha zotuo. Puo bu mhakipuorei zu morei zu kekuo puorei krielie lho; puo penuokelie mhodzü rei Kemesa Ruopfüu bu puo tshupfü tuotatuo.

¹⁶ Puo Israelko kekra nou chü kedi lapie Niepuu uko Kepenuopfü kitsa shüshütuo.

¹⁷ Siro puo Elija ruopfü mu kekuo se di Niepuu mhodzü rie votuo, miapuonuoko nou chü kedipie mianuonuoko gei shütuo, mu mia die zeyakemoko nou chü kedipie kemiatho mhasitsa shüshütuo, sidi themiako kesepie Niepuu la dojülieketa chütuo.”

¹⁸ Sitse Zakaria sie dielie süu ki, “Kimhie di a hau silie ta? Kekreilamonyü a tsate mu a kimia rei tsate.”

¹⁹ Sitse teigeidielieu sie, “A Gabriel. A Ukepenuopfü mhodzünu thaya, puo a bu n rüchünu mu a bu thedze kevi hau se n ki vornu ketseshü ho.

²⁰ Derei no tsie a dieko, puotei vorlie ro chü tseilieketuo pele kemo la, mha hako chü vorketuo teisozhau tsolie kemochie no liehuo di die pulie mo batatuo.”

²¹ Süki themiako Zakaria pfhe tha, mu puo rüsuoki nu ba cha phiketa la u ngota.

²² Sidi puo par tse, puo uko ki die pulie kenjüta, sitse uko sie puo üse rüsuoki nunu ziemho puo nguwaketa lelie. Puo die pulie lhoketa la puo dzie pie thedo chü uko rüchü.

²³ Siro puo lietho kechü zhako tseita tse puo kinu vota.

²⁴ Siro teisozha süko sie puo kimia Elizabet nuonipfülieta mu hapfü khrü pengou puo ki tse pra mo bata. Sitse hapfü sie,

²⁵ “Niepuu thuo a la haha chüshü zo sidi a ngumezhieshüte mu a bu a themiako mhodzü thenga chü tuoyakezhau chüsete,” isi bata.

Jisu Kepenuo Pesikeshü

²⁶ Süsie khrü sorouu khrü Ukepenuopfü thuo dielieu Gabriel ketsepie Galil kijü nu Nazaret ükecü rünau nu shü,

²⁷ puo ketsepie phousepfü puo, David yiemia Josef ükecümia puo ze kerituoü kebapfü ki shü. Rüü phouse süpfü za Maria.

²⁸ Puo süpfü ki vor di sie, “Harie thekhriekepfüpfü, n neiliecie, Niepuu n ze tuote,” si.

²⁹ Derei puo die süu sipie puo melou toutoui di die süu puoca kedipuo üsietie shi lelie mo bata.

³⁰ Sitse teigeidielieu sie puo ki, “Michie hiecie, Maria, no Ukepenuopfü khriepfü bate mu!

³¹ No nuonipfülie di thepfunuomia puo penuolietuo mu no puo za üse Jisu tholietuo.

³² Puo kezhamia puo chütuo mu puo üse Kerükrietho-u Nuou üdi kietuo, mu Niepuu Ukepenuopfü thuo puo puou David kedibau khapie puo tsütuo.

³³ Siro puo kechachie Jakob kiu mho dituo; mu puo kedi puo thela chütalie lho zo!”

³⁴ Sitse Maria sie teigeidielieu ki, “A sü phousemiapfü puo zoluo, kikidi mha hau chülie ta?”

³⁵ Sitse teigeidielieu sie puo ki, “Kemesa Ruopfüu n gei vortuo, mu Kerükrietho-u kekuo pie n soupfülietuo; süla penuolieketuoyo mesa zo; puo üse Ukepenuopfü Nuou ütuo.

³⁶ Siro harie, n seyiemia Elizabet, mia puo üse nuojüpfü üyakezhapfü puo tsa zenu nuonipfükelie tsie ha khrü sorouute.

³⁷ Kekreilamonyü Ukepenuopfü la zowe mhapuorei chülie kelho tuo mo.”

³⁸ Süki Maria sie, “Harie, a sü Niepuu kituopfü zeru, n kepu kemhie a geinu chüliecie,” sishü. Süsie teigeidielieu puo kinu tuota.

Maria Elizabet Ki Kevo

³⁹ Süki Maria kenourhei sie tuo kijüthou gei keba Judia kijü rüna puo nu vota,

⁴⁰ sidi puo tuo Zakaria ki nu le di Elizabet kelushü.

⁴¹ Siro Elizabet-e Maria puo kelukeshü die sishü tse, unuoyo puo va nunu rülhouta. Tsiu Elizabet-e Kemesa Ruopfü bu puo tshupfü di,

⁴² die pu puo rhiechü di sie, “No sü thenumia donu thejakepfüthopfü, mu n nuo n va nu kebayo rei thejakepfütho.

⁴³ Siro a Niepuu zuopfü a kinu kevor, kikidi hailie ga?

⁴⁴ Kekreilamonyü no a kelukeshü sishü mu, a va nu keba unuoyo rei puo keneipfü rülhou bate.

⁴⁵ Sirei Niepuu puo geinu chü tsei vorketuo pukeshü dieu pelekeliepfü sü thejakepfütho,” sita.

Maria Ukepenuopfü Ketshe

⁴⁶ Sitse Maria sie, “A noue Niepuu le pezha bate,

⁴⁷ mu a ruopfü rei a Kelakelieu Ukepenuopfü nunu puo nei bate,

⁴⁸ puoe puo kituo nucünutho kemopfü rei mehokeshü la. Ketho zo, tsie yawinu thephou pete bu a üse thejakepfüthopfü ükietuo.

⁴⁹ Kekuotho-u a la mha kezha chüshüte, mu puo za sü mesa.

⁵⁰ Puoe puo khrü preiyakezhamia nuosenuoyieko ngumezhieshüya.

⁵¹ Puoe puo bou geinu puo kekuou pie pekieshü; sidi u nou nu kemiako tuoyakezhako phruo kecürewate.

⁵² Puo kedibako geinu kekuoko shükhrüwa, sidi kerünuoko piesieshü;

⁵³ puo mha kevi khe se merüketuoko ketshu chüshü, mu mhakenyimiako bu methuo di tuota.

⁵⁴ Puoe puo kituou Israel ngumezhieshütuoüketuo rükralie di uko khruohishü,

⁵⁵ puoe kechachie u puonuoko ki, Abraham mu puosepuoyieko pete ki phrapie kezhü tuoi.”

⁵⁶ Siro Maria khrü se mese puo ze ba di süsie la puo kinu vota.

Johan Mia Dzülukepfüu Kepenuo

⁵⁷ Süsie Elizabet nuoze tei tso vorlie tse, puo thepfunuomia yopuo penuolie.

⁵⁸ Siro puo zanuoko mu puosepuoyieko rei Niepuu thuo puo ngumezhie phishüta zocü silie di puo ze uko nei phita.

⁵⁹ Süsie zha thetha nhie mia unuoyo zhüretuoü vor, mu uko unuoyo za thopie puo puo Zakaria zashü chütuo üta.

⁶⁰ Derei puo zuopfü sie, “Mo, puo za thopie Johan chütuo.”

⁶¹ Sitse uko puo ki, “N yiemia puorei theza süu seya moe.”

⁶² Sidi uko thedo chüpie puo puo kie di puoe unuoyo za supuo chütuoü sietie shi idi puo rüchü.

⁶³ Süla puo shiluo puo chalie di süu geinu, “Puo zae Johan,” sishü. Süla uko pete u ngo phreta.

⁶⁴ Süsie puo tie tiega mha parta mu puo meü rüprei parta, sidi puo die pu chielie di Ukepenuopfü tsheta.

⁶⁵ Sükisü zanuoko pete michie phi phreta, tsiu mha hau chüketa dze pu keza Judia kijüthou rüna pete nu vota.

⁶⁶ Siro kehourapuorei thedze süu sikelie khe u nou nu, “Nuo hayo gei thiesie kedipuo chü vortie shi?” idi le phre tuota. Kekreilamonyü Niepuu dzie kekuou puo ze tuotacü la.

Zakaria Siedzedie Kepu

⁶⁷ Siro puo puo Zakaria Kemesa Ruopfü bu puo tshupfü di siedzedie hau pu:

⁶⁸ “Israel Kepenuopfü, Niepuu bu thetshepfücie, puoe puo themiako mehoshü di uko rhalieketa la.

⁶⁹ Puoe puo kituo David kiu nunu, u la kelakelie kekuo puo se siershü,

⁷⁰ puo thiedzütho kemesa siedzekesiko geinu pupie kezhü tuoi,

⁷¹ u ngumvüko mu u ngumecüyakecü pete dzie nunu u kelashütuoü.

⁷² Sümhie puo phrapie u puonuoko ki keshü ngukemezhieu khashü, mu puo kemesa dietseidiekho-u rükrashü,

⁷³ u puotsa Abraham ki rüse zo di phrapie kezhüu,

⁷⁴ u ngumvüko dzie nunu u kelalietuo üdi, michie mo di puo lie chütuoü,

⁷⁵ u bu mesa mu miatho di u teisozhako pete puo mhodzünu tuotuoüshü.

⁷⁶ Siro a nuo, no üse Kerükrietho-u siedzekesiu üdi kietuo; n bu Niepuu mhodzü vo di chau keseketuo la,

⁷⁷ puo themiako ki, uko kephouma vakeshü nunu kelalieketuo mhasi pushüketuo.

⁷⁸ Úko Kepenuopfü ngukemezhie la, peso geinu teikeso u gei tsurketuo,

⁷⁹ kezie pie kezei nu kebako mu kesia khrüu nu ketuoko va pezietuoü, u phi teshüpie noune cha nu shütuoü.”

⁸⁰ Siro unuoyo phichülie mu ruopfü kitsa rei meteilie, sidi puo Israelmia mechü mhingu chü par kemochie rayha nu lhou tuo tso.