Levimiako 9 - Angami Naga CL (Re-edited) Bible (BSI)

Aron-e Ruosuo Khakeshü

¹ Zha thetha nhie Mosae Aron, puo nuo thepfuko mu Israelmia phichüko kielie.

² Puoe Aron ki pukecü, “Kephouma ruosuo la thudo yopuo, mu kethe ruosuo la tekuochü puo selie, kenienie rei ciekemo phretuo, sidi sünie pie Jihova mhodzünu shülie.

³ Sidi Israelmiako ki, ‘Kephouma ruosuo la mvüdo puo selie, siro kethe ruosuo la mithunuo yopuo tsiu tekuonuo yopuo, kenienie rei cie puo nuo, ciekemo selie;

⁴ siro vitho ruosuo la thudo puo mu tekuochü puo selie, Jihova mhodzünu ruosuo chüketuo la, mu siro tier pie kereikecü lhacülhale ruosuo rei sa; kekreilamonyü Jihovae thie nie pengushütuo.’ ”

⁵ Siro ukoe Mosa pukeshü pete se rüsuopfhekiu mhodzünu vorlie, mu mechükehouu pete vor Jihova mhodzünu thalie.

⁶ Mosae sie, “Jihovae nie bu chünu di diekhakeshüu hau; mu Jihova zapuzayieu pie nie pengushüketuo la.”

⁷ Süsie Mosae Aron ki, “Ruosuobau penuo vorlie, sidi n kephouma ruosuou mu kethe ruosuou khashülie, mu n thuo n la tsiu themiako la ruotho chüshülie, Jihovae diekhakeshü tuoi.”

⁸ Süla Aron-e ruosuobau penuo volie, di kephouma ruosuo mithunuoyo dukhrilie, süu puo thuo puo la.

⁹ Tsiu Aron nuo thepfukoe thezieu pie vor puo tsüshü mu puoe puo dziekinuo pie thezieu nu shü di süu pie ruosuobau kiako gei shü tsiu thezieu rupie ruosuobau phi nu shüwa;

¹⁰ derei puoe kephouma ruosuou nunu puoshuo, puomecü mu puose gei ketuou pie ruosuobau geinu thewa, Jihovae Mosa ki diekhakeshü tuoi.

¹¹ Puochü mu puozhü we casie nu puoe mi pie thewa.

¹² Süsie puoe kethe ruosuou dukhrilie; siro Aron nuo thepfukoe puozie pie puo tsüshü, mu puo süu kegepie ruosuobau khie lutsahatsa vashü.

¹³ Siro ukoe kethe ruosuou khapie puo tsüshü, chükhrie puopuo idi, tsiu puotsüu sa, mu puoe süko pie ruosuobau geinu thewa.

¹⁴ Puoe puorieko mu puophiko khrüwa, sidi ruosuobau geinu kethe ruosuo la khakeshüu sa süko thewa.

¹⁵ Süsie puo themiako ruosuou khashü mu themiako kephouma la ruosuo khashüketuo temvüu selie, di süu dukhrilie, di puoe kephouma la süu khashü, kephouma ruosuo khakeshü kerieu tuoi.

¹⁶ Tsiu puoe kethe ruosuou khashü, mu thezho khakeshü mhie di khashü.

¹⁷ Siro puoe lhacülhale ruosuo khashü, sidi süu puo dzie ketshu pielie, di khise gei kethe ruosuo khakeshüu zomonyü süu rei pie ruosuobau geinu theshü.

¹⁸ Siro puo themiako la vitho ruosuo khakeshü thudo-u tsiu tekuochüu rei dukhrilie; mu Aron nuo thepfukoe puozie pie puo tsüshü, mu puoe süu kegepie ruosuobau khieümhou vashü.

¹⁹ Siro thudo-u tsiu tekuochüu shuo, puomei shuou, puorierhuoko, puomecü mu puose phrie rei khashü;

²⁰ siro ukoe puoshuo pie puokhouzü gei shülie, sidi puoe ruosuobau geinu puoshuo the pekhuwa,

²¹ derei Aron-e puokhouzü mu puodo thezatsa piesie kegekecü ruosuo la Jihova mhodzünu kegeshü; Mosae diekhakeshü tuoi.

²² Süsie Aron-e puo dzie yhapie themiako kitsa shü di japie uko tsüshü, sidi puoe kephouma ruosuo; kethe ruosuo, vitho ruosuoko chükewa nunu kerta.

²³ Siro Mosa mu Aron unie-e rüsuopfhekiu nu leta, mu unie la par tse japie themiako tsüshü, sidi Jihova zapuzayieu themiako pete pengushü.

²⁴ Jihova mhodzünu mi par di kethe ruosuou mu ruosuoba gei chüshuou the pejüwa; siro themiako süu ngushü tse ukoe melie petoshü, di tetsu zerepfü zhüta.