Levimiako 8 - Angami Naga CL (Re-edited) Bible (BSI)

Rühekelie Zhoko

¹ Jihovae sie Mosa ki

² Aron mu puo nuo thepfuko zelie, tsiu uko pfheneiko, kenhekecü tier-u, kephouma ruosuo la thudo-u, tekuochünie, mu khreiüshükemo niekhrüda rhau sa selie;

³ sidi rüsuopfhekiu kikha kinu mechükehou pete kie kengushülie.

⁴ Sitse Mosae Jihova diekhakeshü tuoi chülie; sidi mechükehouu bu rüsuopfhekiu kikha kinu kengulie.

⁵ Mosae mechükehouu ki pukecü, “Hau Jihovae chünu di diekhakeshüu zo.”

⁶ Siro Mosae Aron mu puo nuo thepfuko ze vorlie di dzü pie uko khrüwa.

⁷ Sidi puoe boulieu pie puo gei shü, mu chiepha pie puo gei shü, tsiu pfheneiu pie puo pedzieshü, siro zievoboulieu pie puo gei shü, mu zievoboulieu chiepha do menuokelieu pie puo chie whi di boulieu phapie puo kushü.

⁸ Siro puoe merükewheu pie puo gei shü, sidi merükewheu gei Urim mu Thumim khashü.

⁹ Siro puoe tsüzeu pie puo tsü gei shü, mu puo mhodzütsa tsüzeu gei puoe suna rütsonyie kemesa tsüreu khashü, Jihovae Mosa ki diekhakeshü tuoi.

¹⁰ Süsie Mosae u kenhekecü tier-u selie di pie kemesachüu mu mhapuo nu keba pete kenheshü, di uko chü kemesashü.

¹¹ Siro puo tier huo kegepie ruosuobau va thenie vashü, mu pie ruosuobau nu puokhou puoli pete, siro puo seikhouko mu kedoubau chü kemesaketuo la.

¹² Mu puoe kenhekecü tier huo rupie Aron tsü gei shü, di puo kenheshü, puo chü kemesaketuo la.

¹³ Tsiu Mosae Aron nuo thepfuko ze vorlie, di boulie pie uko bu boulielie siro chiepha pie uko gei shü, mu tsüre pie uko tsü gei khashülie, Jihovae Mosa ki diekhakeshü tuoi.

¹⁴ Süsie puoe kephouma la ruosuo khashüketuo thudo-u se vorlie; sitse Aron mu puo nuo thepfuko uko dzie pie kephouma ruosuo la khakeshü thudo-u tsü gei shü.

¹⁵ Mu Mosae süu dukhrilie, sidi puo zie pielie di puo dziekinuo pie ruosuobau kia gei va voshü, sidi ruosuobau chü kemesashü, sidi thezieu rupie ruosuobau phi nu shüwa, sidi süu chü kemesashü, süu la ruotho chüketuo la.

¹⁶ Mu puoe puorierhuoko selie, siro puose gei rhüpfüketuou rei sa, mu puomecünie shuo sa, sidi Mosae ruosuobau geinu süko theshü.

¹⁷ Derei thudo-u mu puo zhüko, puochü, siro puo buo, puoe pie casie nu mi nu thewa, Jihovae Mosa ki diekhakeshü tuoi.

¹⁸ Süsie puoe kethe ruosuo la tekuochüu khashü mu Aron tsiu puo nuo thepfuko uko dzie pie tekuochüu tsü gei shü.

¹⁹ Mosae süu dukhrilie, di puo zie kegepie ruosuobau va hou voshü.

²⁰ Tsiu tekuochüu khrie petselieta tse, Mosae puotsüu, puo khrieko mu puoshuoko theshü.

²¹ Sidi dzü pie puorieko mu puophiko khrüwa di Mosa ruosuobau geinu tekuou pete theshü di süu bu kethe ruosuo, kethengu, mi nu thepie Jihova ki khakeshü puo chüshü, Jihovae Mosa ki diekhakeshü tuoi.

²² Süsie puo tekuochü kekreiu ze vor, chü kemesakelie tekuochüu; sitse Aron mu puo nuo thepfuko u dzie pie tekuochüu tsü gei shü.

²³ Mu Mosae süu dukhrilie, di puo zie huoyo pie Aron nyie puo zatsa puo nyietshe gei kenheshü, siro puo dziekrü puo zatsa mu puo phikrü puo zatsa rei vashü.

²⁴ Süsie Aron nuo thepfuko ze vorlie, di Mosae thezieu huo pie uko nyietshe u zatsa rei kenheshü mu u dziekrü u zatsa tsiu u phikrü u zatsa kenheshü; mu Mosae thezieu kegepie ruosuobau va hou voshü.

²⁵ Mu puoe puoshuou, puomei shuou mu puorierhuo gei keba pete, siro puose gei rhüpfüketuou, mu puomecünie shuo sa, mu puodo puo zatsa sa selie.

²⁶ Siro Jihova mhodzünu keba khreiüshükemo niekhrüda rhau nunu puoe khreiüshükemo niekhrüda puo, mu tier sakecü niekhrüda puo, tsiu rüpfükecü niekhrüda puo chü pielie, di süko pie puoshuo gei mu puodo puo zatsa gei shülie;

²⁷ puoe hako pete pie Aron mu puo nuo thepfuko dziezhü nu shü di Jihova mhodzünu piesie kegekecü ruosuo chüshü.

²⁸ Sitse Mosae uko dzie nunu süko pielie, di chü kemesakecü ruosuo, puore kethengu, mi nu pie Jihova ki ruosuo chüketuo la ruosuobau geinu süko theshü.

²⁹ Siro Mosae puo khouzüu pielie di Jihova mhodzünu kegekecü ruosuo kechü la kegeshü, sidi chü kemesakelie tekuochüu süue Mosa yau, Jihovae Mosa ki diekhakeshü tuoi.

³⁰ Süsie Mosae kenhekecü tier-u huo tsiu ruosuoba gei keba thezie huo pielie, di kegepie Aron siro puo pfheneiko vashü. Mu puo nuo thepfuko tsiu uko pfheneiko rei vashü, sidi puo Aron mu puo pfheneiko, puo nuo thepfuko mu u pfheneiko chü kemesalie.

³¹ Siro Mosae Aron mu puo nuo thepfuko ki pukecü, “Rüsuopfhekiu kikha kinu themuou chalie, di sükinu süu mu chü kemesakelie ruosuo rhau nu keba niekhrüdau sa cülie, ae ‘Aron mu puo nuo thepfuko bu süu cütuo,’ idi diekhakeshü tuoi.

³² Siro themuo mu niekhrüda peshapie kebako mi pie thewatuo.

³³ Mu nie-e zha thenie rüsuopfhekiu kikha cie pralie lho, nie chü kemesakecü zhako tseita kemochie, puoe nie chü kemesakecü zha thenie lietaketuo la.

³⁴ Jihovae nie la ruotho chüketuo la, thie chükecü tuoi chünu di diekhashüwate.

³⁵ Nie-e teizeiteiso zha thenie rüsuopfhekiu kikha ki batuo, sidi Jihova chünukeshüko chütuo, nie bu siata molieketuo la; kekreilamonyü ae diekhashüwaketa la.”

³⁶ Sitse Aron mu puo nuo thepfuko Jihovae Mosa geinu diekhakeshü pete chülie.