Levimiako 7 - Angami Naga CL (Re-edited) Bible (BSI)

¹ Haue kejo la ruosuo khakeshü zho-u. Süue kemesatho;

² ukoe kethe ruosuo khakeshü dukhrikecü chüu nunu kejo la ruosuo khakeshüu rei dukhrituo, mu süu zie pie ruosuoba lutsahatsa vatuo.

³ Mu puoshuo pete khashütuo, puomei shuou, puorierhuoko,

⁴ puomecünie gei khepfüketuoko tsiu puomecünie, chieca ki ketuo puoshuo sa, mu puose sa bielietuo;

⁵ sidi zievo-ue hako pie Jihova ki mi nu ruosuo khakeshü puo chü di ruosuobau geinu thetuo; haue kejo la ruosuo khakeshü puo zo.

⁶ Zievoko donu thepfumia kehoupuorei süu cülie vi, thechü kemesa puo nunu süu cütuo; süu kemesatho puo.

⁷ Kejo ruosuo khakeshüue kephouma ruosuo khakeshü mhie zo, unie la thezho puo zo; mu pie ruotho kechü zievo-u bu süu lietuo.

⁸ Siro themia kehoupuo la shierei kethe ruosuo khakeshü zievo-ue kethe ruosuo khakeshü zhüu lielietuo.

⁹ Siro lhacülhale pie ruosuo khakeshüu miphu nunu rie mu li nu morei shüthuoli nunu kethuocü pete-e khakeshü zievo-u vie chütuo.

¹⁰ Mu lhacülhale pie ruosuo nu khakeshü tier pie kerei morei peso shierei Aron nuo thepfuko vie chütuo, mu zatou phretuo.

¹¹ Mu haue mia puo bu vitho ruosuo khapie Jihova ki shülie kevi zho-u.

¹² Puo kethezie la süu khashü ro, puoe khreiüshükemo niekhrüda tier sa kerei di; khreiüshükemo niekhrüda rüpfüpfekecü tier pie kenhe, mu thou kevitho pie chükecü niekhrüda tier pie kerei menuolie di kethezie ruosuo khashütuo.

¹³ Kethezie la vitho ruosuo khakeshü ki puoe khreiükeshü niekhrüdako khashütuo.

¹⁴ Mu puoe Jihova ki ruosuo khakeshü nu niekhrüda puopuo khashütuo; süue vitho ruosuo zieu kelhoukeshü zievo-u vie chütuo.

¹⁵ Mu kethezie la vitho ruosuo khakeshü muou ruosuo khakeshü nhie cütuo, puoe themuo süu khapie ba khise tso lho.

¹⁶ Derei puo ruosuo khakeshüu phrakeshü morei mianyü ruosuo puo ro puoe ruosuo khakeshü nhie süu cütuo mu peshapie kebako süsienhie cütuo,

¹⁷ derei ruosuo khakeshü muou zha se ketso pesha ba ro süu mi pie thewatuo.

¹⁸ Vitho la ruosuo khakeshü muou zha se nhie cü ro, ruosuo khakeshüu lie mvütatuo, morei ruosuou pie puo vie tho motatuo; süu pie mha kerütse chütatuo, mu kehoupuorei süu cü ro kejo-u toupfütuo.

¹⁹ Themuou se vo mha mesa kemo nyüwa ro, süu cülie lho; mi pie süu thewatuo, kehoupuorei mesakecümia themuo kekreiu cülie vi,

²⁰ derei mesa kemo puo puo gei ba di Jihova vitho la ruosuo khakeshü cükecüu, themia süu puo themiako donunu puo kelhiwatuo.

²¹ Mu kehoupuorei mesa kemo puo bie ro, themia mesa kemo puo morei khunuo mesa kemo puo shierei, morei mesa kemo kerütse puo shierei, Jihova vitho la ruosuo khakeshüko cü ro, themia süu puo themiako donunu puo kelhiwatuo.

²² Jihovae Mosa ki:

²³ Israelko ki pushülie: Nieko, thudo, tekuo morei temvü shuo cülie lho.

²⁴ Khunuo puo thuo siaketau shuo, mu khunuo bu ciechücierhawaketau shuo pie mhakehoupuorei chülie vi, derei nieko süu cülie lho.

²⁵ Kekreilamonyü themia kehoupuorei mi pie Jihova ki ruosuo khakeshü nu sekecü khunuou shuo cükecüu puo themiako donunu puo kelhiwatuo.

²⁶ Sizomonyü niekoe nie kebachü kehoura rei thezie cülie lho, pera morei khunuo zie shierei.

²⁷ Kehoupuorei thezie kecüu, puo themiako donunu süu kelhiwatuo.

²⁸ Jihovae Mosa ki:

²⁹ Israelko ki pushülie, Jihova ki puo ruosuo khakeshüu puo ruosuou se Jihova ki vortuo; puo vitho ruosuo khakeshü nunu.

³⁰ Puo thuo puo dzie pie mi nu ruosuo khakeshüu se Jihova ki vortuo; puoe puoshuo mu puokhouzü se vortuo, puokhouzü pie Jihova mhodzünu kegekecü ruosuo puo chülieketuo la.

³¹ Zievo-ue puoshuo pie ruosuoba geinu theshütuo, derei puo khouzüue Aron mu puo nuo thepfuko la zotuo.

³² Mu puodo thezatsa pie nie-e u vitho ruosuo nunu khakeshü puo chü di se zievo-u tsütuo;

³³ Aron nuo thepfuko donu vitho la thezie mu puoshuo ruosuo khakeshüu puodo thezatsa pie puo ya chütuo.

³⁴ Kekreilamonyü ae Israelko kinu, uko vitho la ruosuo khakeshüko donunu, puokhouzü kegeshükecüu siro puodo khakeshüu pielie di khapie Aron zievo-u mu puo nuo thepfuko tsüwate, Israelko kinu khapie uko ya chü seiketuo la.

³⁵ Hauha mi nu pie Jihova ki ruosuo khakeshü nunu Aron mu puo nuo thepfuko ya chükeshüu, uko bu Jihova zievo chütuo üdi uko khashüwakecü nhie nu chü kemesapie uko tsüwaketau,

³⁶ Jihovae uko kenhekecü nhie Israelmiako bu pie uko tsünu di diekhakeshüu; uko nuosenuoyie pete nu hau uko ya chü sei zotuo.

³⁷ Hau kethe ruosuo, lhacülhale ruosuo, kephouma ruosuo, kejo ruosuo kha kemesakeshüu, mu vitho ruosuo la khakeshü zho-u zo.

³⁸ Jihovae Sinai kijüthou geinu diekhakeshü, Israelmiako bu Sinai nhatsa nu uko ruosuo se Jihova ki vonu di diekhakeshüu zo.