Levimiako 6 - Angami Naga CL (Re-edited) Bible (BSI)

¹ Jihovae Mosa ki:

² Mia puoe puo zanuou mha pie puo pelekeshüu nu dietho mota di puo zanuou sewa, morei mia vie selie, morei puo zanuou peseta, di Jihova mhodzü phoumawa.

³ Morei pejükewa puo ngulie derei medata, tsiu miae mhachü di phoumatayakecüko nu meda di rüse,

⁴ siro phoumawa di jota ro, puoe mia vie sekelieu, morei mia pese di piekelieu, morei mia mha pie puo pelekeshüu nu, morei mha pejükewa ngukelieu nu,

⁵ morei mhapuo la puoe meda di rüsekewau puoe kha tsei lashütuo, mu puoe kejo la ruosuo khakeshü nhie pengou-zapuo pie ba sashütuo, di supuo vie shikecüu tsütuo.

⁶ Mu puo kejo la Jihovae ruosuo khakeshüu se vortuo, tekuokro nunu tekuochü ciekemo puo, kejo ruosuo khakeshüu nu tuoi puo thuo puoma tholie, kejo ruosuo la se zievo-u ki vortuo.

⁷ Sidi zievo-ue Jihova mhodzünu puo la ruotho chütuo, mu puoe kehoupuorei chüwa di joketau la puo kejo vawatuo.

Ruosuo Kechü Zho Kekrei Huo

⁸ Jihovae Mosa ki:

⁹ Aron mu puo nuonuo thepfuko ki pushücie, kethe ruosuo khashüketuo la thezho hauha, kethe ruosuo khakeshüu bu teizei pete ruosuobau mho miphu gei zha khise tsotuo, mu ruosuobau gei mi bu tu batuo.

¹⁰ Mu zievo-ue puo linen pfhenei pekhroko sekelie sie puo linen pfhenei pie puo gei shülietuo, mu puoe migeko pie phi ruosuobau gei mi bu kethe ruosuo khakeshü the pejükewau khieki shütuo.

¹¹ Süsie puo pfheneiko rhuowa di pfhenei kekrei selietuo, di migeko pie razhüchüu cie vo thechü kemesa puo nu shüwatuo.

¹² Ruosuobau gei miu bu tu sei batuo, puo bu mhetalie lho, zievo-ue teisoduü sei pie vo sügeinu thetuo, mu puoe kethe ruosuo khakeshü pie puo gei shü menuoshütuo, di puo geinu vitho la ruosuo khakeshü shuoko thetuo.

¹³ Ruosuobau gei mi bu tu sei batuo, süu bu mhetalie lho.

¹⁴ Siro lhacülhale ruosuo la thezho hauha. Aron nuo thepfukoe süu pie Jihova mhodzünu ruosuobau dzütsa nu khashütuo.

¹⁵ Mu ukoe mia puo bu thou ruosuo khakeshüu nunu thou dzielhi puo siro tier sa mu thou pete sa pielie di ruosuobau geinu puo kerükra yau chü di thetuo, Jihova ki kethengu puo chütuo.

¹⁶ Siro keshako Aron mu puo nuonuokoe cütuo; süu khrei sa mo di thechü kemesa puo nunu cütuo; rüsuopfhekiu kitiezha nunu ukoe süu cütuo.

¹⁷ Süu khrei sa di rielie lho. Mi nu se a ki ruosuo khakeshü nu, ae süu pie uko ya chüketuo la khashü; süu mha kemesatho puo; kephouma la ruosuo mu kejo la ruosuo khakeshü tuoikecü puo zo.

¹⁸ Aron nuonuoko donu thepfumia kehoupuorei süu cülie vi, mi nu se Jihova ki ruosuo khakeshüko nunu, nie nuosenuoyie pete nu kechachie la pushüwaketa tuoi; kehoupuorei süko nyükecüu mesatatuo.

¹⁹ Jihovae sie Mosa ki:

²⁰ Puo kenhekelie nhie Aron mu puo nuo thepfuko Jihova ki ruosuo khashüketuo hauha: Thou kememhie efa ker-zapuo pie lhacülhale ruosuo khashü seiyakecüu chütuo. Süu ketoupuo pie khise gei mu ketoupuo pie thevatie khashütuo.

²¹ Shüthuoli nunu tier sa di süu rietuo; no süu kerei menuo se vor morosuo, lhacülhale pie ruosuo khakeshü nu tuoi di niekhrüda chüpie vor morosuo, sidi Jihova ki puore kethengu puo chü di khashü morosuo.

²² Aron nuo thepfuko donu, puo sou nu zievo chütuo üdi kenhelieketau bu kechachie la pushüwaketa tuoi, süu pie Jihova ki khashütuo; süu pete the zotuo.

²³ Zievo-ue lhacülhale pie ruosuo khakeshü kehoupuorei pete the zotuo; süu cülie lho.

²⁴ Jihovae Mosa ki:

²⁵ Aron mu puo nuo thepfuko ki pushülie: Hauha kephouma la ruosuo kechü zho-u Jihova mhodzü nunu kethe ruosuo khakeshüu dukhrikecü chüu nunu kephouma ruosuo khakeshüu dukhrituo; hauha kemesatho.

²⁶ Kephouma ruosuo khakeshü zievo-u bu süu cütuo; kemesa chüu nu, rüsuopfhekiu kitiezha nunu süu cütuo.

²⁷ Mhakehoupuorei süu chü nyüshü ro mesatatuo, mu puo zie huoyo rei kegepie pfhe vawa ro, noe thechü kemesa puo nunu kegepie vawaketa süu menyituo.

²⁸ Mu rünyoli nu be ro, süu biephrowatuo; derei meseli puo nu süu be ro, süu kezhüwatuo. Sidi dzü nunu kenouwatuo.

²⁹ Zievoko donu thepfuko pete süu cülie vi; süu mha kemesatho.

³⁰ Derei kemesachüu nunu ruotho chüketuo la, kephouma la ruosuo khakeshüu, puo geinu puozie huoyo rei bielie di se rüsuopfhekiu nu kevor-u we cülie lho; mi pie süu thetuo.