Levimiako 5 - Angami Naga CL (Re-edited) Bible (BSI)

¹ Mhanuü mia puoe kephouma chüwa, mu puoe süu ngu morei si di zhapu chüshülie vi ba zo, derei mhapuorei pu moro, puoe siazha ngulietuo.

² Morei mia puoe mha mesa kemo puo biewa, nhachü mesa kemo kesiamo morei khurinuo mesa kemo kesiamo shierei, puoe ngu mo di nyüwa ro, puoe mesa motatuo, puoe jotatuo.

³ Morei puoe themia mesa kemo puo biewa, mesakemo-u puo thuo kehoupuo shierei, puoe süu si ba mo, derei puoe silieta tse puoe jotatuo.

⁴ Morei mia puoe melhu di puotie se mha kesuo morei mha kevi chütuoü rüsewa, kemelhu rüse kehoupuorei themia se rüsewa, mu puo süu le tuo mo di puo süu silie tse, puoe hako kehoupuo nu rei jotatuo.

⁵ Mia puoe mha hako kehoupuo nu rei jota ro, puoe phoumaketau phratuo.

⁶ Siro puoe phoumawaketa la kejo ruosuo khashüketuou se Jihova ki vortuo, kephouma ruosuo la tekuokro nu, tekuokrü, tekuo morei, temvü puo se vortuo; mu zievo-ue puo kephouma sou nu süu khashütuo.

⁷ Derei puoe tekuo puo khashülie re ro, puoe phoumawaketa ruosuo la mekhru kenie morei paruonuo kenie se Jihova ki ruosuo khashütuo; puoe kephouma ruosuo khashüketuo la mu kekreiu kethe ruosuo la.

⁸ Puoe sünie se zievo-u ki vortuo, sidi zievo-ue kephouma ruosuou khashü rietuo, puoe puo vo-u kereiwatuo, derei biethe zowalie lho,

⁹ puoe kephouma la ruosuo khakeshüu zie huo kegepie ruosuobau tsei vashütuo, mu thezie keshako pezupie ruosuobau phi nu shüwatuo; hau kephouma la ruosuo khakeshü puo zo.

¹⁰ Süsie puoe kekreiu pie thezho ki ze kethe ruosuo khashütuo; mu zievo-ue puo kephouma la ruotho chütuo, sidi puo kephouma vawatuo.

¹¹ Derei puoe mekhru kenie morei paruonuo kenie rei khashülie re ro, puoe phoumakewa ruosuo la thou kevitho efa ker-zapuo se vortuo, kephouma ruosuo khashüketuo la; puoe tier pie sünu shülie lho, morei kethengu pie shülie lho, süue kephouma ruosuo khakeshü puocü la.

¹² Siro puoe süu se zievo-u ki vortuo, mu zievo-u süu dzielhi puo pie kerükra yau chü di ruosuobau geinu süu thetuo; mi geinu ruosuo khapie Jihova ki keshü, hauha kephouma ruosuo puo zo.

¹³ Hakemhie di zievo-ue puo mhakehoupuo nu rei kephouma chükewa la ruotho chütuo, mu puo kephouma vawatuo. Siro peshakelieko we zievo-u latuo, lhacülhale ruosuo khakeshü tuoi.

Kejo Ruosuo Khakeshü

¹⁴ Süsie Jihovae Mosa ki:

¹⁵ Kehoupuorei mha pie puo pelekeshüu nu pecülie mota di le kemo puo nu Jihova vie kemesa kehoupuo nu rei phoumawa ro, puoe kephouma ruosuo chüpie Jihova tsütuo, tekuokro nu tekuochü ciekemo puo se vortuo, mu no rakachü pie shekel kechü, kemesachü nu shekel seyakecüu le di puoma thotuo; süue kejo ruosuo khakeshü puo zo.

¹⁶ Puoe mha kemesau se pecülie moketa la thesu khashütuo, tsiu puoe pengou-zapuo pie bashü di pie zievo-u tsütuo; mu zievo-ue kejo la ruosuo khakeshü tekuochüu pie puo la ruotho chütuo, di puo kephouma vawatuo.

¹⁷ Mia puoe Jihova chü hienu di diekhakeshüko puo chüwa di phoumata, mu puoe süu si mo, sizoü rei puoe jotatuo mu kejo-u toupfü zotuo.

¹⁸ Puoe tekuokro nunu tekuochü ciewa kemo puo se zievo-u ki vortuo, kephouma la ruosuo khakeshü ma thokeshü tuoi di, sidi zievo-u bu puoe le kemonu kekrükewau la, puo lanu ruotho chütuo, sidi puo kephouma vawatuo.

¹⁹ Haue kejo la ruosuo khakeshü puo zo, puoe Jihova mhodzünu kejo chükewa la.