Levimiako 4 - Angami Naga CL (Re-edited) Bible (BSI)

Kephouma Ruosuo Khakeshü

¹ Jihovae sie Mosa ki,

² Israelko ki pushülie, themia kehoupuorei le kemo puo nu vo Jihovae chü hienukecü puo chüwa di phoumata ro,

³ mu süue kenhekelie zievo-uta ro, sidi puoe kejo se themiako gei vorwa ro, puo bu phoumakewau la thudonuo ciekemo puo pie kephouma ruosuo chüpie Jihova ki shücie.

⁴ Puoe thudo-u ze Jihova mhodzünu rüsuopfhekiu kikha ki vortuo, di puo dzie pie thudo-u tsü gei shütuo, di Jihova mhodzünu thudo-u dukhrituo.

⁵ Siro kenhelieketa zievo-ue thudo-u zie huo pielie di rüsuopfhekiu nu vortuo;

⁶ mu zievo-u puo dziekinuo pie thezieu nu shü di kemesachü keyapfheu mhodzü nunu va thenie chü thezieu huo kegepie Jihova mhodzünu shütuo.

⁷ Zievo-u thezie huo pie rüsuopfhekiu nu keba kethengu kethe ruosuobau kia gei Jihova mhodzünu shütuo mu puoe thudo-u zie kepeshako rupie kethe ruosuo khakeshü la ruosuoba rüsuopfhekiu kikha ki kebau phi nu shüwatuo.

⁸ Kephouma ruosuo khakeshü thudo-u geinu puoe puoshuo pete bielietuo, puorierhuo peteko,

⁹ tsiu puomecünie tsiu puoshuo puochieca ki puomecünie kuketuoko sa, mu puose gei ketuou sa bielietuo.

¹⁰ Vitho la ruosuo khakeshü ruotho-u siro thudo-u geinu biekelie mhie tou di, mu puo zievo-u kethe ruosuo khakeshü ruosuobau geinu hako theshütuo.

¹¹ Derei thudo-u zhü tsiu puochü pete, puotsü, puophiko, puorieko mu puobuo sa,

¹² puoe thudo-u pete toupie razhüchüu cie pra thechü kemesa ki puo, mige lashükecü ki puo nu seipie mi chülie di thewatuo; mige lashüyakecü ki puo nu süu thewatuo.

¹³ Mhanuü Israel mechükehouu pete-e le kemo nunu kephouma tho puo chüwa di kehouue süu silie mota, mu ukoe Jihova chü hienukeshüko puo chüwa di jota ro,

¹⁴ tsiu uko kephouma chükewau si parta ro, kehouue kephouma ruosuo khashüketuo la thukro-u nunu thudo puo se rüsuopfhekiu mhodzünu vortuo;

¹⁵ mu mechükehou nu phichüko bu Jihova mhodzü nunu uko dzie pie thudo-u tsü gei shü di, Jihova mhodzü nunu thudo-u dukhrituo.

¹⁶ Sidi kenhelieketa zievo-ue thudo zie huo pie rüsuopfhekiu nu vortuo.

¹⁷ Sitse zievo-ue puo dziekinuo pie thezieu nu shü di kemesachü keyapfheu mhodzünu va thenie thezieu huo kegepie Jihova mhodzü shütuo.

¹⁸ Mu puoe thezieu huo pie Jihova mhodzünu keba rüsuopfhekiu nu ruosuobau kia gei shütuo; tsiu puoe thezie keshako rupie kethe ruosuo khakeshü ruosuobau rüsuopfhekiu kikha ki kebau phi nu shüwatuo.

¹⁹ Mu puoe puo geinu puoshuo pete bielietuo di ruosuobau geinu thetuo.

²⁰ Puoe thudo-u pie hakemhie chütuo; kephouma ruosuo nu khakeshü thudo-u pie chükecü tuoi puoe hau pie sükemhie chütuo; zievo-ue uko la ruotho chütuo; sidi uko kephouma vawatuo.

²¹ Puo thudo-u toupie razhüchüu tse pra di, puoe thudo kerieu thekewa mhie süu thewatuo; süu pie mechükehou la kephouma ruosuo khakeshüu chütuo.

²² Krütamia puoe phoumawa, tsiu puoe Jihova puo Kepenuopfü chü hienukeshüko puo chüwa di jota

²³ mu puo kephouma chüwaketau pupie puo pesiwata ro, puoe ruosuo khashüketuo la mvüdo ciekemo puo se vortuo,

²⁴ di puo dzie pie temvüu tsü gei khashütuo, sidi ukoe Jihova mhodzünu kethe ruosuo khakeshüu dukhriyakecü chüu nunu süu dukhrituo; süue kephouma ruosuo khakeshü puo zo.

²⁵ Süsie zievo-u puo dziekinuo pie kephouma ruosuo khakeshü zie huo pielie di kethe ruosuo khakeshü kia vashütuo, sidi thezie keshako rupie kethe ruosuo khakeshü ruosuobau phi nu shüwatuo.

²⁶ Puoe puoshuo pete pie ruosuobau geinu thetuo; vitho la ruosuo puo khakeshü shuo mhie di, sidi zievo-ue puo kephoumau la puo phou mesakelie chütuo, di puo kephouma valietuo.

²⁷ Miahoumia puoe Jihova puo bu chü hienu diekhakeshü puo chüwa di jota.

²⁸ Siro puo kephouma chükewau pupie puo pesishüwata ro, puoe phoumawaketau la temvü, mvükrü ciekemo puo se vortuo.

²⁹ Mu puoe puo dzie pie kephouma ruosuo khakeshüu tsü gei shütuo, sidi kethe ruosuo khakeshü chüu nunu kephouma la ruosuo khakeshüu dukhrituo.

³⁰ Zievo-ue puo dziekinuo pie puozie huo bielie di kethe ruosuo khakeshüu kia vashütuo, mu thezie keshako rupie ruosuobau phi nu shüwatuo.

³¹ Puoe puoshuo pete bielietuo, vitho la ruosuo khakeshüu geinu puoshuo biekelie tuoi. Sidi zievo-ue süu pie ruosuobau geinu thetuo, Jihova ki puore kethengu puo chüketuo la; mu zievo-ue puo la ruotho puo chütuo, sidi puo kejo vawatuo.

³² Puoe kephouma la ruosuo khashütuo üdi tekuo puo se vor ro, puoe tekuo puoü ciekemo puo se vortuo,

³³ sidi puo dzie pie kephouma ruosuo khakeshü tsü gei shütuo, sidi kephouma la ruosuo khakeshü pie kethe ruosuo khakeshü chüu nu dukhrituo.

³⁴ Sitse zievo-ue puo dziekinuo pie kephouma ruosuo khakeshüu zie huo bielie di kethe ruosuo khakeshü ruosuobau kia vashütuo, sidi thezie keshako rupie ruosuobau phi nu shüwatuo.

³⁵ Mu puoe puoshuo pete bielietuo, vitho la ruosuo khakeshü tekuonuou geinu puoshuo biekelie tuoi, sidi zievo-ue ruosuobau geinu süu thetuo, mi pie Jihova ki ruosuo khakeshüko geinu; mu zievo-ue puo kephouma chükewa la puo phou mesakecü chütuo, sidi puo kejo vawatuo.