Levimiako 27 - Angami Naga CL (Re-edited) Bible (BSI)

Chü Kemesakelie Zhoko

¹ Jihovae Mosa ki:

² Israelmiako ki pushülie: Mia puoe themia phou de pie Jihova tsütuo üdi puo die phrashüwa,

³ thepfumia puo phou la liro, teicie mepfü nunu hiesorou ketso ro, no raka shekel hiepengou nu tuo, kemesachüu nu kese shekel-u setuo.

⁴ Süue thenumiata ro shekel sertuo.

⁵ Themiau cie pengou nunu cie mepfü ketso ro no puoma chieketuo shekel mepfütuo, mu thenumia ro shekel kertuo.

⁶ Themia khrü puo nunu cie pengou ketso ro no puoma chieketuo thepfumia la ro rakachü shekel pengou mu thenumia la ro rakachü shekel setuo.

⁷ Siro themiau cie hiesorou mu sümho ro, no puoma chieketuo thepfumia la ro shekel kerepengou mu thenumia la ro shekel ker tuo.

⁸ Mu mia puoe mhajüthor di no puoma chiekeshüu khashülie kenjü ro, puoe themiau ze zievo-u mhodzü vortuo, di zievo-u bu puoma chietuo; zievo-ue themia puo die phrakeshüu kide chülie vi shikecü le di süu chieshütuo.

⁹ Themiae se puo Jihova tsütuo üdi khakeshüu khunuo puo ro, kehoupuorei sikecü pie Jihova ketsü pete mesa zo.

¹⁰ Puoe mhapuorei pie süu sou chülie lho morei süu valilie lho, kevi puo pie kesuo puo, morei kesuo puo pie kevi puo valilie lho; mu puoe khunuo puo pie puo vali ro, süu mu pie puo valikecüu unie kenienie mesatuo.

¹¹ Derei khunuou mesa mo, mu se ruosuo chüpie Jihova tsülie kesuo puo la üro, khunuou ze zievo-u mhodzünu vortuo.

¹² Mu zievo-ue vi mu suokecü ki ze puoma chietuo; mu zievo-u puoma chiekeshüu thelatuo.

¹³ Derei puoe süu rha la nyü ro, puoe puoma pengou-zapuo pie puoma chiekeshüu bashütuo.

¹⁴ Mia puoe puo ki chü kemesapie Jihova tsü ro, zievo-ue puoma chieshütuo; zievo-ue puoma chiekeshüu thelatuo vi shierei suo shierei.

¹⁵ Mu kemesa chü di khakeshüue puo kiu rha la nyü ro, puoe puoma raka pupie chiekeshüu pengou-zapuo pie süu bashütuo, di süu puo vietatuo.

¹⁶ Mia puoe puo vie theka kijü puo chü kemesapie Jihova tsü ro, no puoma chiekeshü ki tsia kidepuo seya shikecü le di tuo; barli homer puo shüyakecü kijü ro raka shekel hiepengou nu puoma chietuo.

¹⁷ Puoe Jubilee teicie cie puo lie chü kemesashü ro, sümhie di puoma chietuo,

¹⁸ derei puoe Jubilee sie nu puo lie chü kemesashü ro, zievo-ue Jubilee teicieu tsoketuo cie kide ba shikecü le di puomau chietuo, sidi no puoma khre kertuo.

¹⁹ Mu puo lie chü kemesakecüue süu rha lalie nyü ro, puoe raka pupie puoma kechie pengou-zapuo pie süu bashütuo, di süu puo vie chütatuo.

²⁰ Derei puoe lieu rhalie moro, morei lieu pie kekreimia puo ki zewa ro, süu rha lalie kenjütatuo;

²¹ derei lieu Jubilee cie kha lakeshü ki, Jihova mhodzü mesatatuo, lie puo kha kreipie bakecü puo tuoi di, mu süu zievo-u dzie nu letatuo.

²² Mia puoe lie lhikhrü puo, kayie lie kemo puo chü kemesapie Jihova ki shü ro,

²³ zievo-ue Jubilee teicieu ketso puoma leshütuo, mu themiaue sünhie puoma chiekeshüu pie mha kemesa puo chü di Jihova tsütuo.

²⁴ Jubilee teicie nu lieu puo kinu khrükelieu, kijü kayie nu puo viekecüu ki la votatuo.

²⁵ Mhama chiekecü pete nu kemesachüu nu shekel medzi di tuo; gera mepfü pie shekel puo chütuo.

²⁶ Derei khunuo nuorieu, mia puo bu rei süu chü kemesa di pie Jihova ki shülie lho, nuorieue Jihova vie zokecü la: thudo shierei tekuo shierei Jihova vie zo.

²⁷ Mu süu khunuo mesa kemo puo ro, puoe no puoma thokeshü nu khrü latuo, puomau pengou-zapuo sashü di, morei süu rhalie moro, puoma chiekeshüu nu süu ze votuo.

²⁸ Derei mia Jihova ki kha kreishüwaketau we, mhakehoupuorei, themia rei khunuo rei, morei puo kayie lie puo rei ze morei rhalie lho; Jihova ki khashüwaketau mesa zocü la.

²⁹ Pekawaketuo la khashüwaketa themiau rha lalie lho; puo pie kesia nu shüwa zotuo.

³⁰ Kijü ker-zapuo, tsia nunu lhou kepar morei seiboko si shierei, Jihova vie zo; süu Jihova mhodzü mesa zo.

³¹ Mia puoe ker-zapuo khakeshüu rha la nyü ro, puoe pengou-zapuo pie süu bashü di rhatuo.

³² Mu mithu rei, tekuo rei ker-zapuo, thupfheseiu khro tuo prakecü ker-u, Jihova mhodzü mesa zo.

³³ Miapuorei süu vi mo suo shikecü ketsolie lho, morei puoe süu valilie lho; mu puoe süu vali ro, süu tsiu pie puo valikecüu rei mesatatuo, mu süu rha lalie lho.

³⁴ Hako Jihovae Israelko la Sinai kijüthou geinu se Mosa tsükeshü, diekhakeshüko zo.