Levimiako 26 - Angami Naga CL (Re-edited) Bible (BSI)

Jihova Diezekecü Thejako

¹ Nie rüsuoketuo la, nie terhuorhi puorei chülie lho, siro sei ketsie dupie miarhi morei tsiepou puorei piesie doulie lho, mu nie ketsie miarhi pie nie kijü nu balie lho: Ae Jihova nie Kepenuopfü zo.

² Nie-e a sabatko zetuo mu a kemesachüu rhutuo: Ae Jihova zo.

³ Nie-e a chünukecüko nu tuo tsiu dietho di a diekhakeshüko chü mu ze ro,

⁴ ae puo teiki tei perüpie nie tsütuo, sitse kijüu gei mha lhou kra parlietuo, siro seiboko u si vüshütuo,

⁵ tsiu nie lienyükelieu khubesi kerie kezie balietuo, mu khubesi riekelieu tsia vakecü kezie balietuo; siro nie niekhrüda cü nie kelhuo chütuo, mu nie kijü nu khrukhre di lhoutuo.

⁶ Siro ae noune pie kijüu nu khashütuo, mu nie zhütsutuo, tsiu miapuorei nie bie kemidewa lho; siro a kijüu nu nhachü kekhriekezeiko whuowatuo, mu zhiechae nie kijü pfüthe volie lho.

⁷ Mu nie-e nie ngumvümia whuotuo, mu uko nie mhodzünu zhiecha geinu tetsutuo.

⁸ Nie mia pengoue mia krie puo whuotuo, siro nie mia krie puoe nyie ker whuotuo; mu nie ngumvümia nie mhodzünu zhiecha geinu tetsutuo.

⁹ Siro ae nie vi medo di nie chü pekruo tsiu pekrashütuo, mu a nie ze dietseidiekhokelieu se balietuo.

¹⁰ Nie-e rüwe ba pecha ketako cütuo, mu nie mha kesau se vorketuo la keweu bie kemesawatuo.

¹¹ Mu ae nie donu a kebachü chülietuo, mu a ruopfüe nieko rütselie lho.

¹² Siro ae nie donu tuotuo, di nie Kepenuopfü chütuo, mu nie a themia chütuo.

¹³ Ae Jihova nie Kepenuopfü, nie bu uko die chülie lho üdi ae Ijipt kijü nunu nie ze parkeshüu, siro ae nie vocie seiko bietshewate mu nieko bu tha pedu di tuoliete.

Dieze Chü Kemo Zhakhrako

¹⁴ Derei nie a die ze mo mu a diekhakeshü hako pete chü moro,

¹⁵ tsiu a nie bu chünukecüko melie; mu ae pethokeshüzhoko mecü, sidi a diekhakeshüko chü mo siro dietseidiekho-u varhuo ro,

¹⁶ a rei nie gei hau chütuo; a michie phikecü se nie gei vor shütuo, mu nie cü pejükecü, tsiu ruki di nie mhi bie kethachükecü, mu nie kerheiro bie pejüwaketuo, nie tsia vashü rei süu kemethuo chütaketuo, nie ngumvümia thuo süu cülietatuo.

¹⁷ A thuo nie petsou, mu nie ngumvümia bu nie biewatuo, nie ngukemecüko nie mho dituo, mu mia nie whuozhü morei nie bu tatuotuo.

¹⁸ Tsiu mha hako nu zorei nie a die rünyülie lho ro, a nie kephoumako la hade thenie pie nie pechütuo.

¹⁹ Sidi a nie kemiakokecü kekuou bietshewatuo, siro nie teiko chüpie thegi tuoi mu nie kijü chüpie mese tuoiwatuo.

²⁰ Mu nie kekuou kemethuo nu pevowatuo, nie kijüe rüchü mota mu kijü nu seiboko u si vüshü motaketuo la.

²¹ Siro nie a petsouzhü zo mu a die rünyülie lho ro, nieko kephoumako la a nieko pechükecü kerieki de thenie khashütuo.

²² Tsiu u a nhachü kekhrieko khapie nie donu shütuo, sükoe nie kinu nie nuonuo sesetatuo, siro nie kicükiriko pekawatuo, mu nie chü petsawatuo, sidi nie chako bu raratatuo.

²³ Mu nie pethazhü zorei nie-e rürei a kitsa vorlie mo, di a petsoutuo zo ro,

²⁴ a rei nieko petsou sa votuo, nieko kephoumako la a thuo süde thenie nieko vütuo.

²⁵ Siro a zhiecha se nieko gei vortuo, dietseidiekho-u khepuketuo la, mu nie-e nie nadiko nu vo kengulie ro, ae thesa ketsepie nie gei shütuo, di nie khapie nie ngumvümia dzie nu shüwatuo.

²⁶ A nie niekhrüda bo-u bietshewa ro, thenumia ker-e mibou puo nunu nie niekhrüda rietuo, sidi nie niekhrüda mesi mejü lapie nie tsütuo; mu nie cü rei nie kelhuo chülie lho.

²⁷ Mu ha zorei nie a die rünyü mvü di a petsoutuo zo ro,

²⁸ a rei noupfhü nunu nie petsou tuo zotuo, di nie kephoumako la a thuo süde thenie se nie pechütuo.

²⁹ Nie-e nie nuo thepfunuoko chü cütuo, mu nie nuo thenunuoko chü cütuo.

³⁰ Mu a nie chü kerükrieko pekawatuo, mu nie kethengu kethe ruosuobako dutshewatuo, di nie kesiamoko kelhoupie terhuorhi kesiamoko gei shüwatuo; mu a ruopfüe nie rütsetuo.

³¹ Tsiu a nie nadiko pekawatuo, siro nie kemesachüko themia jütatuo, mu a nie vie re kethenguko thengulie lho.

³² Ae nie kijü pekaperuowatuo, sidi nie ngumvümia vor sünu lhoukecüko bu u ngo zotuo.

³³ Tsiu a nieko kezapie seyieko donu shüwatuo, mu a zhiechau zupie nie petsoutuo, di nie kijüu thedzükezei chütatuo, mu nie nadiko kaüruotatuo.

³⁴ Sitse kijüue lieva chükezhü chie, süu sabat-u ze di ketheguo zhü zotuo; siro nie bu nie ngumvümia kijü nu ketuo ki, süki kijüue rüleituo, mu puo sabatko ze ketheguotuo.

³⁵ Süu lieva chükezhü chie puoe rüleizhü zotuo, nie puo gei lhou keba ki sabat zha nhie kerülei nguliekemoko ngulietuo.

³⁶ Siro nie baluokecüko, ae uko ngumvümia kijü nu thachümeziekecü ketsepie u melou nu shütuo; nhanyü hekeshü pfhe rei uko kechü petawatuo, tsiu ukoe mia zhiecha therhiekecü tuoitatuo, mu mia uko whuo kemonu tetsutatuo.

³⁷ Uko huoniehuo perhepfülietuo, mia u whuo morei zhiecha therhietuoü takezhü tuoi; mu nie ngumvümia mhodzünu thalieketuo kekuo puorei jütatuo.

³⁸ Mu nie seyieko donu katatuo, mu nie ngumvümia kijüu thuo nie mezulietuo.

³⁹ Nie donu rheikelieko nie kejo la nie ngumvümia kijü nunu nie meyhumezhie tuotuo; mu uko puonuoko kejo la rei ukoe meyhumezhie di lhoutuo.

⁴⁰ Derei uko u kejo mu upuonuoko kejo phralie, ukoe a gei kecürü tho chü mu a petsou di tuotacü la,

⁴¹ di a bu uko petsou di uko ze ngumvümia kijü nu vowa shierei, siro u melou zhürekemo-u chü kerünuolie tsiu uko kejo mu kekrükecüko chü kemezhü lalie ro,

⁴² ae Jakob ze dietseidiekhokelieu rükrashütuo, tsiu ae Isak ze dietseidiekhokelieu mu Abraham ze dietseidiekhokelieu rükrashütuo, mu ae kijüu rükrashütuo.

⁴³ Derei kijüue uko bu puo khawa di zhütuo: sidi uko sa mo di lieko lieva chükezhü ki puo sabatko ze di rülei ketheguotuo; siro ukoe u kejo la, mhachü kemezhü latuo, ukoe a pethokeshüko melie mu uko ruopfüe a chünukecüko rütsekecü la.

⁴⁴ Derei ukoe u ngumvümia kijü nu tuokecü ki ae uko meliewa, mu a uko rütse di uko pekawa di uko ze dietseidiekhokelieu bierhuowalie lho: Ae Jihova uko Kepenuopfü zokecü la.

⁴⁵ Derei ae uko zhazhü la u puotsanuoko ze dietseidiekhokelieu rükrashütuo; ae uko Kepenuopfü chüketuo la seyieko mhingu chü di Ijipt kijü nunu uko ze parshü: Ae Jihova zo.

⁴⁶ Hako Jihovae Sinai kijüthou geinu Mosa ze di puo mu Israelmiako donu khapie bakelie, chünukecüko, pethokeshüko mu thezhoko zo.